Read Библија, Константинов Евреите 6 Bible Online

Евреите 6 - Библија, Константинов bible

Евреите 6

¹Затоа да ја оставиме почетната наука за Христа и да се обрнеме кон полна зрелост, не поставувајќи пак основа за покајание од мртвите дела и верата во Бога;

²учењето за крштавањата, за полагање на раце, за воскресението на мртви и за вечниот суд.

³И тоа ќе го направиме ако дозволи Бог.

⁴Зашто е невозможно оние кои еднаш се просветени и кои го вкусиле небесниот дар, станувајќи учесници на Светиот Дух

⁵и кои ги вкусиле: доброто Божјо слово и силите на идниот век,

⁶а сепак отпаднале - пак повторно да бидат обновени за покајание, зашто тие повторно Го распнуваат за себеси Божјиот Син и Го срамат отворено.

⁷Зашто земјата која го впива дождот, што често паѓа на неа, и која им раѓа полезни растенија на оние за кои и се обработува, добива благослов од Бога;

⁸но ако раѓа трње и боцки, не чини и е близу до проклетството; нејзиниот крај е во горењето.

⁹А за вас, возљубени наши, иако зборуваме вака, сме уверени за подоброто кое го придружува спасението.

¹⁰Зашто Бог не е неправеден па да ги заборавил вашето дело и љубовта, што ја покажавте кон Неговото име, откако им послуживте и им служите на светите.

¹¹Но ние сакаме: секој од вас до крај да ја покаже истата ревност, за да се исполни надежта наполно,

¹²и да не бидете мрзливи, туку да се угледате на оние, кои преку вера и трпение го наследуваат ветувањето.

¹³Зашто кога Бог му даде ветување на Авраама, немајќи никој поголем за да се заколне во него, се заколна Сам во Себе,

¹⁴велејќи: „Навистина ќе те благословам премногу и ќе те размножам и преумножам.”

¹⁵И така, Аврам трпејќи го доби ветеното.

¹⁶Имено, луѓето се колнат во она што е поголемо, и секоја нивна препирка свршува со заколнување за потврдување.

¹⁷Затоа и Бог, сакајќи поверодостојно да им ја покаже на наследниците на ветувањето непроменливоста на Својата намера, се послужи со заклетва,

¹⁸така што преку тие две непроменливи работи, во кои Бог не може да измами, да имаме цврст поттик, ние кои прибегнуваме да ја дофатиме надежта што е поставена пред нас.

¹⁹Неа ја имаме како безбедна и цврста котва на душата, која навлегува и зад завесата,

²⁰каде што Исус влезе за нас како претходник, откако стана вечен Првосвештеник по редот Мелхиседеков.