Read Библија, Константинов Галатите 2 Bible Online

Галатите 2 - Библија, Константинов bible

Галатите 2

¹На четиринаесет години потоа отидов горе пак во Ерусалим со Варнава, земајќи го со себе и Тит.

²А отидов горе по откровение и им го изложив Евангелието, кое го проповедам меѓу народите, но насамо на видните, можеби да не трчам или да не сум трчал напразно.

³Но ни Тит, кој беше со мене, иако Грк, не беше принуден да се обреже,

⁴и тоа заради тајно воведените лажни браќа, кои се вовлекле за да ја согледуваат нашата слобода, која ја имаме во Христа Исуса, за да нè поробат.

⁵На кои не им отстапивме ни за час, ниту им се покоривме, за да остане со вас вистината на Евангелието.

⁶А што се однесува за оние, кои беа сметани за видни, какви и да биле некогаш, мене ми е сеедно; Бог не гледа на човековото лице - тие видните ништо не ми придадоа.

⁷Туку, напротив, кога видоа дека мене ми е поверено Евангелието меѓу необрезаните, како на Петар меѓу обрезаните -

⁸зашто Оној, Кој го оспособи Петра за апостолство меѓу обрезаните, ме оспособи и мене за паганските народи -

⁹и кога ја познаа благодатта, што ми е дадена, Јаков, Кифа и Јован, кои беа сметани за столбови, ни ги дадоа, мене и на Варнава, десниците во знак на заедништвото; за да одиме ние до паганските народи, а тие до обрезаните;

¹⁰само да си спомнуваме за бедните, за истото, што и ревнував да го правам.

¹¹А кога Кифа дојде во Антиохија, му се спротивставив во лице, зашто требаше да биде осуден.

¹²Имено, пред да дојдат некои од Јакова, тој јадеше со многубошците, но кога дојдоа овие, тој се повлече и се отстрани, заради страв од обрезаните.

¹³И дволичеа со него и другите Јудејци, така што нивното лицемерство го заведе и Варнава.

¹⁴Кога видов дека не одат право според вистината на Евангелието, му реков на Кифа пред сите: „Ако ти, кој си Јудеец, живееш како народите; а не јудејски, како можеш да ги принудуваш народите да живеат јудејски.

¹⁵Ние сме по раѓање Јудејци, а не грешници од народите.

¹⁶Но бидејќи знаеме дека човекот не се оправдува од делата на Законот, туку само преку верата на Исуса Христа, и ние поверувавме во Христа Исуса, за да се оправдаме од верата во Христа, а не од делата на Законот ; зашто од делата на Законот нема да се оправда ниту еден човек.

¹⁷Па ако и ние самите, сакајќи да се оправдаме во Христа, се најдовме грешници, дали е тогаш Христос служител на гревот? Далеку од тоа!

¹⁸Зашто, ако повторно го ѕидам она што сум го разурнал, се покажувам како престапник:

¹⁹зашто јас умрев преку Законот за Законот, за да живеам за Бога.

²⁰Со Христа сум распнат на крстот; и јас веќе не живеам, туку Христос живее во мене: а животот што сега го живеам во телото, го живеам преку верата во Божјиот Син, Кој ме возљуби и Се предаде Себеси за мене.

²¹Не ја поништувам Божјата благодат, зашто ако правдата доаѓа преку Законот, тогаш Христос умрел напразно.