Read Библија, Константинов Евреите 10 Bible Online

Евреите 10 - Библија, Константинов bible

Евреите 10

¹Зашто Законот ја има само сенката на идните добра, а не и самата суштина на нештата, и не може секогаш со истите жртви, што се принесуваат секоја година постојано, да ги усоврши оние, кои му пристапуваат.

²Инаку би престанале да ги принесуваат, зашто не би биле свесни за гревови оние кои служејќи така, еднаш се очистени.

³Но тие секоја година напомнуваат на гревовите

⁴зашто крвта на биковите и јарците не може да ги отстрани гревовите.

⁵Затоа, влегувајќи во светот вели: „Жртви и приноси Ти не посака, но ми приготви тело.

⁶Сèпалениците и жртвите за грев не Ти беа угодни.”

⁷Тогаш реков: Еве, доаѓам, во книжен свиток за Мене е напишано, да ја исполнам Твојата волја, О Боже.

⁸Додека погоре вели: „Ни жртви, ни приноси, ни паленици, ни жртви за грев не посака; ниту Ти беа угодни” - тие се принесуваат според Законот,

⁹потоа рече: „Еве, доаѓам да ја исполнам Твојата волја.” Така го отстранува првото, за да го воспостави второто.

¹⁰Според таа волја осветени сме преку приносот на телото на Исуса Христа еднаш засекогаш.

¹¹И секој свештеник, навистина, стои секој ден, и служи принесувајќи ги многупати истите жртви, кои никогаш не можат да ги отстранат гревовите.

¹²Но Тој принесе само една жртва за гревовите, и засекогаш седна оддесно на Бога,

¹³и чека натаму додека Неговите непријатели бидат поставени за подножје на Неговите нозе.

¹⁴Зашто Тој со едно принесување ги направи совршени засекогаш оние, кои се осветуваа.

¹⁵А и Светиот Дух ни сведочи за тоа, откако рече:

¹⁶”Ова е заветот, кој ќе го склучам со нив по оние денови, вели Господ, ќе ги положам Своите закони на нивните срца и ќе ги напишам на нивниот ум,

¹⁷и за нивните гревови и за нивните беззаконија нема веќе да си спомнувам.”

¹⁸А каде има проштавање за нив, таму нема веќе приноси за грев.

¹⁹И така, браќа, кога имаме смелост да влегуваме во Светината преку крвта на Исуса,

²⁰Кој ни го отвори новиот и живиот пат низ завесата, односно Неговото тело,

²¹и откако Го имаме Врховниот Свештеник над Божјиот дом,

²²да пристапуваме со искрено срце во полна увереност на верата, со срца кои преку попрскување се очистени од зла совест и со тело измиено во чиста вода.

²³Да го држиме непоколебливо исповедувањето на нашата надеж, зашто е верен Оној, Кој ветил

²⁴и да внимаваме на тоа да се поттикнуваме еден со друг кон љубов и добри дела!

²⁵Да не ги напуштаме своите собранија, како што некои имаат обичај, туку да се бодриме еден друг, и тоа дотолку повеќе, доколку гледате дека наближува Денот!

²⁶Зашто, ако грешиме самоволно откако го примивме полното познание на вистината, не останува веќе жртва за гревовите,

²⁷туку само страшно очекување на судот и ревност на огнот, што ќе ги проголта противниците.

²⁸Кога некој го презре Мојсеевиот закон умира без милост, во присуство на двајца или тројца сведоци.

²⁹Колку полоша казна, мислите, ќе заслужи оној, кој Го подгазил Божјиот Син и ја смета нечиста крвта на заветот, со која бил осветен, и Го навредил Духот на благодатта?

³⁰Зашто ние Го знаеме Оној Кој рече: „Одмаздата е Моја, Јас ќе вратам!” И пак: „Господ ќе му суди на Својот народ.”

³¹Страшно е да се падне во рацете на живиот Бог.

³²Спомнувајте си за поранешните денови, кога просветени претрпевте голема борба на страдања,

³³со тоа што бевте од една страна изложени јавно на хулења и неволји, а од друга страна станавте соучесници на оние кои страдат така.

³⁴Зашто страдавте заедно и со оние кои беа во окови и со радост го примивте разграбувањето на својот имот, знаејќи дека имате подобар и траен имот.

³⁵И така, не отфрлајте ја вашата доверба, која има голема награда.

³⁶Имено, вам ви е потребно трпение, за да ја исполните Божјата волја и да го добиете ветувањето.

³⁷Зашто: уште малку, мошне малку, и Оној Кој доаѓа ќе дојде, и нема да се забави.

³⁸А Мојот праведник ќе живее од верата, ако ли се повлече, Мојата душа нема да благоволи во него.”

³⁹А ние не сме од оние кои се повлекуваат за погибел, туку од оние кои веруваат за спасение на душата.