Read Библија, Константинов Колошаните 1 Bible Online

Колошаните 1 - Библија, Константинов bible

Колошаните 1

¹Павле, апостол на Исуса Христа преку Божјата волја и братот Тимотеј,

²до светите и верни браќа во Христа, во Колос: благодат вам и мир од Бог нашиот Татко.

³Му благодариме на Бог, и Таткото на нашиот Господ Исус Христос, молејќи се секогаш за вас,

⁴зашто чувме за вашата вера во Христа Исуса и за љубовта, која ја имате кон сите свети,

⁵заради надежта која се чува за вас на небесата, за која чувте порано од вистинското слово на Евангелието,

⁶кое дојде при вас, како и во целиот свет, и плодоносно расте како и при вас, од оној ден кога го чувте и ја запознавте Божјата благодат во вистината,

⁷како што го научивте од Епафрас, наш возљубен сотрудник во службата, кој е верен Христов служител за вас,

⁸кој и нè извести за вашата љубов во Духот.

⁹Затоа и ние од оној ден кога го чувме тоа, не прекратуваме да се молиме за вас и да просиме да се исполните со познавање на Неговата волја во секоја мудрост и духовно разбирање,

¹⁰така што да одите достојно за Господа и да Му бидете угодни во сè; за да бидете плодоносни во секое добро дело и за да растете во познавањето на Бога;

¹¹зајакнувајќи со секаква сила, сообразно со силата на Неговата слава, за секаква непоколебливост и трпение; со радост

¹²да Му благодарите на Бога, Кој нè оспособи за учество во наследството на светите во светлината.

¹³Тој нè избави од власта на темнината и нè пресели во Царството на Својот возљубен Син,

¹⁴во Кого имаме откуп, преку Неговата крв; простување на гревовите.

¹⁵Тој е образ на невидливиот Бог, Првороден на секое создание,

¹⁶зашто во Него е создадено сè што е во небесата и на земјата; видливо и невидливо, било престоли, или господства, или началства, или власти; сè е создадено преку Него и за Него.

¹⁷И Тој е пред сè и сè во Него има свое сплотување.

¹⁸Тој е и Глава на Телото, на Црквата: Тој е почеток, Првороден од мртвите, за да биде Прв во сè,

¹⁹зашто во Него благоволи да се всели сета полнота,

²⁰и преку Него да измири кон Себе сè што е на земјата или на небото, творејќи мир преку крвта на Неговиот крст.

²¹И вас, кои бевте некогаш отуѓени и непријатели, во своето мислење и во лошите дела,

²²сега ве измири преку смртта на Неговото човечко тело, за да ве изведе пред Себе: свети, непорочни и без вина,

²³само ако останете во верата засновани и цврсти и непоколебливи во надежта на Евангелието, кое го чувте, кое е проповедано на целото создание под небото и на кое јас, Павле, му станав служител.

²⁴Сега се радувам во своите страдања за вас - и во моето тело го дополнувам тоа што им недостига на Христовите маки, за Неговото Тело, Кое е Црквата,

²⁵на која јас и станав служител, според Божјото управителство, што ми е дадено за вас, за да го исполнам Божјото слово:

²⁶тајната, која беше сокриена за векови и поколенија, а која им е откриена сега на Неговите свети,

²⁷на кои Бог сакаше да им јави како е богата славата на оваа тајна меѓу народите: Христос во вас, надеж на славата.

²⁸Ние Го проповедаме Него, опоменувајќи го секој човек и учејќи го секој човек во сета мудрост, за да го претставиме секој човек совршен во Христа Исуса.

²⁹Затоа се трудам и се борам сообразно на Неговата делотворна сила, која дејствува силно во мене.