Read Библија, Константинов 1 Солунците 5 Bible Online

1 Солунците 5 - Библија, Константинов bible

1 Солунците 5

¹А што се однесува за времињата и настаните, браќа, немате потреба да ви се пишува;

²зашто самите вие добро знаете дека Господовиот Ден ќе дојде како крадец во ноќта.

³Кога ќе речат: мир и безбедност, тогаш ненадејно ќе падне погибел на нив, како болка на трудна жена, и не ќе и избегаат.

⁴Но вие, браќа, не сте во темнина - та Денот да ве затече како крадец;

⁵зашто вие сите сте синови на светлината и синови на денот. Не и припаѓаме на ноќта, ниту на темнината;

⁶и така, да не спиеме како другите, туку да бдееме и да бидеме трезвени;

⁷зашто оние кои спијат, спијат ноќе и кои се опиваат, ноќе се опиваат.

⁸А ние, кои му припаѓаме на денот, да бидеме трезвени, да се облечеме во оклоп на вера и љубов, и со надежта на спасение како кацига,

⁹зашто Бог не нè определил за гнев, туку да придобиеме спасение преку нашиот Господ Исус Христос,

¹⁰Кој умре за нас за да живееме заедно со Него, било да сме будни или да спиеме.

¹¹Затоа утешувајте се меѓусебно и надградувајте се еден друг како што и правите!

¹²Ве молиме, браќа, да им дадете признание на оние, кои се трудат меѓу вас, како ваши душогрижници во Господа, и ве опоменуваат.

¹³Ценете ги над сè во љубов, заради нивното дело. Живејте во мир помеѓу себе.

¹⁴Ве молиме уште, браќа, поучувајте ги неуредните, охрабрувајте ги малодушните, помагајте им на слабите, бидете трпеливи со сите.

¹⁵Гледајте, никој никому да не враќа зло за зло, туку секогаш одете по она што е добро меѓу себе и кон сите!

¹⁶Радувајте се секогаш!

¹⁷Молете постојано!

¹⁸Благодарете за сè, зашто тоа е Божја волја за вас во Христа Исуса!

¹⁹Не гаснете го Духот!

²⁰Не презирајте ги пророштвата,

²¹испитувајте сè, задржувајте го доброто.

²²Воздржувајте се од секоја појава на зло!

²³А Самиот Бог на мирот да ве освети наполно! И вашиот дух, и душата, и телото да се запазат беспрекорно при доаѓањето на нашиот Господ Исус Христос!

²⁴Верен е Оној, Кој ве повикува и Кој и ќе го направи тоа.

²⁵Браќа, молете и за нас!

²⁶Поздравете ги сите браќа со свет целив!

²⁷Ве заколнувам во Господа, ова писмо да им го прочитате на сите браќа.

²⁸Благодатта на нашиот Господ Исус Христос да биде со вас. Амин!