Read Библија, Константинов 1 Тимотеј 4 Bible Online

1 Тимотеј 4 - Библија, Константинов bible

1 Тимотеј 4

¹А Духот јасно вели дека во подоцнежните времиња некои ќе отстапат од верата и ќе слушаат измамливи духови и ѓаволски учења,

²преку лицемерството на лажливците, кои се жигосани во својата совест,

³кои забрануваат стапување во брак и бараат воздржување од јадењата, што Бог ги создаде за да ги земаат со благодарност верните, кои ја познаа вистината.

⁴Зашто секое Божјо создание е добро, и ништо не треба да биде отфрлено, ако се прима со благодарност,

⁵зашто се осветува преку Божјото слово и молитвата.

⁶Ако ги советуваш во ова браќата, ќе бидеш добар служител на Христа Исуса, кој се храни со зборовите на верата и на добрата наука, што ја следиш.

⁷А избегнувај од нечисти и бабешки приказни! Туку обучувај се во побожност!

⁸Зашто телесната обука е малку полезна, а побожноста е полезна за сè, зашто има ветување за сегашниот и идниот живот.

⁹Тоа е вистинско слово и достојно за полно примање.

¹⁰Имено, затоа ние се трудиме и се бориме, зашто се надеваме во живиот Бог, Кој е Спасител на сите луѓе, особено на верните.

¹¹Наложувај го и учи го ова!

¹²Никој да не те презира заради твојата младост! Туку, биди им пример на верните во словото, во поведението, во љубовта, во верата, во чистотата!

¹³Додека дојдам внимавај на читањето, на опоменувањето и на поучувањето!

¹⁴Не занемарувај ја дарбата која е во тебе, која ти е дадена преку пророштво, со ракополагањето на старешините.

¹⁵Исполнувај го тоа, биди во тоа, и твојот напредок да им биде видлив на сите!

¹⁶Внимавај на себеси и на учењето! Истрај во тоа, зашто правејќи го ова ќе се спасиш и себеси и оние кои те слушаат.