Read Библија, Константинов Филимон 1 Bible Online

Филимон 1 - Библија, Константинов bible

Филимон 1

¹Павле, затвореник за Христа Исуса, и братот Тимотеј до нашиот возљубен соработник Филимон,

²и до сестрата Апфија и до нашиот другар во војувањето Архипа и до твојата домашна црква,

³благодат вам и мир од Бог, нашиот Татко, и од Господа Исуса Христа.

⁴Секогаш Му благодарам на мојот Бог, кога те спомнувам во своите молитви

⁵имено, слушам за твојата љубов и вера, што ја имаш кон Господа Исуса и кон сите свети,

⁶и твоето општење во верата да биде делотворно во познавањето на секое добро што е во вас заради Исуса Христа.

⁷Зашто имам голема радост и утеха во твојата љубов, бидејќи ти - брате - ги освежи срцата на светите.

⁸Затоа, иако имам голема смелост во Христа да ти заповедам што е правилно,

⁹заради љубовта повеќе сакам да те молам, јас, таков каков што сум - Павле, старец, а сега и затвореник на Христа Исуса;

¹⁰те молам за моето чедо Онисима, кого го родив во оковите,

¹¹кој некогаш ти беше некорисен, а кој сега ни е корисен и тебе и мене. Ти го испраќам назад него,

¹²а ти прими го како моето срце.

¹³Сакав да го задржам при себе, за да ми служи место тебе во оковите за Евангелието.

¹⁴Но не сакав ништо да направам без твојата согласност, за да не биде твоето добро дело како принудно туку како доброволно.

¹⁵Зашто можеби затоа беше одделен од тебе за малку време, за да го примиш засекогаш,

¹⁶не веќе како роб, туку повеќе од роб, како возљубен брат, особено за мене, а камоли не тебе - и по тело и во Господа.

¹⁷И така, ако мене ме сметаш за другар, прими го него како мене!

¹⁸А ако ти направил некаква штета или ти должи нешто, стави го тоа на моја сметка.

¹⁹Јас, Павле, напишав со своја рака, јас ќе платам; за да не ти речам дека и самиот себе си ми должен мене.

²⁰Да, брате, сакам да видам некаква полза од тебе во Господа. Освежи го срцето мое во Христа.

²¹Ти го напишав ова имајќи доверба во твојата послушност, зашто знам дека ќе направиш и повеќе отколку што ти велам.

²²А заедно со тоа приготви ми и сместување, зашто се надевам дека преку вашите молитви ќе ви бидам даруван вам.

²³Те поздравуваат: Епафрас, кој е со мене затвореник во Христа Исуса,

²⁴Марко, Аристарх, Димас и Лука, мои соработници.

²⁵Благодатта на Господа Исуса Христа со вашиот дух. Амин!