Read Библија, Константинов 1 Тимотеј 1 Bible Online

1 Тимотеј 1 - Библија, Константинов bible

1 Тимотеј 1

¹Павле, апостол на Христа Исуса по повелбата на Бога, нашиот Спасител, и на Христа Исуса, нашата надеж,

²до Тимотеј, вистинското чедо во верата: благодат, милост и мир од Бог Таткото и Христа Исуса, нашиот Господ.

³Како што те молев, кога одев во Македонија, да останеш во Ефес, за да им заповедаш на некои да не поучуваат поинаку

⁴и да не обрнуваат внимание на митови и бескрајни родословија, кои повеќе ги поттикнуваат препирањата, отколку поткрепата на Божјата управа, која е по верата.

⁵А целта на наредбата е: љубов од чисто срце, и добра совест и нелицемерна вера,

⁶од што некои откако не ја постигнаа целта, застранија во празни зборови -

⁷сакајќи да бидат учители на Законот, иако не го разбираат ни она што го зборуваат, ни она што го тврдат упорно.

⁸Ние пак знаеме дека Законот е добар, ако некој го применува законски,

⁹знаејќи го ова: дека законот не е воспоставен за праведникот, туку за беззакониците и непокорните, за безбожниците и грешниците, за несветите и нечистите, за убијците на татковци и убијците на мајки; за оние кои убиваат луѓе;

¹⁰за блудниците - и за мажи кои се полово изопачени, за трговците со робови, за лажливците, за лажнозаколнувачите и за сè друго што и е противно на здравата наука,

¹¹според славното Евангелие на блажениот Бог, кое ми е доверено мене.

¹²Му благодарам на Христа Исуса, нашиот Господ, Кој ми даде сила за тоа, зашто ме сметаше верен и ме постави на служба,

¹³мене, кој порано бев хулител, и гонител, и насилник. Но добив милост, зашто го правев тоа од незнаење и неверување.

¹⁴А благодатта на нашиот Господ, со верата и љубовта изобилуваше во Христа Исуса.

¹⁵Верно е словото и достојно - за полно примање: Христос Исус дојде во светот да ги спаси грешниците, од кои сум прв јас.

¹⁶А добив милост токму затоа, за да ја покаже Христос Исус, прво во мене, сета своја трпеливост, за пример на оние, кои ќе веруваат во Него за вечен живот.

¹⁷На Царот на вековите - бесмртниот, невидливиот, единствениот Бог - чест и слава во сите векови Амин!

¹⁸Оваа заповед ти ја предавам, чедо Тимотеј, согласно поранешните пророштва за тебе: за да војуваш добра војна,

¹⁹имајќи вера и добра совест, кои некои ја отфрлија и претрпеа бродолом на верата.

²⁰Меѓу нив се Именеј и Александар, кои ги предадов на сатаната, за да научат да не хулат.