Read Библија, Константинов 1 Петар 4 Bible Online

1 Петар 4 - Библија, Константинов bible

1 Петар 4

¹И така, бидејќи Христос пострада во телото за нас, вооружете се и вие со истата мисла - зашто кој пострадал во тело прекинал од гревот,

²та останатото време на животот, во телото, да не го поминете според човечките страсти, туку според Божјата волја.

³Зашто доста е што во минатото време ја вршевте волјата на народите со тоа што живеевте во разврати, во страсти, во пијанства, во гозби, во опијанувања и во беззаконско идолопоклонство.

⁴Затоа сега и се чудат дека вие не трчате со нив во истата крајност на развратот, и ве хулат;

⁵тие ќе Му дадат сметка на Оној, Кој е готов да им суди на живите и мртвите.

⁶Имено, затоа им е проповедано Евангелието и на оние кои се сега мртви, за тогаш да беа судени по човечки во телото, а со духот сега да живеат според Бога.

⁷А крајот на сè е близу. И така, бидете разумни и бдејте во молитвите.

⁸Пред сè имајте постојана љубов меѓу себе, зашто љубовта покрива многу гревови.

⁹Бидете гостољубиви еден кон друг без негодување.

¹⁰Бидејќи секој од вас добил дар, служете си со него еден на друг, како добри домоуправители на многукратната Божја благодат.

¹¹Ако некој говори, нека зборува како Божји зборови; ако некој служи, нека служи како по силата, која Бог ја дава, за да се слави во сè Бог преку Исуса Христа, Кому Му припаѓаат славата и силата во сите векови. Амин.

¹²Возљубени мои, не чудете се на огненото испитување, што се појави меѓу вас, за да ве искуша, како да ви се случува нешто необично,

¹³туку, радувајте се дека соучествувате во Христовите страдања, за да можете да се радувате и да се веселите при откровението на Неговата слава.

¹⁴Блажени сте ако ви префрлуваат за Христовото име, зашто тогаш Духот на славата и Божјиот Дух почива врз вас. Вистина, - според нив, Тој е похулен, но според вас, Тој е прославен.

¹⁵Имено, никој од вас да не страда како убиец, или крадец, или злосторник или како оној, кој се меша во туѓи работи;

¹⁶но, ако страда како христијанин, да не се срами, туку да Го слави Бога со тоа име,

¹⁷зашто е време да почне судот од Божјиот дом; а ако почнува прво од нас, каков ли ќе им биде крајот на оние, кои не му се покоруваат на Божјото Евангелие?

¹⁸И „ако праведникот одвај се спасува, каде ќе се покажат безбожникот и грешникот?”

¹⁹Затоа и оние, кои страдаат по Божја волја, да Му ги предадат своите души на верниот Создател, правејќи добро.