Read Библија, Константинов Галатите 1 Bible Online

Галатите 1 - Библија, Константинов bible

Галатите 1

¹Павле - апостол, испратен не од луѓе, ниту преку посредство на човек, туку преку Исуса Христа и Бог Таткото, Кој Го воскресна од мртвите -

²и сите браќа, кои се со мене, до црквите во Галатија.

³Благодат и мир на вас од Бога, нашиот Татко, и од Господа Исуса Христа,

⁴Кој се даде Себеси за нашите гревови, за да нè избави од сегашниот лукав век, по волјата на нашиот Бог и Татко!

⁵Кому е слава во сите векови. Амин!

⁶Се чудам дека така брзо се одвратувате од Оној, Кој ве повика во Христовата благодат, и преминувате кон друго евангелие,

⁷кое не е друго, само има некои, кои ве збунуваат и сакаат да го изопачат Христовото Евангелие.

⁸Но ако и ние, или ангел од небото, ви проповеда друго евангелие, различно од она што ви го проповедавме, да биде проклет!

⁹Како што рековме порано и сега пак велам: ако некој ви проповеда евангелие, што се разликува од она што го примивте, да биде проклет!

¹⁰Дали јас сега ги уверувам луѓето или Бога? Или настојувам да им угодам на луѓето? Ако уште би им угодувал на луѓето, немаше да бидам Христов служител.

¹¹Зашто, ве известувам, браќа, дека Евангелието кое го проповедав не е човечко,

¹²бидејќи ниту јас го примив од човек ниту го научив, туку преку откровението на Исуса Христа.

¹³Вие секако сте чуле за моето некогашно живеење во јудејството: како прекумерно ја гонев Божјата црква и ја запустував.

¹⁴и во јудејството надминав многу свои врсници во својот народ, вдахновен од преголемата ревност за преданијата на своите прататковци.

¹⁵А кога Му беше по волја на Оној, Кој ме оддели од утробата на мојата мајка и ме призва преку Својата благодат,

¹⁶да Го открие во мене Својот Син, за да Го проповедам меѓу народите, не се посоветував веднаш со тело и крв,

¹⁷ниту отидов горе во Ерусалим кај оние, кои пред мене беа апостоли, туку отидов понатаму во Арабија и пак се вратив во Дамаск.

¹⁸А на три години потоа отидов горе во Ерусалим, за да го видам Петар, и останав при него петнаесет дена.

¹⁹А некој друг од апостолите не видов, освен Јаков, братот Господов.

²⁰А пак што ви пишувам, еве пред Бога велам дека не лажам.

²¹Потоа дојдов во краиштата на Сирија и Киликија.

²²А на црквите во Јудеја кои се во Христа, лично им бев уште непознат,

²³тие беа само слушале: „Оној, кој некогаш нè гонеше, сега ја проповеда верата, која некогаш ја разурнуваше.”

²⁴И го славеа Бога во мене.