Read Библија, Константинов 1 Самоилова 8 Bible Online

1 Самоилова 8 - Библија, Константинов bible

1 Самоилова 8

¹Кога Самоил остаре, ги постави своите синови за судии во Израел.

²Неговиот првороденец се викаше Јоил, а вториот син Авија; тие беа судии во Вирсавеа.

³Ама синовите не одеа по татковите стапки: гледаа на својата печалба, примаа поткуп и ја извртуваа правдата.

⁴Тогаш се собраа сите израелски старешини и дојдоа кај Самоила, во Рама.

⁵И му рекоа: „Ете ти остаре, а твоите синови не одат по твоите стапки. И така, постави ни цар да владее над нас, како што е тоа кај сите народи.”

⁶Ама на Самоила не му беше мило дека рекоа: „Дај ни цар да владее над нас!” Затоа Самоил Му се помоли на Господа.

⁷А Господ му рече на Самоила: „Послушај го гласот на народот во сè што бараат од тебе, зашто не те отфрлија тебе, туку Ме отфрлија Мене, не сакајќи Јас да царувам над нив.

⁸Сè што Ми правеа Мене, од оној ден кога ги изведов од Египет па до денешниот ден - Ме оставија Мене и им служеа на туѓи богови - тие ти прават така и тебе.

⁹И така, сега послушај го нивното барање, но опомени ги свечено и поучи ги за правата на царот, кој ќе владее над нив.”

¹⁰Самоил му ги повтори сите Господови зборови на народот, кој бараше цар од него.

¹¹И рече: „Ова ќе биде правото на царот кој ќе царува над вас: ќе ги зема вашите синови за да му служат кај бојните коли и кај коњите, и тие ќе трчаат пред неговите бојни коли.

¹²Ќе ги поставува за илјадници за педесетници; тие ќе ја ораат неговата земја, ќе ја жнијат неговата жетва, ќе му изработуваат бојно оружје и опрема за неговите бојни коли.

¹³Царот ќе ги зема вашите ќерки за да му прават мирисливи масти, да бидат готвачки и пекарки.

¹⁴Ќе ги земе вашите најдобри ниви, вашите лозја и вашите градини со маслинки и ќе им ги подарува на своите дворјани.

¹⁵Ќе зема десеток од вашите посеви и од вашите лозја и ќе им го дава на своите дворјани и на своите службеници.

¹⁶Ќе ги зема вашите слуги и вашите слугинки и вашите најдобри волови и ослиња, и ќе ги употребува за своја работа.

¹⁷Ќе зема десеток од вашиот ситен добиток, а вие самите ќе му станете робови.

¹⁸И кога еден ден ќе викате за помош заради царот, кого што го избравте сами, Господ нема да ве послуша во оној ден!”

¹⁹Народот не сакаше да го послуша Самоиловиот глас, туку рече: „Не! Сакаме цар да владее над нас!

²⁰Така и ние ќе бидеме како сите народи: ќе ни суди наш цар, ќе ни биде водач и ќе ги води нашите војни.”

²¹Кога Самоил чу што зборува народот, Му кажа сè на Господа.

²²А Господ му рече на Самоила: „Послушај ја нивната желба и постави им цар!” Тогаш Самоил им рече на Израелците: „Вратете се секој во својот град!”