Read Библија, Константинов Јаков 1 Bible Online

Јаков 1 - Библија, Константинов bible

Јаков 1

¹Јаков, слуга на Бога и на Господа Исуса Христа, до дванаесетте распрснати племиња, поздрав.

²Сметајте ја за чиста радост браќа мои, кога ќе паднете во разни искушенија,

³знаејќи дека испитувањето на вашата вера создава трпение!

⁴А трпението нека има совршено дело, за да бидете совршени и потполни: без никаков недостаток.

⁵Ако некому од вас му недостига мудрост, нека ја моли од Бога, Кој им дава на сите изобилно и без укор - и ќе му се даде.

⁶Но да моли со вера, без никакво сомнение; зашто оној кој се сомнева е сличен на морскиот бран кого ветерот го издига и го тера.

⁷Таквиот човек да не мисли, дека ќе прими нешто од Господа.

⁸Човекот со разделена душа е непостојан во сите свои патишта.

⁹Бедниот брат да се фали во својата возвишеност,

¹⁰а богатиот во својата понизност, зашто ќе помине како цветот на тревата.

¹¹Зашто сонцето изгреа со жега и ја осуши тревата, па нејзиниот цвет отпадна и исчезна убавината на нејзиниот изглед. Така и богатиот ќе овене во своите патишта.

¹²Блажен е човекот, кој поднесува искушение, зашто кога ќе биде испитан, ќе прими венец на живот, што Бог им го ветил на оние, кои Го љубат.

¹³Ниеден, кој е искушуван, да не рече: „Бог ме искушува.” Зашто, Бог не се искушува од злото, и Самиот никого не искушува.

¹⁴Туку, секого го искушува неговата сопствена похот, која го влече и го мами.

¹⁵Потоа похотта зачнува и раѓа грев, а направениот грев раѓа смрт.

¹⁶Не заблудувајте се, возљубени браќа мои.

¹⁷Секој добар дар и секој совршен подарок доаѓа одозгора, од Таткото на светлината, во Кого нема измени, ниту сенка од промена.

¹⁸Тој нè роди според Својата волја преку Словото на вистината, за да бидеме првина на Неговите созданија.

¹⁹Знајте го ова, возљубени браќа мои: секој човек да биде брз во слушањето, а бавен во зборувањето, бавен на гнев,

²⁰зашто човечкиот гнев не создава правда пред Бога.

²¹Затоа отфрлете од себе: секаква нечистота, и последниот остаток на злобата, и примете го со кротост во вас насаденото Слово, кое може да ги спаси вашите души.

²²Но бидете извршители на Словото, а не само слушатели, кои се измамуваат себеси.

²³Зашто, кој го слуша Словото, а не го извршува, сличен е на човек, кој го набљудува своето природно лице во огледало;

²⁴ќе се погледне и ќе замине, и веднаш заборава каков бил.

²⁵А кој ќе се загледа во совршениот закон на слободата и остане во него, не како заборавлив слушател, туку како вистински извршител, тој ќе биде блажен во својата дејност.

²⁶Ако некој мисли дека е побожен, а не го зауздува својот јазик, туку го мами своето срце, неговата побожност е суетна.

²⁷Ова е чиста и неизвалкана побожност пред Бога и Таткото: да бидат посетувани сираците и вдовиците во нивните неволји, и самиот да се пази себеси непорочен од светот.