Read Библија, Константинов 1 Јован 2 Bible Online

1 Јован 2 - Библија, Константинов bible

1 Јован 2

¹Дечиња мои, ова ви го пишувам за да не згрешите; и ако некој згреши, имаме Бранител при Таткото: Исуса Христа, Праведникот.

²Тој е жртва помирница за нашите гревови; не само за нашите, туку и за гревовите на целиот свет.

³И по тоа знаеме дека сме Го познале, ако ги пазиме Неговите заповеди.

⁴Кој вели: „Го познав”, а не ги пази Неговите заповеди, лажец е и вистината не е во него.

⁵А кој го пази Неговото слово, во него, навистина, љубовта кон Бога стигнала до совршенство. По тоа знаеме дека сме во Него.

⁶Кој вели дека останува во Него, тој треба да оди, како што одеше Тој.

⁷Возљубени, не ви пишувам нова заповед, туку старата заповед, што ја примивте од почеток; старата заповед е словото, што сте го чуле.

⁸Но сепак ви пишувам нова заповед; - и тоа е вистинско и во Него и во вас - зашто темнината поминува, а вистинската светлина веќе свети.

⁹Кој вели дека е во светлината, а го мрази својот брат, тој е досега во темнината.

¹⁰Кој го љуби својот брат останува во светлината и во него нема соблазан.

¹¹А кој го мрази својот брат во темнината е и во темнината оди, и не знае каде оди, зашто темнината му ги заслепила очите.

¹²Ви пишувам, дечиња, зашто ви се простени гревовите, заради Неговото име.

¹³Ви пишувам, татковци, зашто Го познавте Оној, Кој е од почетокот; ви пишувам вам, млади, зашто го победивте лукавиот. Ви напишав, дечиња, зашто Го познавте Таткото.

¹⁴Ви напишав, татковци, зашто Го познавте Оној, Кој е од почеток. Ви напишав, млади, зашто сте силни и зашто Божјото слово пребива во вас и зашто го победивте лукавиот.

¹⁵Не сакајте го светот, ниту она што е во светот. Ако некој го сака светот, љубовта од Бога Таткото не е во него,

¹⁶зашто сè што е во светот: - похотта на телото, похотта на очите и гордоста на животот, не е од Таткото, туку од светот.

¹⁷А светот поминува и неговата похот, а кој ја извршува Божјата волја останува довека.

¹⁸Деца, последен час е; и, како што сте чуле дека антихрист иде, така сега се подигнаа многу антихристи; по тоа знаеме дека е последниот час.

¹⁹Од нас излегоа, но не беа од нас, зашто ако беа од нас, ќе останеа со нас, туку требаше да се покаже дека не се сите од нас.

²⁰А вие имате помазание од Светиот и знаете сè.

²¹Не ви пишав како да не ја знаете вистината, туку зашто ја знаете и зашто ниедна лага не е од вистината.

²²Кој е лажецот, ако не оној, кој одречува дека Исус е Христос? Ова е антихрист - кој ги одречува Таткото и Синот.

²³Секој, што Го одречува Синот Го нема ни Таткото; кој Го исповедува Синот, Го има и Таткото.

²⁴Што чувте од почетокот тоа да остане во вас. Ако остане во вас она што го чувте од почетокот, и вие ќе останете во Синот и Таткото.

²⁵А ова е ветувањето што Тој ви го вети: вечен живот.

²⁶Ова ви го пишав заради оние, кои ве заведуваат.

²⁷А вие, во вас останува помазанието што го примивте од Него и не е потребно некој да ве поучува, туку како што Неговото помазание ве учи за сè, и е вистинско и не е лага, и како што ве научи, така останете во Него.

²⁸И сега, дечиња, останете во Него, за да имаме смела доверба кога ќе се јави Тој и за да не се засрамиме пред Него, при Неговото доаѓање.

²⁹Ако знаете дека Тој е праведен, знајте дека секој кој врши правда, е роден од Него.