Read Библија, Константинов Откровение 17 Bible Online

Откровение 17 - Библија, Константинов bible

Откровение 17

¹И дојде еден од седумте ангели, кои ги имаа седумте чаши, проговори со мене и рече: „Дојди да ти ја покажам пресудата на големата блудница, која седи на многу води,

²со која блудствуваа земните цареви, а жителите на земјата се напија од виното на нејзиното блудствување.”

³И ме одведе, во духот, во пустината: и видов жена како седи на црвен ѕвер, кој беше полн со богохулни имиња и имаше седум глави и десет рогови.

⁴А жената беше облечена во пурпурно и во црвено, и украсена со злато и со скапоцени камења и со бисери, држејќи во својата рака златна чаша, полна со гнасотија и нечистота од нејзиното блудство,

⁵на челото пак и беше напишано име - тајна: големиот Вавилон, мајка на блудниците и на земните гнасотии.

⁶И ја видов жената како се опива со крвта на светите и со крвта на Исусовите сведоци. И се зачудив многу кога ја видов.

⁷И ангелот ми рече: „Зошто се чудиш? Јас ќе ти ја кажам тајната на женава и на ѕверот, кој ја носи и има седум глави и десет рогови.

⁸Ѕверот, што го виде, беше и го нема, и ќе излезе од Бездната за да отиде во пропаст. И ќе се зачудат земните жители чие име не е запишано, од создавањето на светот, во Книгата на Животот, кога ќе видат дека ѕверот беше и го нема, иако тој е.

⁹Тука е умот, што има мудрост! Седумте глави - тоа се седумте гори, врз кои седи жената.

¹⁰Тоа се и седум цареви, од кои петмина паднаа, едниот е, а другиот уште не дошол, а кога ќе дојде, треба да остане малку.

¹¹Ѕверот, пак кој беше и кого го нема, е осми, и е од седумте, па оди во пропаст.

¹²И десетте рогови, што ги виде, тоа се десет цареви, кои уште не зацаруваа, но ќе ја примат царската власт со ѕверот за еден час.

¹³Овие се истомисленици, па ќе му ја предадат својата сила и власт на ѕверот.

¹⁴Овие ќе војуваат против Јагнето, но Јагнето ќе ги победи, зашто Тој е Господар над господарите и Цар над царевите, а со Него се повиканите, избраните и верните.

¹⁵И ми рече: „Водите што ги виде, каде што седи блудницата, тоа се луѓето и множествата, народите и јазиците.

¹⁶И десетте рогови, што ги виде, и ѕверот, тие ќе ја замразат блудницата и ќе ја направат пуста и гола, и ќе и го изедат месото, и ќе ја изгорат со оган,

¹⁷зашто Бог им даде во нивните срца да ја исполнат Неговата замисла, да дејствуваат едномислено и да му го дадат своето царство на Ѕверот, додека не се исполни Божјото слово.

¹⁸А жената, која ја виде, е големиот град, кој царува над земните цареви.”