Read Библија, Константинов 2 Коринќаните 3 Bible Online

2 Коринќаните 3 - Библија, Константинов bible

2 Коринќаните 3

¹Почнуваме ли пак да се препорачуваме сами себеси? Или, можеби ни се потребни, како на некои, писмени препораки за вас или од вас?

²Вие сте нашето писмо напишано во нашите срца, кое го познаваат и го читаат сите луѓе.

³Зашто е очигледно дека сте Христово писмо, составено преку нашата служба; напишано не со мастило, туку со Духот на живиот Бог; не на камени плочи, туку врз плочи - на човечките срца.

⁴А такво уверување кон Бога имаме преку Христа.

⁵Не дека сме способни сами од себе да помислиме за нешто, како сами од себе, туку, нашата способност доаѓа од Бога,

⁶Кој и нè оспособи за служители на Новиот завет; не на буквата, туку на Духот, зашто буквата убива, а Духот оживува.

⁷Ако пак служењето на смртта, со букви издлабени во камења, беше толку славно, така што Израелевите синови не можеа да го гледаат Мојсеевото лице, поради сјајот на неговото лице, кој требаше да престане,

⁸како служењето на Духот не ќе биде уште пославно?

⁹Зашто, ако е славно служењето што донесува осуда, многу е поизобилно во слава служењето што донесува праведност.

¹⁰Зашто и она што беше прославено, не е прославено во тој поглед, заради славата која го надвисува.

¹¹Зашто, ако беше со слава она што било поминливо, многу повеќе е во слава она што е трајно.

¹²И така, имајќи ваква надеж, зборуваме со голема смелост;

¹³и не сме како Мојсеј, кој ставаше покривало на своето лице, за да не го видат Израелевите синови свршетокот на она што се отстрануваше.

¹⁴Но нивните умови беа закоравени. Зашто, до денешниот ден останува истото покривало при читањето на Стариот Завет, и не се открива, зашто се отстранува само во Христа.

¹⁵И така до денес, кога го читаат Мојсеја, покривалото им лежи на нивното срце.

¹⁶Но, кога Израел се обрати кон Господа, покривалото се отстранува.

¹⁷Зашто Господ е Дух, а каде е Господовиот Дух, таму е слободата.

¹⁸А ние сите, со откриено лице, ја одразуваме Господовата слава и се преобразуваме во ист лик, од слава во слава, како што го прави тоа Господовиот Дух.