Read Библија, Константинов 1 Коринќаните 8 Bible Online

1 Коринќаните 8 - Библија, Константинов bible

1 Коринќаните 8

¹Во однос на жртвите на идолите, знаеме дека сите ние имаме знаење. Но знаењето вообразува, а љубовта надѕидува.

²Ако некој мисли дека знае нешто, тој уште не знае како треба да знае!

³Но, ако некој Го љуби Бога, него Бог го познава.

⁴И така, во однос јадењето на идолски жртви, знаеме дека идолот не е ништо во светот и дека нема друг Бог освен Единиот.

⁵Зашто, ако и има таканаречени богови, било на небото, било на земјата, како што има многу богови и многу господари,

⁶но, ние имаме еден Бог, Татко, од Кого е сè и за Кого сме ние, и еден Господ Исус Христос, преку Кого е сè, и преку Кого сме и ние.

⁷Но, сите го немаат ова знаење. Имено, некои според својата досегашна навика на идолите - ја јадат храната како идолска жртва, и така се осквернува нивната слаба совест.

⁸Меѓутоа јадењето не нè прави угодни на Бога: ниту губиме нешто, ако не јадеме; ниту добиваме нешто, ако јадеме.

⁹Но внимавајте оваа ваша слобода да не им стане сопка на слабите!

¹⁰Зашто ако некој те види тебе, кој имаш знаење, како седиш на трпеза во идолскиот храм, нема ли неговата совест, бидејќи е слаба, да биде поттикната да јаде од жртвуваното на идолите?

¹¹И заради твоето знаење загинува слабиот брат, за кого Христос умре.

¹²Така, грешејќи против браќата и ранувајќи ја нивната слаба совест, грешите против Христа.

¹³Затоа, ако јадењето го соблазнува мојот брат, нема воопшто да јадам месо довека, за да не го соблазнувам својот брат.