Read Библија, Константинов 1 Коринќаните 15 Bible Online

1 Коринќаните 15 - Библија, Константинов bible

1 Коринќаните 15

¹Ви напомнувам, браќа, за Евангелието, кое ви го проповедав и кое вие го примивте и во кое стоите.

²Преку кое и се спасувате, ако го држите цврсто како што ви го проповедав, освен ако не сте поверувале напразно.

³Зашто, ви го предадов најнапред она, што го бев и примил: дека Христос умре за нашите гревови, според Писмата,

⁴и дека е погребан и дека воскресна на третиот ден, според Писмата;

⁵дека му се јави на Кифа, после на Дванаесетте.

⁶Потоа им се јави еднаш на повеќе од пет стотини браќа, од кои повеќето се живи до денес, а некои - починаа.

⁷Потоа му се јави на Јакова, па тогаш на сите апостоли.

⁸А најпосле ми се јави и мене како на недоносче.

⁹Зашто јас сум најмал меѓу апостолите и не сум достоен да се наречам апостол, бидејќи ја гонев Божјата Црква.

¹⁰Но со Божја благодат сум она што сум. А Неговата благодат, која ми е дадена мене, не беше напразно, туку се потрудив поизобилно од сите нив, но не јас - туку Божјата благодат, која е со мене.

¹¹И така: било јас или тие, така проповедаме; а вие така поверувавте.

¹²Но, ако се проповеда дека Христос воскреснал од мртвите, како некои меѓу вас велат дека нема воскресение на мртвите?

¹³Ако нема воскресение на мртвите, тогаш ни Христос не воскреснал;

¹⁴А ако Христос не воскреснал, тогаш е празна нашата проповед, празна е и вашата вера.

¹⁵При тоа се наоѓаме и како лажни Божји сведоци, дека сведочиме за Бога, дека Го воскреснал Христа, Кого не Го воскреснал; ако навистина мртвите не воскреснуваат.

¹⁶Зашто, ако мртвите не воскреснуваат, ни Христос не воскреснал.

¹⁷А ако Христос не воскреснал, суетна е вашата вера; вие сте уште во вашите гревови.

¹⁸Тогаш и оние, кои умреле во Христа, загинале.

¹⁹Ако само во овој живот се надеваме на Христа, ние сме најнесреќни од сите луѓе.

²⁰Но сега, Христос воскресна од мртвите, како првенец на оние кои умреле.

²¹Бидејќи смртта дојде преку човек, така преку еден Човек дојде и воскресението од мртвите.

²²Зашто, како што сите умираат во Адама, така и во Христа сите ќе оживеат.

²³Но секој по својот ред: првенец Христос, после оние кои се Христови, во времето на Неговото доаѓање.

²⁴Тогаш доаѓа крајот, кога ќе Му го предаде Царството на Бог и Таткото; откако ќе ги уништи: секое началство, и секоја власт и сила.

²⁵Зашто, Тој треба да царува „додека не ги положи сите свои непријатели под Своите нозе.”

²⁶Смртта ќе биде уништена како последен непријател.

²⁷Зашто „сè покорил под Неговите нозе.” А кога вели, дека е покорено сè, јасно е дека е покорено сè, освен Оној, Кој Му покорил сè.

²⁸Кога ќе Му биде потчинето сè, тогаш и Самиот Син ќе Му се потчини на Оној, Кој Нему Му потчинил сè, за да биде Бог сè во сè.

²⁹Инаку, што ќе прават оние, кои се крштаваат за мртвите? Ако мртвите воопшто не воскреснуваат, зошто се крштаваат за нив?

³⁰И ние зошто сме секој час во опасности?

³¹Со вашата пофалба, браќа, која ја имам во Христа Исуса, нашиот Господ, јас умирам секој ден.

³²Ако се борев, по човечки, со ѕверови во Ефес, каква ми е ползата? Ако мртвите не воскреснуваат, „да јадеме и да пиеме, зашто утре ќе умреме!”

³³Не измамувајте се; „лошите друштва ги расипуваат добрите навики!”

³⁴Отрезнете се, како што треба, и не грешете, зашто некои не Го знаат Бога. За ваш срам, го велам ова.

³⁵Но, некој ќе праша:”Како воскреснуваат мртвите? И во какво тело ќе дојдат?

³⁶Неразумен човеку, она што го сееше ти, не оживува, ако не умре.

³⁷И што сееш, не го сееш телото што ќе биде; туку голо зрно, било пченично или од нешто друго.

³⁸А Бог му дава тело, какво што сака; и на секое семе негово тело.

³⁹Не е секое тело исто тело: туку друго е човечкото, и друго е животинското тело, и друго е телото на птиците, и друго на рибите.

⁴⁰Има и небесни тела и земни тела, но друг е сјајот на небесните тела, друг на земните.

⁴¹Друг е сјајот на сонцето, а друг е сјајот на месечината; а друг е сјајот на ѕвездите, зашто ѕвезда од ѕвезда се разликува по сјајот.

⁴²Така е и со воскресението на мртвите; се сее во распадливост, воскреснува во нераспадливост;

⁴³се сее без чест, воскреснува во слава; се сее во слабост, воскреснува во сила;

⁴⁴се сее природно тело, воскреснува духовно тело. Ако има природно тело, има и духовно тело.

⁴⁵Така е напишано: „Првиот човек, Адам, стана жива душа”; а последниот Адам - животворен Дух.

⁴⁶Но не е прво она што е духовно, туку е прво природното, а духовното доаѓа потоа.

⁴⁷Првиот човек е од земја, земјен; вториот Човек е од небото.

⁴⁸Каков е земниот, такви се и земните; каков е небесниот, такви се и небесните.

⁴⁹И како што го носиме обликот на земниот, така ќе го носиме и обликот на небесниот.

⁵⁰Ова ви го велам, браќа: телото и крвта не можат да го наследат Божјото Царство; ниту распадливото го наследува нераспадливото.

⁵¹Еве! Ви кажувам тајна: не ќе - умреме сите, но сите ќе се измениме,

⁵²во еден миг, во миг на окото, при гласот на последната труба: имено трубата ќе затруби и мртвите ќе воскреснат нераспадливи, а ние ќе се измениме,

⁵³зашто треба ова распадливото да се облече во нераспадливо; и ова смртното да се облече во бесмртност.

⁵⁴А кога, ова, распадливото ќе се облече во нераспадливост; и, ова, смртното ќе се облече во бесмртност, тогаш ќе се збидне напишаното слово: „Победата ја проголта смртта.

⁵⁵Смрт, каде ти е победата? Смрт, каде ти е осилото?”

⁵⁶Осилото на смртта е гревот; а силата на гревот е законот.

⁵⁷Но, фала Му на Бога, Кој ни даде победа преку нашиот Господ Исус Христос.

⁵⁸Затоа, мои возљубени браќа, бидете цврсти, непоколебливи, секогаш пребогати во Господовото дело, знаејќи дека вашиот труд во Господа не е напразен.