Read Библија, Константинов Исус Навин 13 Bible Online

Исус Навин 13 - Библија, Константинов bible

Исус Навин 13

¹Кога Исус остаре и напредна во своите години, Господ му рече: „Веќе си стар и времен, а остана многу земја за да се освои.

²Еве ги подрачјата што уште остануваат: сите филистејски покраини и сета гесурска земја;

³од Сиор, што е пред Египет, сè до границата на Акарон на север, а се смета како подрачје на Ханаанците; пет филистејски кнежевства: Газа, Азот, Аскалон, Гет и Акарон; потоа Авејците

⁴на југ. Сета ханаанска земја од Меар што им припаѓа на Сидонците, па до Афек и до аморејската меѓа;

⁵тогаш земјата на Гивлејците и сиот Ливан кон исток, од Вал-Гад во подножјето на гората Ермон до преминот Емат.

⁶Ќе ги истерам пред Израелевите синови сите жители на подгорјето, од Ливан до Мисрефот на запад - ќе ги истерам сите Сидонци пред Израелевите синови, само раздели му ја на Израел во наследство земјата, како што ти заповедав.

⁷И така раздели ја таа земја во наследство меѓу деветте племиња и половината од Манасиевото племе.”

⁸Другата половина од Манасиевото племе, а со неа и племето Рувимово и Гадово, го примија своето наследство, што им ја даде Мојсеј преку Јордан, на исток. Мојсеј, Господовиот слуга, им додели вака:

⁹од Ароир, што се наоѓа на брегот на потокот Арнон, и од градот во средината на долината, сета висорамнина од Медев до Девон;

¹⁰сите градови на Сион, царот аморејски, кој владееше во Есевон, сè до меѓата на Амоновите синови;

¹¹и Галад, и гесурската и махатската краина со сета гора Ермон, и сиот Васан до Салха;

¹²а во Васан сето царство на Ог, кој владееше во Астарот и Едраин и беше последен потомок на Рафајците. Мојсеј ги победи и ги протера.

¹³Ама Израелевите синови не ги истераа Гесурците и Махатците од средината на Израелците сè до денешниот ден.

¹⁴Само на Левиевото племе не му даде наследство: Господ, Израелевиот Бог, е негово наследство, како што му рече.

¹⁵Мојсеј му даде на племето на Рувимовите синови делови според нивните семејства.

¹⁶Ја примија земјата од Ароир, што лежи на брегот на потокот Арнон, и од градот што е во средината на долината, и сета висорамнина кај Медева;

¹⁷Есевон со сите негови градови кои лежат на висорамнината: Девон, Вамот-Вал, Вет-Вал-Меон;

¹⁸Јаса, Кадим, Мифат;

¹⁹Киријатаим, Сивма, Зарет-Сар на гората над долината;

²⁰Вет Фегот, Аздот Фазга, Вет Есимот;

²¹сите градови на висорамнината и целото царство на Сион, аморејскиот цар, кој владееше во Есевон. Мојсеј го победи како и мадијамските кнезови: Евија, Рекема, Сур, Ур, Рева, Сионови првенци кои живееја во таа земја;

²²и вражалецот Валаам, Веоровиот син, го убија Израелевите синови со острилото на мечот со другите жртви.

²³Меѓник на Рувимовите синови им беше Јордан. Тоа беше наследството на Рувимовите синови според нивните семејства: нивните градови и села.

²⁴Тогаш му даде Мојсеј на Гадовото племе, на Гадовите синови, делови според нивните семејства.

²⁵Ги примија во сопственост: Јазир и сите галадски градови, половината од земјата на Амоновите синови сè до Ароир, спроти Рава,

²⁶и од Есевон до Рамот Миспа и Ветоним, и од Маханаим до покраината Ло-Девир;

²⁷а во долината: Вет Арам, Вет Нимра, Сокот и Сафон, односно остатокот на царството на Сион, есевонскиот цар; Јордан со брегот сè до крајот на Хинеротското Море, на источната страна на Јордан.

²⁸Тоа е наследството на Гадовите синови, според нивните семејства, нивните градови и села.

²⁹Мојсеј и даде дел на половината на Манасиевото племе според неговите семејства.

³⁰Ги добија во сопственост: земјата од Махан, сиот Васан, сето царство на Ог, васанскиот цар, и сите Јаирови села, што се во Васан - шеесет градови.

³¹А половината на Галад, Астарот и Едраин, градовите на Оговото царство во Васан, им припаднаа на синовите на Махир, Манасиевиот син, и тоа половина на Махировите синови според нивните семејства.

³²Така Мојсеј ги подели наследствата во Моавските Полиња, од другата страна на Јордан, источно од Ерихон.

³³Мојсеј не му даде наследство на Левиевото племе: Господ, Израелевиот Бог, е нивното наследство, како што им рече Сам.