Read Библија, Константинов Галатите 4 Bible Online

Галатите 4 - Библија, Константинов bible

Галатите 4

¹Ви велам пак, додека е наследникот малолетен, со ништо не се разликува од робот, иако е господар на сè.

²Туку е под настојници и управители до рокот определен од таткото.

³Така и ние, додека бевме малолетни, бевме заробени под првобитните учења на светот;

⁴а кога се исполни времето, Бог Го испрати Својот Син, роден од жена, роден под Законот,

⁵за да ги откупи оние, кои беа под Законот, за да го примиме посинувањето.

⁶А бидејќи сте синови, Бог Го испрати во вашите срца: Духот на Својот Син, Кој вика: „Ава, Татко!”

⁷Затоа не си повеќе роб, туку син; а ако си син, тогаш си и наследник на Бога преку Христа.

⁸Но вие порано, не познавајќи Го Бога, им служевте ропски на боговите, кои по природа не се тоа.

⁹А сега, кога Го познавате Бога, или уште подобро: откако Бог ве позна вас - како можете пак да им се враќате на слабите и бедни елементарни учења, на кои сакате пак одново да им служите ропски?

¹⁰Внимавате на деновите, и месеците, и времињата, и годините.

¹¹Се плашам за вас, да не се трудев напразно за вас.

¹²Ве молам, браќа, бидете каков што сум јас, зашто и јас сум како вас! Вие со ништо не сте ме навредиле.

¹³А знаете дека за првпат во телесна слабост, ви го проповедав Евангелието;

¹⁴и искушението, кое беше за вас, во моето тело, не го отфрливте, ниту се згнасивте од него; туку ме примивте како Божји ангел, како Христа Исуса.

¹⁵Сега, каде е она ваше блаженство? Зашто ви сведочам, дека кога би било можно, би ги извадиле своите очи и би ми ги дале мене.

¹⁶Дали ви станав непријател затоа, што ви ја зборувам вистината?

¹⁷Тие не ревнуваат добро за вас, туку сакаат да ве одвојат, за да ревнувате за нив.

¹⁸Меѓутоа, добро е секогаш да ревнувате во доброто, а не само кога сум јас при вас,

¹⁹деца мои, кои пак сум во породилни маки, додека Христос се вообличи во вас.

²⁰Би сакал да сум сега при вас, и да го изменам својот глас, зашто сум во сомнение за вас.

²¹Кажете ми, вие, кои сакате да бидете под Законот: не го слушате ли Законот?

²²Зашто е напишано дека Авраам имал два сина: едниот од робинката, а другиот од слободната.

²³Но оној, од робинката, роден е по тело, а оној од слободната преку ветувањето.

²⁴Ова е речено сликовито: тие жени се двата завета; едниот од гората Синај, кој раѓа за ропство; тој е Агара -

²⁵зашто Агара е Синајската Гора во Арабија, и му одговара на сегашниот Ерусалим, кој робува со своите деца.

²⁶Но небесниот Ерусалим е слободен, тој е наша мајка,

²⁷зашто е напишано: „Весели се неплодна, која не раѓаш; воскликни и извикај ти, која не си имала породилни маки; зашто оставената има повеќе деца, отколку онаа, која има маж.”

²⁸И вие сте, браќа, деца на ветувањето како Исак.

²⁹И како што некогаш оној, кој се роди по тело, го гонеше оној, кој се роди по дух, така е и сега.

³⁰А што вели Писмото? „Истерај ја робинката и нејзиниот син, зашто синот на робинката нема да наследи со синот на слободната!”

³¹Затоа, браќа, ние не сме деца на робинката, туку на слободната.