Read Библија, Константинов 1 Јован 3 Bible Online

1 Јован 3 - Библија, Константинов bible

1 Јован 3

¹Гледајте каква љубов ни дал Таткото: да се наречуваме Божји деца. А тоа и сме! Затоа светот не нè познава нас, зашто не Го позна Него.

²Возљубени, сега сме Божји деца, и уште не се откри што ќе бидеме; но знаеме: кога ќе се открие ќе Му бидеме слични, зашто ќе Го гледаме Онаков Каков што е.

³И секој кој ја има оваа надеж во Него, се очистува самиот, како што е и Тој чист.

⁴Секој кој врши грев, врши и беззаконие; и гревот е беззаконие.

⁵И знаете дека Тој се јави за да ги отстрани гревовите, а во Него нема грев.

⁶Секој кој останува во Него, не греши; секој кој греши, не Го видел Него, ниту Го познал.

⁷Дечиња, никој да не ве заблудува. Кој врши правда праведен е, како што е Тој праведен.

⁸Кој врши грев од ѓаволот е, зашто ѓаволот греши од почетокот. Затоа се јави Божјиот Син, за да ги разурне делата на ѓаволот.

⁹Секој, Кој е роден од Бога не врши грев, зашто Неговото семе останува во него; и не може да греши, зашто е роден од Бога.

¹⁰По ова се познаваат Божјите деца и ѓаволските деца: секој, кој не врши правда и не го љуби својот брат, не е од Бога.

¹¹Зашто ова е веста што ја чувте од почеток: да се љубиме еден со друг!

¹²Не како што Каин беше од лукавиот и го уби брата си. И зошто го уби? Зашто неговите дела беа зли, а на брата му - праведни.

¹³Не чудете се, браќа, ако светот ве мрази.

¹⁴Ние знаеме дека преминавме од смртта во живот, зашто ги љубиме браќата. Кој не го љуби братот свој, тој пребива во смртта.

¹⁵Секој, кој го мрази својот брат, е човекоубиец, а знаете дека во ниеден човекоубиец не пребива вечен живот.

¹⁶По тоа ја познавме љубовта, што Тој го положи својот живот за нас; и ние сме должни да ги положиме своите животи за браќата.

¹⁷А кој има светски блага и го види брата си во немаштина, па го затвори своето срце кон него, како ќе остане Божјата љубов во него?

¹⁸Дечиња мои, да не љубиме со зборови или само со јазикот, туку во дело и вистина.

¹⁹По тоа ќе познаеме дека сме од вистината, па ќе ги увериме своите срца пред Него,

²⁰зашто кога нашето срце нè осудува, Бог е поголем од нашето срце и знае сè.

²¹Возљубени, ако срцето не нè осудува, имаме смелост пред Бога,

²²и што и да Го замолиме, примаме од Него, зашто ги пазиме Неговите заповеди и правиме што е благоугодно пред Него.

²³А Неговата заповед е оваа: да веруваме во името на Неговиот Син Исус Христос и да се љубиме еден со друг, како што ни заповедал.

²⁴И кој ги пази Неговите заповеди, останува во Него и Тој - во него. И по тоа знаеме дека Тој останува во нас: по Духот Кого ни Го дал.