Read Библија, Константинов 1 Петар 1 Bible Online

1 Петар 1 - Библија, Константинов bible

1 Петар 1

¹Петар, апостол на Исуса Христа, до избраните придојденици, растурени по Понт, Галатија, Кападокија, Азија и Витинија,

²според провидението на Бог Таткото, во осветувањето на Духот, за послушност и попрскување со крвта на Исуса Христа: благодатта и мирот да ви се умножи.

³Благословен да е Бог, Таткото на нашиот Господ Исус Христос, Кој по Својата голема милост, преку воскресението на Исуса Христа од мртвите, нè роди одново за жива надеж,

⁴за непоминливо наследство, и неизвалкано, и кое не вене, запазено во небесата за вас,

⁵кои Божјата сила ве чува, преку верата, за спасение, подготвено да се открие во последното време.

⁶Во ова радувајте се, макар да сте сега за малку наскрбени, ако е потребно во разни искушенија,

⁷та вредноста на вашата вера, која е поскапоцена од пропадливото злато - кое се испитува во оган - да се покаже, за пофалба, слава и чест, при откровението на Исуса Христа,

⁸Кого Го љубите иако не сте Го виделе; во Кого верувате сега, иако не Го гледате; и се радувате со неискажлива и прославена радост,

⁹зашто ја постигнувате целта на својата вера: спасението на душите.

¹⁰Ова спасение го бараа и го испитуваа пророците, кои пророкуваа за благодатта што ви е наменета;

¹¹тие испитуваа на кое и на какво време посочуваше Христовиот Дух, Кој беше во нив, кога однапред навестуваше за Христовите страдања и за славите по нив.

¹²Ним им беше откриено дека не служеа за себе, туку за вас, со ова што сега ви го објавија преку оние, кои ви го проповедаа Евангелието преку Светиот Дух, испратен од небото, во што ангелите сакаат да вникнат.

¹³Затоа, препашете ги бедрата на вашиот ум, бидете трезвени, имајте полна надеж во благодатта, која ќе ви биде донесена при откровението на Исуса Христа.

¹⁴Како послушни чеда, не управувајте се според некогашните страсти, кои ги имавте во своето незнаење,

¹⁵туку според Светецот, Кој ве повика, бидете и самите свети во целото свое држење,

¹⁶зашто е напишано: „Бидете свети, зашто Јас Сум свет.”

¹⁷И кога Го наречувате Татко Оној, Кој не гледајќи кој е кој, го суди според делата секој поединец, поминувајте го во страв времето на својот живот како придојденици,

¹⁸знаејќи дека не сте откупени со распадливи нешта, со сребро или со злато, од својот суетен живот што ви е предаден од вашите татковци,

¹⁹туку со скапоцената крв на Христа, како невино и чисто Јагне,

²⁰Кој беше предназначен, пред создавањето на светот, а се јави на крајот на времето заради вас;

²¹кои преку Него поверувавте во Бога, Кој Го воскресна од мртвите и Му даде слава, така што вашата вера и вашата надеж да бидат во Бога.

²²Откако преку Духот ги очистивте вашите души во послушност кон вистината, за нелицемерно братољубие; љубете се истрајно еден друг од чисто срце,

²³зашто сте новородени не од распадливо семе, туку од нераспадливото живо и вечно Божјо слово.

²⁴Зашто „секое тело е како трева, и сета нејзина слава како цвет од трева: тревата се осушува и цветот и опаѓа,

²⁵а Господовото слово останува довека.” А тоа е словото, кое ви е објавено како Евангелие.