Read Библија, Константинов Филипќаните 3 Bible Online

Филипќаните 3 - Библија, Константинов bible

Филипќаните 3

¹И така, браќа мои, радувајте се во Господа! Мене не ми е здодевно да ви пишувам исто, а вам ви служи за безбедност.

²Пазете се од кучињата, пазете се од лошите работници, пазете се од лажно обрезание!

³Зашто, ние сме вистинското обрезание; ние, кои служиме со Божјиот Дух и се фалиме во Христа Исуса, а не се надеваме во телото,

⁴иако и јас можам да се доверам и на телото. Ако некој друг мисли дека може да се надева на телото, тоа јас, уште повеќе:

⁵обрезан сум во осмиот ден, од Израелевиот род сум, од Венијаминовото племе, Евреин од Евреите; по закон - фарисеј;

⁶по ревност - гонител на Црквата; по правдата на Законот бев беспрекорен.

⁷Но тоа што ми беше некогаш придобивка, тоа го сметав за загуба поради Христа.

⁸Во суштина, јас и сега сметам сè за загуба заради преважното познавање на Христа Исуса, Мојот Господ, заради Кого изгубив сè и сè сметам за отпад, за да Го придобијам Христа

⁹и да се најдам во Него, немајќи своја правда, која доаѓа од Законот; туку по правдата, која доаѓа преку верата на Христа: правдата од Бога врз основа на верата,

¹⁰за да Го познавам Него, и силата на Неговото воскресение, и учеството во Неговите страдања, станувајќи сличен на Него во Неговата смрт,

¹¹та некако да достигнам до воскресението од мртви.

¹²Не велам дека веќе го достигнав или дека веќе дојдов до совршенство - туку настојувам да го достигнам, зашто и мене Христос ме достигна.

¹³Браќа, јас уште не мислам дека го достигнав!

¹⁴Но сепак правам едно: го заборавам она што е зад мене, а се стремам кон она што е пред мене; трчам кон целта: за наградата на горното призвание од Бога во Христа Исуса.

¹⁵И така, кои сме совршени мислиме вака; ако вие мислите и нешто поинаку, Бог ќе ви го открие и тоа.

¹⁶Но по она, до кое достигнавме, според истото правило и да бидеме едномислени!

¹⁷Угледајте се на мене, браќа и гледајте на оние, кои одат онака, како што и вие имате пример во нас!

¹⁸Зашто мнозина, за кои ви зборував многупати, а сега зборувам и со солзи одат како непријатели на крстот Христов.

¹⁹Нивниот крај е погибел; нивниот бог е стомакот; нивната слава е во нивниот срам; тие мислат само на земното.

²⁰А нашето жителство е на небесата, од каде и Го очекуваме Спасителот, Господа Исуса Христа,

²¹Кој ќе го преобрази нашето унизено тело, да се сообрази со Неговото славно тело, според дејствието на Неговата сила, со која може да покори сè под Себе.