Read Библија, Константинов Евреите 9 Bible Online

Евреите 9 - Библија, Константинов bible

Евреите 9

¹Секако, и првиот завет имаше наредби за богослужение и земно светилиште.

²Зашто беше приготвен првиот дел на Шаторот, во кој беше светилникот и трпезата, и положените лебови, што се вика Светина.

³А зад втората завеса на Шатарот беше другиот дел, наречен Светина над Светините

⁴со златниот жртвеник за кадење и ковчегот на заветот, опкован со злато од сите страни, во кој беше златниот сад со мана и со расцутениот Аронов жезол, и Плочите на заветот,

⁵а над него херувимите на славата, кои го засенуваа Поклопецот на Помирувалиштето; а за сè ова сега не може да се зборува подетално.

⁶При таквиот распоред, во првиот дел на Шаторот секогаш влегуваат свештениците, кога ја извршуваат својата служба,

⁷а во вториот дел, само првосвештеникот еднаш во годината, и тоа не без крв, што ја принесува за своите и за гревовите на народот направени од незнаење.

⁸Со тоа Светиот Дух покажува дека патов во Светината над светините уште не е откриен; додека уште постои првиот дел на Шаторот,

⁹кој е симболична слика за сегашното време, според која се принесуваат дарови и жртви, кои во однос на совеста не можат да го доведат до совршенство оној, кој Му служи така,

¹⁰зашто се засновуваат само врз јадења и пиења, и разни миења - како прописите за телото наложени до времето на поправањето.

¹¹А Христос откако се појави како Првосвештеник на идните добра и влезе низ поголем и посовршен Шатор, што не е направен со рака, односно која не е од оваа создавање,

¹²влезе еднаш засекогаш во Светината над светините, и тоа не со крвта на јарци и јунци, туку преку Својата крв, и ни прибави вечен откуп.

¹³Зашто, ако крвта на јарците и биковите и пепелта од јуница, со која се попрскуваат осквернетите, осветува за чистење на телото,

¹⁴колку ли повеќе крвта на Христа, Кој преку вечниот Дух Му се принесе Сам Себеси на Бога без недостаток, ќе ја очисти нашата совест од мртвите дела, за да Му служиме на живиот Бог.

¹⁵Затоа Тој е Посредник на Новиот завет: за повиканите да го примат ветувањето за вечното наследство, откако смртта зеде место за откуп на престапите направени во првиот завет.

¹⁶Зашто, каде што има завет потребно е да се докаже и смртта на заветувачот.

¹⁷Имено, заветот станува полноважен по смртта, а никогаш не важи додека живее заветувачот.

¹⁸Затоа ни првиот завет не беше утврден без крв.

¹⁹Имено, кога Мојсеј му ја изговори секоја заповед според Законот на целиот народ, зеде крв од јунци и јарци со вода и со црвена волна и со исоп ги попрска: и самиот книжен свиток и целиот народ,

²⁰велејќи : „Ова е крвта на заветот, што Бог го склучи со вас.”

²¹А исто така ги попрска со крвта Шаторот и сите богослужбени садови.

²²И по Законот речиси сè се чисти со крв, и без пролевање на крв нема проштавање.

²³И така, неопходно беше сликите на небесните нешта да се очистат со нив, а самите небесни нешта со жртви подобри од овие.

²⁴Зашто Христос не влезе во ракотворна Светина, која е образ на вистинската, туку во самото небо, за да се јави сега пред Божјото лице за нас.

²⁵И не за да се принесе многупати Себеси, како што првосвештеникот влегува во Светината секоја година со туѓа крв;

²⁶зашто инаку би требало да страда многупати од создавањето на светот. Но сега, кон крајот на вековите, Тој се јави еднаш, за да го отстрани гревот со Својата жртва.

²⁷И како што на човекот му е определено да умре еднаш, а потоа суд,

²⁸така и Христос, откако беше принесен еднаш за да ги земе гревовите на мнозина, ќе се јави вторпат без грев, а за спасение на оние кои го очекуваат.