Read Библија, Константинов 1 Коринќаните 3 Bible Online

1 Коринќаните 3 - Библија, Константинов bible

1 Коринќаните 3

¹И јас, браќа, не можев да ви зборувам како на духовни, но како на телесни, како на младенци во Христа.

²Со млеко ве напоив, не со тврда храна, зашто уште не можевте да ја поднесувате. А ни сега не можете,

³зашто сте уште телесни. Не сте ли телесни и не живеете ли како обичните луѓе, штом меѓу вас има завист, спорови и поделба?

⁴Не сте ли телесни, имено, кога еден зборува: „Јас сум Павлов”, а друг: „Јас сум Аполосов?”

⁵Па што е Павле? Што е Аполос? Слуги преку кои вие поверувавте и тоа според она, колку кому Господ му дал.

⁶Јас посадив, Аполос навади, но Бог прави да расте.

⁷Затоа: ниту оној кој сади, е нешто; ниту оној кој навадува, туку Бог, Кој прави да расте.

⁸А оној, кој сади и оној, кој вади - едно се, но секој ќе ја прими својата награда според својот труд.

⁹Ние сме соработници на Бога, а вие сте Божја нива, Божја зграда.

¹⁰Според Божјата благодат, која ми е дадена, јас, како мудар градител, ја поставив основата, а друг гради. Но секој да внимава како надградува.

¹¹Зашто, никој не може да постави друга основа, освен онаа што е поставена, која е Исус Христос.

¹²И ако некој врз оваа основа ѕида злато, сребро, скапоцени камења, дрво, сено, слама,

¹³сечие дело ќе излезе на видело; Денот ќе го покаже, зашто ќе се открие во оган; а огнот ќе покаже какво е чие дело.

¹⁴Оној, кому ќе му остане тоа што го градел, ќе прими награда;

¹⁵а оној чие дело ќе изгори, тој ќе претрпи загуба, но самиот ќе се спаси, но така, како низ оган.

¹⁶Не знаете ли дека сте Божји храм и дека Божјиот Дух живее во вас?

¹⁷Ако некој го разруши Божјиот храм, Бог ќе го разруши него, зашто Божјиот храм е свет, а тоа сте вие.

¹⁸Никој нека не се измамува; ако некој меѓу вас мисли дека е мудар во овој свет, нека стане безумен, за да биде мудар,

¹⁹зашто мудроста на овој свет е безумство пред Бога! Имено, напишано е: „Тој ги фаќа мудрите во нивното лукавство.”

²⁰И пак: „Господ знае дека мислите на мудрите се суетни.”

²¹Затоа никој да не се фали со луѓето! Зашто сè е ваше:

²²било Павле, или Аполос, или Кифа, или светот, или животот, или смртта, или сегашноста, или иднината, сè е ваше,

²³а вие сте Христови, Христос е Божји.