Read Библија, Константинов 2 Петар 1 Bible Online

2 Петар 1 - Библија, Константинов bible

2 Петар 1

¹Симон Петар, слуга и апостол на Исуса Христа, до оние, кои преку правдата на нашиот Бог и Спасител Исус Христос ја примија истата скапоцена вера како и ние:

²благодат и мирот да ви се умножи во познавањето на Бога и Исуса, нашиот Господ.

³Бидејќи Неговата божествена сила ни подари сè што ни е потребно за живот и побожност, преку познавањето на Оној, Кој нè повика преку Својата сопствена слава и добродетел,

⁴со што ни се подарени скапоцени и најголеми ветувања, та преку нив да станете учесници во Божјата природа, откако и избегавте на расипаноста, која е во светот, преку сладострастието, кое владее во светот;

⁵заради тоа вложете ја сета ревност, и исполнете ја својата вера со добродетел, а добродетелта со знаење;

⁶а знаењето со воздржливост; а воздржливоста со трпение; а трпението со побожност;

⁷а побожноста со братољубие; а братољубието со љубов.

⁸Зашто, ако го имате сè тоа и тоа се умножува, не ве прави мрзливи и бесплодни во познавањето на нашиот Господ Исус Христос,

⁹но, кој го нема тоа, слеп е и кусоглед: зашто заборавил дека е очистен од своите стари гревови.

¹⁰Затоа, браќа, погрижете се уште повеќе да го зацврстите својот позив и избор. Имено, ако го правите тоа никогаш нема да се сопнете.

¹¹Зашто така ќе ви се даде изобилно влегување во вечното Царство на нашиот Господ и Спасител Исус Христос.

¹²Затоа ќе гледам секогаш да ве потсетувам за овие работи, иако вие ги знаете, и сте утврдени во сегашната вистина.

¹³Но сметам дека е право, додека сум во овој шатор на своето тело, да ве разбудувам со напомнување,

¹⁴зашто знам дека скоро ќе го оставам мојот шатор, како што ме извести за тоа нашиот Господ Исус Христос.

¹⁵А ќе настојувам вие, и по моето заминување, да си спомнувате секогаш за ова.

¹⁶Зашто кога ви ги објавивме силата и доаѓањето на нашиот Господ Исус Христос, ние не следевме лукаво измислени бајки, но станавме очевидци на Неговото величие.

¹⁷Зашто Тој прими од Бог Таткото чест и слава, кога од величествената слава Му дојде гласот: „Овој е Мојот возљубен Син, во Кого Ми е милината.”

¹⁸Ние го чувме гласот, кој дојде од небото, кога бевме со Него на светата гора.

¹⁹И така имаме поцврсто пророчко слово; а вие правите добро што внимавате на него, како на светило што свети во темно место, додека не осамне денот и Деница засвети во вашите срца.

²⁰Знајте го ова пред сè: ниедно пророштво во Писмото не може да се толкува како кој сака,

²¹зашто никогаш пророштвото не дошло од човечка волја, туку светите Божји луѓе зборувале носени од Светиот Дух.