Read Библија, Константинов 2 Тимотеј 1 Bible Online

2 Тимотеј 1 - Библија, Константинов bible

2 Тимотеј 1

¹Павле, апостол на Христа Исуса по Божја волја, според ветениот живот во Христа Исуса,

²до Тимотеј, возљубеното чедо: благодат, милост и мир од Бог Таткото и Христа Исуса, нашиот Господ.

³Му благодарам на Бога Кому Му служам уште од моите прародители со чиста совест, спомнувајќи те постојано - ноќе и дење - во своите молитви;

⁴а кога ќе си спомнам за твоите солзи, копнеам да те видам, да се исполнам со радост;

⁵кога си спомнувам за нелицемерната вера која е во тебе, која прво се наоѓаше во твојата баба Лоида и во мајка ти Евника, а уверен сум и во тебе.

⁶Затоа ти напомнувам да го разгориш Божјиот дар, кој е во тебе преку возлагањето на моите раце.

⁷Зашто Бог не ни даде дух на страшливост, туку дух на сила, љубов и себевладеење.

⁸И така, не се срамувај од сведоштвото за нашиот Господ и од мене, затвореникот за Него, туку страдај и ти со мене за Евангелието, според силата на Бога,

⁹Кој нè спаси и нè повика со свет повик, не според нашите дела туку по сопствена одлука и благодат, која ни е дадена во Христа Исуса пред вечните времиња,

¹⁰а која сега се откри преку јавувањето на нашиот Спасител Христос Исус, Кој ја уништи смртта и ги осветли животот и бесмртноста преку Евангелието,

¹¹за кое јас сум поставен како проповедник, и апостол, и учител.

¹²Заради тоа и го трпам сè ова, но не се срамам, зашто знам во Кого сум поверувал и уверен сум дека Тој може да го запази она што Му го доверив, до оној Ден.

¹³Држи се за образецот на здравите зборови што си ги чул од мене во верата и љубовта која е во Христа Исуса!

¹⁴Запази го доброто што ти е доверено преку Светиот Дух, Кој живее во нас.

¹⁵Ти го знаеш тоа, дека во Азија сите се одвратија од мене, меѓу кои се Фигел и Ермоген.

¹⁶Господ да му даде милост на Онисофоровиот дом, зашто повеќе пати ме охрабруваше и не се засрами од моите окови,

¹⁷туку, кога дојде во Рим, грижливо ме побара и ме најде.

¹⁸Господ да му даде да најде милост пред Господа во оној Ден! И како сè ми услужи во Ефес, ти најдобро го знаеш тоа.