Read Библија, Константинов Ефешаните 2 Bible Online

Ефешаните 2 - Библија, Константинов bible

Ефешаните 2

¹И вас, кои бевте мртви поради вашите престапи и гревови,

²во кои живеевте некогаш според векот на овој свет, според кнезот на воздушните сили - духот, кој дејствува сега меѓу синовите на непокорноста.

³Меѓу овие, и ние живеевме некогаш во своите телесни страсти, извршувајќи ги похотите на телото и на помислите и бевме по природа чеда на гневот како и сите други.

⁴Но Бог, Кој е богат во милост - поради Својата голема љубов со која нè возљуби нас,

⁵нè оживе заедно со Христа и нас, кои бевме мртви поради нашите гревови, - по благодат сте спасени! -

⁶и со Него нè воскресна и со Него нè седна во небесните места, во Христа Исуса,

⁷та, во идните векови да го покаже преголемото богатство на Својата благодат, според Својата добрина кон нас во Христа Исуса.

⁸Зашто по благодат сте спасени, преку верата, и тоа не е од вас самите - тоа е Божји дар!

⁹Не од делата, за да не се фали некој.

¹⁰Имено, Негово дело сме, создадени во Христа Исуса, за добри дела, кои Бог ги подготви однапред, за да живееме во нив.

¹¹Затоа спомнувајте си, дека вие, кои некогаш бевте незнабошци по тело, и наречувани необрезани од оние, кои се наречуваа обрезани, и кои се тоа по телото, по човечко дело;

¹²во она време бевте без Христа, оттуѓени од израелското општество, и туѓи на заветите на ветувањето, без надеж и без Бога во светот.

¹³А сега во Христа Исуса, вие кои некогаш бевте далеку, станавте близу преку Христовата крв.

¹⁴Зашто Тој е нашиот мир, Кој од двете направи едно, и го разурна преградниот ѕид, што ги делеше,

¹⁵и во Своето тело го уништи непријателството и законот со неговите заповеди и одредби, и создавајќи мир, од двата да создаде во Себе еден нов човек,

¹⁶и обата во едно тело да ги помири со Бога преку крстот, откако го уби врз него непријателството.

¹⁷Тој дојде да ви проповеда мир на вас, кои бевте далеку и мир на оние, кои беа близу:

¹⁸зашто преку Него, и едните и другите, имаме пристап при Таткото во еден Дух.

¹⁹Затоа, вие не сте веќе туѓинци и придојденици, туку сте сограѓани на светите и домашни на Бога,

²⁰надѕидани врз основата на апостолите и пророците, а аголниот камен е Самиот Христос Исус,

²¹врз Кого целата стројно составена зграда расте во свет храм во Господа,

²²врз кого и вие во Духот заедно се соѕидувате во Божјо живеалиште.