Read Библија, Константинов Филипќаните 2 Bible Online

Филипќаните 2 - Библија, Константинов bible

Филипќаните 2

¹И така, ако има некаква утеха во Христа, ако има некакво охрабрување од љубов, ако има некаква заедница на Духот, ако има некакво внатрешно сочувство и сомилост,

²исполнете ја мојата радост, и мислете исто имајќи ја истата љубов, еднодушни со мисли насочени кон едно.

³Не правете ништо од натпреварување или од суетно честољубие, туку во понизност сметајте се еден друг за поголем од себеси!

⁴Не гледајте секој само на своето, туку секој нека гледа на она што се однесува за другите.

⁵Имајте ја во себе истата мисла, која беше и во Исуса Христа;

⁶Кој, иако е во Божјо обличје, не го сметаше како грабнато - тоа што е еднаков со Бога,

⁷туку се лиши Самиот Себе, и зеде обличје на слуга станувајќи сличен со луѓето.

⁸И откако се најде во лик како човек, Тој се понизи Самиот Себе и стана послушен до смрт, дури и до смрт на крст.

⁹Затоа и Бог Го превозвиши и Му подари име, што е над секое име,

¹⁰и во Исусовото име да се поклони секое колено на оние: кои се на небото, и на земјата, и под земјата;

¹¹и секој јазик да исповеда дека Исус Христос е Господ, за слава на Бог Таткото.

¹²Затоа, возљубени мои, како што секогаш бевте послушни, не само кога сум при вас, туку уште повеќе сега, кога не сум при вас, изработувајте го своето спасение со страв и трепет.

¹³Зашто Бог е Оној, Кој дејствува во вас да сакате и да постапувате, според Неговата волја.

¹⁴Правете сè без ропот и двоумење,

¹⁵за да бидете беспрекорни и чисти, непорочни Божји чеда, среде опак и расипан род, меѓу кој светите како светила во светот,

¹⁶држејќи го цврсто словото на животот, за да имам со што да се фалам во Христовиот Ден, дека не трчав напразно и дека не се трудев напразно.

¹⁷Но, ако се и излевам како налевница врз жртвата и службата на вашата вера, се радувам и се радувам со сите вас.

¹⁸А исто така радувајте се и вие и радувајте се со мене.

¹⁹Се надевам во Господа Исуса дека ќе ви го испратам скоро Тимотеј, та и јас да се утешам кога ќе научам како сте вие.

²⁰Зашто немам никого, кој е со иста душа како него, кој толку искрено ќе се грижи за вас,

²¹зашто сите други го бараат своето, а не она што е на Христа Исуса.

²²Вие ја знаете неговата докажана верност, дека - како дете на таткото - со мене служеше во ширењето на Евангелието.

²³Така, се надевам дека ќе го испратам него, веднаш штом ќе разберам што ќе стане со мене.

²⁴А се надевам во Господа дека и јас самиот скоро ќе дојдам.

²⁵Сметав пак за потребно да ви го испратам Епафродит, својот брат и соработник и соборец - а ваш пратеник, кој и служи на мојата потреба;

²⁶зашто копнееше по сите вас и беше нажален зашто сте чуле дека бил болен.

²⁷Навистина беше болен близу до смртта, но Бог му се смилува, и не само нему, туку и мене, за да не ми дојде жал врз жал.

²⁸Затоа го испратив поскоро, да се зарадувате пак кога ќе го видите, и јас да бидам помалку нажален.

²⁹И така, примете го во Господа со секаква радост и почитувајте ги таквите,

³⁰зашто заради Христовото дело се најде близу до смртта, излагајќи го својот живот на опасност, за да го надомести, тоа што вие не можевте да ми услужите.