Read Библија, Константинов 1 Петар 3 Bible Online

1 Петар 3 - Библија, Константинов bible

1 Петар 3

¹Така и вие, жените, бидете им покорни на своите мажи, та ако некои не му се покоруваат на словото, да бидат придобиени без слово, со однесувањето на своите жени,

²кога ќе го видат вашето поведение во страв и чистота.

³Вашиот украс да не биде надворешен: во плетење на косата, во ставање на злато или во облекување на разни облеки -

⁴туку: сокриениот човек на срцето во непропадливиот украс на кроткиот и мирен дух, што е од голема вредност пред Бога.

⁵Зашто така некогаш се украсуваа светите жени, кои се надеваа на Бога и им се покоруваа на своите мажи,

⁶како што Сара му беше послушна на Авраама и го наречуваше господар; вие сте нејзини ќерки, кога правите добро, не плашејќи се од никакво заплашување.

⁷Така и вие, мажите, живејте благоразумно со жените како со послаб сад, искажувајќи им почитување како на сонаследнички на благодатта на животот, за да бидат вашите молитви без пречка.

⁸Најпосле, бидете сите сложни во мислењето, сочувствителни, братољубиви, милосрдни, понизни;

⁹не враќајте зло за зло или навреда за навреда, туку, напротив, благословувајте, зашто сте повикани за тоа, за да наследите благослов.

¹⁰Зашто „кој сака да го љуби животот и да види добри денови, нека го воздржи својот јазик од зло и своите усни од измамливо зборување;

¹¹нека се отстрани од злото и нека прави добро, нека бара мир и нека го следи;

¹²зашто Господовите очи гледаат на праведниците и Неговите уши ги слушаат нивните молитви, а Господовото лице е против оние, кои прават зло.”

¹³И кој ќе ви стори зло, ако ревнувате за доброто?

¹⁴А ако и страдате заради правдата, бидете блажени! „Не плашете се, ниту се збунувајте од нивните закани,”

¹⁵туку осветувајте Го во своите срца Христа како Господа, секогаш подготвени за одговор на секого, кој ја бара причината на надежта, која е во вас, но со кротост и со страв,

¹⁶имајќи добра совест, та оние кои го навредуваат вашето добро поведение во Христа, да се посрамат за она за што ве клеветат.

¹⁷Зашто е подобро, ако сака Божјата волја, да страдате правејќи добро, отколку правејќи зло.

¹⁸Зашто и Христос умре еднаш за гревовите, Праведен за неправедните, за да нè приведе при Бога; навистина, Тој, Кој беше убиен во тело, оживе Духом;

¹⁹во Него, Тој отиде тогаш, и објави на духовите во Подземјето;

²⁰кои беа непокорни некогаш, кога Божјото трпение ги чекаше во Ноевото време, додека се градеше ковчегот, во кој само малку од нив, односно осум души, се спасија преку водата.

²¹Одговарајќи на оваа слика, крштавањето, - кое не е отстранувањето на телесната нечистота,- туку е одговор на добра совест кон Бога, сега и вас ве спасува, преку воскресението на Исуса Христа,

²²Кој е оддесно на Бога, откако отиде во небото, каде Му се покорија ангелите, и властите, и силите.