Read Библија, Константинов Евреите 12 Bible Online

Евреите 12 - Библија, Константинов bible

Евреите 12

¹Затоа и ние, имајќи околу себе толкав облак сведоци, да ги положиме настрана: секое бреме и гревот кој нè сплеткува лесно и да трчаме со трпение на трката што ни е поставена пред нас;

²гледајќи во Исуса, Почетникот и Исполнителот на нашата вера, Кој, поради радоста што беше пред Него, го претрпе крстот, презирајќи го срамот, и седна оддесно на Божјиот престол.

³Имено, размислете за Него, Кој претрпе од грешниците такви противења против себеси, за да не се истоштите и за да не станете малодушни.

⁴Уште не сте се воспротивеле до крв во борбата против гревот,

⁵и ја заборавивте опомената, која ви зборува вам како на синови: „Сине мој! Не презирај го Господовото укорување, ниту ослабувај, кога те изобличува,

⁶зашто Господ го казнува оној, кого го љуби, а го бие секој син, кого што го прима.”

⁷Ако трпите укорување, Бог постапува со вас како со синови. Зашто кој е тој син, кого таткото не го казнува?

⁸А ако сте пак без казна, од која сите добиле дел, тогаш сте незаконски деца, а не синови.

⁹Освен тоа, нашите телесни татковци нè казнуваа, и ние ги почитувавме; нема ли да Му се покориме на Таткото на духовите, и така да живееме?

¹⁰Имено, тие нè казнуваа за малку денови, како што им беше угодно, а Тој за наша полза, за да станеме учесници на Неговата светост.

¹¹Навистина, секоја казна во сегашноста не изгледа дека е за радост, туку за жалост. Но, подоцна им донесува мирен плод на праведност на оние, кои се обучувале преку неа.

¹²Затоа „исправете ги премалените раце и ослабените колена,

¹³и израмнете ги патеките со своите нозе, за да не се исколчи хромото, туку, напротив, да се исцели.

¹⁴Стремете се кон мирот со сите и кон светоста, без која никој не може да Го види Господа,

¹⁵внимавајќи да не му недостасува некому Божјата благодат, „за да не изникне некој горчлив корен” и за да не ве вознемири, и за да не се онечистат со него мнозина;

¹⁶да не биде некој блудник или несвет како Исав, кој за едно јадење го продаде своето првородство.

¹⁷Имено, знаете дека подоцна кога сакаше да го наследи благословот, беше отфрлен, зашто не најде место за покајание, иако го бараше со солзи.

¹⁸Зашто, вие не пристапивте до гората, што може да се опипа и што е пламната во оган; ни до темнината, ни до мракот, ни до виорот,

¹⁹ни до трубниот глас, ни до гласот на зборовите, за кои слушателите молеа да не им се зборува веќе,

²⁰зашто не можеа да ја поднесат заповедта: „Ако и животно се допре до гората, нека биде каменувано.”

²¹А глетката беше толку страшна, така што и Мојсеј рече: „Исплашен сум и треперам.”

²²Туку, вие пристапивте до Сионската Гора, и до градот на живиот Бог, Небесниот Ерусалим: до десетици илјади ангели,

²³до свечениот соборот и заедницата на првородените, кои се запишани на небесата, и до Бога - Судијата на сите, и до духовите на усовршените праведници;

²⁴до Исуса, посредникот на Новиот Завет и до крвта за попрскување, која зборува подобро од Авеловата.

²⁵Гледајте да не Го одбиете Оној Кој зборува! Зашто, ако не избегаа оние, кои Го одбија Оној Кој предупредуваше на земјата; уште помалку ќе избегаме ние, ако се отстраниме од Оној Кој зборува од небесата!

²⁶Неговиот глас ја потресе тогаш земјата, а сега ветува, велејќи: „ Јас ќе ги потресам уште еднаш не само земјата туку и небото.”

²⁷А тоа „уште еднаш„ укажува на измена на она што може да се потресе како создадено, за да остане она што не може да се потресе.

²⁸Затоа, примајќи го Непоколебливото Царство, да бидеме благодарни со што Му служиме благоугодно на Бога, со страв и со почитување.

²⁹Зашто, нашиот Бог е оган, што проголтува.