Read Библија, Константинов Галатите 5 Bible Online

Галатите 5 - Библија, Константинов bible

Галатите 5

¹Христос нè ослободи за слободата. Според тоа, стојте цврсто и не потчинувајте му се пак на ропскиот јарем.

²Еве, јас, Павле, ви велам: ако се обрезувате, Христос никако нема да ви користи.

³И пак му сведочам на секој човек, кој се обрезува, дека е должен да го исполни целиот Закон.

⁴Се одвоивте од Христа вие, кои сакате да се оправдате преку Законот; отпаднавте од благодатта.

⁵Зашто ние, преку Духот, преку верата, ја очекуваме надежта на правдата.

⁶Зашто во Христа Исуса ниту обрезанието има вредност, ниту необрезанието, туку верата, која дејствува преку љубовта.

⁷Трчавте добро! Кој ви попречи да не се покорувате на вистината?

⁸Тоа одвраќање не е од Оној, Кој ве повика.

⁹Малку квас го потквасува целото тесто.

¹⁰Јас сум уверен за вас во Господа, дека нема да мислите инаку. А кој ве буни ќе претрпи осуда, кој и да бил!

¹¹Ако пак јас, браќа, уште го проповедам обрезанието, зошто уште ме гонат? Во тој случај се укинува соблазната од крстот!

¹²О, да се отсечеа оние, кои ве бунат!

¹³Зашто вие, браќа, повикани сте кон слобода; само слободата да не ви биде повод за угодување на телото, туку со љубов служете си еден на друг.

¹⁴Зашто целиот Закон е исполнет во еден збор - во: „Љуби го својот ближен како самиот себе!”

¹⁵Ако пак се гризете и јадете еден со друг, пазете да не се истребите еден со друг.

¹⁶А велам: одете во Духот и нема да ги исполнувате страстите на телото,

¹⁷зашто телото копнее против Духот, а Духот против телото; зашто тие се противат еден на друг, за да не го правите она, што сакате.

¹⁸Но, ако Духот ве води не сте под Законот.

¹⁹А делата на телото се познати; тоа се: блудство, нечистота, бесрамност,

²⁰идолопоклонство, вражање, непријателства, препирка, ревнување, гнев, себичност, раздори, кривоверства;

²¹зависти, убиства, пијанства, срамни гозби, и слични на овие, за кои ви зборувам однапред, како што ви реков и порано: дека оние, кои прават такви работи, нема да го наследат Божјото Царство.

²²А плодот на Духот е: љубовта, радоста, мирот, трпението, љубезноста, добрината, верноста, кротоста, самоконтролата;

²³нема закон против вакви нешта.

²⁴А оние кои се Христови го распнаа своето тело со неговите страсти и похоти.

²⁵Ако живееме во Духот, нека и да Го следиме Духот!

²⁶Да не бидеме полни со суетно славољубие! Да не се предизвикуваме еден со друг! Да не си завидуваме еден на друг!