Read Библија, Константинов Филипќаните 4 Bible Online

Филипќаните 4 - Библија, Константинов bible

Филипќаните 4

¹Затоа, браќа мои возљубени и сакани, радост моја и венец, стојте така цврсто во Господа, возљубени!

²Ја молам Еводија и ја молам Синтихија да бидат едномислени во Господа.

³Да, те молам и тебе, верен другар, помагај им, зашто заедно со мене се трудеа во проповедањето на Евангелието, и со Климент, и со другите мои соработници, чии имиња се во Книгата на животот.

⁴Радувајте се секогаш во Господа! Пак велам: радувајте се!

⁵Вашата кротост да им биде позната на сите луѓе! Господ е близу.

⁶Не грижете се за ништо, туку во сè преку молитва и молба со благодарност искажувајте ги своите просби пред Бога!

⁷И Божјиот мир, што го надвишува секој ум, ќе ги запази вашите срца и вашите мисли во Христа Исуса.

⁸Впрочем, браќа, сè што е вистинско, што е чесно, што е праведно, што е чисто, што е љубезно, што е на добар глас - ако е некаква добродетел, ако е некаква пофалба - мислете на тоа!

⁹Она што го научивте, и примивте, и чувте, и видовте на мене - правете го тоа, и Бог на мирот ќе биде со вас!

¹⁰Се зарадував многу во Господа, зашто сега најпосле ја оживеавте својата грижа за мене. Вие и инаку се грижевте, но немавте прилика.

¹¹Не го зборувам тоа заради скудност, зашто научив да бидам задоволен со она во што сум.

¹²Знам да живеам и во скудност, знам и во изобилство, научен сум на сè и во сешто: да бидам сит и да гладувам; да сум во изобилство и во скудност.

¹³Сè можам преку Христа, Кој ми дава сила.

¹⁴Туку добро направивте, што зедовте учество во моите неволји.

¹⁵А знаете и вие, Филипјани, дека во почетокот на проповедањето на Евангелието, кога заминав од Македонија, ниедна црква не беше со мене во давање и примање, освен единствено вие.

¹⁶Вие ми испративте во Солун, еднаш и двапати, за моја потреба.

¹⁷Не како да барам подарок, туку го барам плодот што се умножува на ваша сметка.

¹⁸Примив сè и имам сè во изобилство. Полн сум откако примив од Епафродит што ми испративте - благопријатен мирис, жртва пријатна благоугодна на Бога.

¹⁹А мојот Бог ќе ја исполни славно секоја ваша потреба, според Своето богатство - во Христа Исуса.

²⁰А на нашиот Бог, и Татко, слава во сите векови Амин!

²¹Поздравете го секој верник во Христа Исуса! Ве поздравуваат браќата, кои се со мене.

²²Ве поздравуваат сите свети, а особено оние од Ќесаревиот дом.

²³Благодатта на нашиот Господ Исус Христос да биде со вашиот дух Амин!