Read Библија, Константинов Евреите 1 Bible Online

Евреите 1 - Библија, Константинов bible

Евреите 1

¹Бог, Кој од стари времиња, многупати и на многу начини, им зборуваше на нашите татковци преку пророците, во последниве денови ни зборуваше преку Синот,

²Кого Го постави за наследник на сè и преку Кого ги создаде и вековите.

³Тој е одблесок на Неговата слава и одраз на Неговото битие, Кој носи сè со Своето силно Слово, Кој го изврши очистувањето на гревовите и седна оддесно на Величеството во висините,

⁴и стана толку повозвишен од ангелите, колку што наследи повозвишено име од нив.

⁵Зашто, кому од ангелите некогаш му рекол: „Ти си Мој Син; Јас Те родив денес” и пак: „Јас ќе Му бидам Татко и Тој ќе ми биде Син?”

⁶И пак, кога Го воведе Првородениот во светот, вели: „И да Му се поклонат сите Божји ангели!

⁷А за ангелите вели: „Кој Своите ангели ги прави ветрови и Своите слуги огнен пламен.”

⁸А за Синот вели: „Твојот престол, Боже, стои во сите векови и жезол на правдата е жезолот на Твоето Царство.

⁹Ја возљуби правдата, а го замрази беззаконието, затоа, о Боже, Твојот Бог Те помаза со масло на радоста, повеќе од Твоите соучесници”,

¹⁰и: „Ти, Господи во почеток ја основа земјата, и небесата се дело на Твоите раце.

¹¹Таа ќе помине, а Ти остануваш. И сета ќе остари како облека,

¹²и ќе ги свиткаш како наметка, и тие ќе се изменат. А Ти си секогаш ист и Твоите години нема да се свршат.”

¹³А кому од ангелите некогаш му рекол: „Седни Ми оддесно додека не ги положам Твоите непријатели за подножје на Твоите нозе?”

¹⁴Не се ли тие сите службени духови, испратени да им служат на оние, кои ќе го наследат спасението?