Read Библија, Константинов Откровение 21 Bible Online

Откровение 21 - Библија, Константинов bible

Откровение 21

¹И видов ново небо и нова земја, зашто првото небо и првата земја поминаа и море немаше веќе.

²Тогаш јас, Јован, го видов Светиот Град - Новиот Ерусалим, како слегува од небо, од Бога, стокмен како невеста, која е украсена за својот маж.

³И чув силен глас од небото, велејќи: „Еве го Божјиот Шатор меѓу луѓето; и Тој ќе живее со нив, и тие ќе бидат Негов народ, и Самиот Бог ќе биде со нив,

⁴и ќе ја избрише секоја солза од нивните очи, и смрт нема да има веќе, ни тага, ни плач, ниту болка, зашто првото помина.

⁵И Оној, Кој седи на престолот рече: „Ете, правам сè ново.” Уште рече: „Напиши, зашто овие зборови се верни и вистинити!”

⁶И ми рече: „Се заврши! Јас Сум Алфа и Омега; Почеток и Свршеток. Јас ќе му дадам на жедниот, дарум, од изворот на водата на животот.

⁷Кој победува го наследува ова, и Јас ќе му бидам Бог, и тој ќе ми биде син.

⁸А на страшливците и на неверните, и на гнасните и на убијците, и на блудниците и на вражалците, и на идолопоклониците и на сите лажци, нивниот дел им е во езерото, кое гори со оган и сулфур; тоа е втората смрт.

⁹И дојде еден од седумте ангели, кои имаа седум чаши, полни со последните седум зла, и проговори со мене и рече: „Дојди, да ти ја покажам невестата - жената на Јагнето!”

¹⁰И ме одведе духом на голема и висока гора и ми го покажа светиот град Ерусалим, како слегува од небото од Бога

¹¹и имаше Божја слава, и нејзината светлина беше слична на многу скапоцен камен, на кристално проѕирниот камен јаспис.

¹²Имаше голем и висок ѕид со дванаесет порти, а на портите дванаесет ангели и напишани имиња, а тоа се имињата на дванаесетте племиња на Израелевите синови.

¹³Од исток три порти, и од север три порти, и од југ три порти, и од запад три порти.

¹⁴А градскиот ѕид имаше дванаесет основи и на нив дванаесет имиња на дванаесетте апостоли на Јагнето.

¹⁵А оној, кој зборуваше со мене имаше златна трска, за да го измери градот и нејзините врати и нејзиниот ѕид.

¹⁶Градот пак лежи четриаголно, а должината му е колку и широчината. И го измери градот со трската: дванаесет илјади стадии; нејзиниот должина и широчина и височина беа еднакви.

¹⁷И го измери неговиот ѕид: сто четириесет и четири лакти по човечка мерка, која е и ангелска.

¹⁸Нејзиниот ѕид беше изграден од јаспис, а градот од чисто злато, како чисто стакло.

¹⁹Основите на градскиот ѕид беа украсени со секаков вид скапоцени камења: првата основа е од јаспис, втората - сафир, третата - халкидон, четвртата - смарагд;

²⁰петтата - сардоникс, шестата - сард, седмата - хрисолит, осмата - вирил, деветтата - топаз, десеттата - хрисопрас, единаесеттата - хијацинт; дванаесеттата - аметист.

²¹А дванаесетте порти: дванаесет бисери; секоја врата беше од еден бисер. И градската улица беше од чисто злато како проѕирно стакло.

²²А храм не видов во него; зашто негов храм е Господ Бог - Сèмоќниот, и Јагнето.

²³И на градот не му е потребно сонцето, ниту месечината, за да му светат, зашто Божјата слава го осветлува, а Јагнето му е светилник.

²⁴И народите на оние кои се спасени ќе одат во неговата светлина, и земните цареви ќе ја донесат својата слава во него.

²⁵И нејзините порти нема да се затвораат дење, зашто не ќе има ноќ таму.

²⁶И славата и честа на народите ќе бидат донесени во него.

²⁷И во него нема да влезе ништо нечисто, ни оној, кој прави нешто гнасно и лажно, туку само оние, кои се запишани во Јагнетовата книга на животот.