Read MMA SHIYYA Matayo 14 Bible Online

Matayo 14 - MMA SHIYYA bible

Matayo 14

¹Feeri filya llyo mangi Herode andeita mboni ta Yesu tiirerwaa. Kaia vaṛundi vamwi:

²Uu yye Yohane mbatisa. Anduka kwa vafu. Nkyo kikangio katana findo fi finini.

³Amu Herode eemmaa iwara Yohane kanrwaa kifingyoń kiimba kya Herodia eekee nka wa mwanamae Filipo.

⁴Fulya Yohane amwia: Nkisumani kumwore ndi. Nae eefuriee iwwaa, kake kaeṛea vandu, amu valolya sheeli Yohane mmwauya kisuku.

⁶Neeli undefika nkonu nnini wa ikumbua iiriwa lya Herode, mwana ulya wa sambuṛa wa Herodia kaara mbele ya vandu na yara lyamwi likasenya Herode.

⁷Nae kanrekya eelyaa ikite kindo kyoose anterevaa anniingaa na kikava ki.

⁸Nae kiimba kya yaywa mmae kanumbua: Shiniinga nrwe wa Yohane mbatisa wekeṛe ia kyaashoń.

⁹Na mangi kaṛiika. Kake kiimba kya ilya ikite mbele ya vandu valya eekee nawo shoongeń kavavasa andeniingwa.

¹⁰Karuma nndu kandeminya nrwe wa Yohane kulya kifingyoń.

¹¹Nrwe wamwi ukanndwa ukee kyaashoń. Ukaniingyo sambuṛa ilya. Nae kawaria karwaya mae.

¹²Vanalosho vamwi vakasha vakandeimboo nnyińa ulya vakandeuṛika. Vakaenda vakafitya Yesu mboni.

¹³Neeli Yesu andeita kuro, kakwimboo kaaṛukya ngalaveń kafika kyaanya kyamwi muni andu atawore vandu. Neeli syamu ya vandu indeita, vakansoṛa na marende kuuka miṛiń yawo.

¹⁴Yesu kasomuka kalolya vandu kinga veensheaa. Kavavaviywa mmuu kavakiṛya vandu vawo valole.

¹⁵Neeli kundeva ukwawuń, vanalosho vamwi vakanshea vakanumbua: Ia tikai mbateń shuumu na saa ta nsanyiń tamiira. Vikya vandu va kana vaende miṛiń yawo vandeuṛa-fo shoonga.

¹⁶Yesu kavaia: Vaendaa are? Vaniingeń ini shoonga!

¹⁷Nawo vakanumbua: Nta kindo toore ia kitaare mmikate iraanu na makunga avili tubu.

¹⁸Nae kavaia: Sheeridyeń findo fo na ia!

¹⁹Kavavasa vandu vakaariswa rembo ifo maṛeń. Kawaria mikate ilya iraanu na makunga alya avili. Kalla iṛuvewu kaana Iṛuva. Kafukyafukya mikate ilya kaniingya vanalosho na vanalosho vakandeavya vandu.

²⁰Vakalya woose vakawuura. Vakaitiṛimu fibeṛeshu filya findesaa fikaishua mikusha ikumi na ivili.

²¹Na valya vandelya wwomi veefikyee fiku firaanu vateefo vaka na vana.

²²Kyasia Yesu kaitika vanalosho vamwi vaaṛukye ngalaveń vaire mbele yamwi vaṛuke kwa kulya, kumande ye amaa ilakana na syamu ilya ya vandu.

²³Neeli andemaa ilakana na vandu, kasaama uroń kandeterevya-fo akee kyaanya kyamwi. Kakaa-fo ye muni kumande kwaila.

²⁴Neeli ngalava indefika karikari, ikaatarwa nnu nnruva, fulya ikee ikwola kiimba kya mburaato.

²⁵Neeli kindefika ikamba lya kaani lya iringa kio, Yesu kavashea eendaa na marende kwa ule ya nruva.

²⁶Neeli vanalosho vandellolya eendaa na marende kwa ule ya nruva, vakataṛaaka vakanumbua: Nkiṛishwe. Vakaishiṛa kiimba kya weṛei.

²⁷Lia eni Yesu karera nawo kavaia: Uywań mmuu! Nniń, manya mutaeṛee!

²⁸Petiro kamwaṛua kamwia: Nndumi, kwakooya ni iwe, shivavasaań nshe na ifo kukai niiraa kwa ule ya nruva.

²⁹Nae kamwia: Oṛesho! Petiro kaoloka ngalaveń kaenda na marende kwa ule ya mura eeshaa na kulya Yesu akai.

³⁰Kake ili andelolya mburaato, kaeṛea. Kabooka yoloka nruveń kaṛoṛongya eereraa: Nndumi shikiṛa!

³¹Lia eni Yesu kasaaṛa uko kawwara. Kamwia: Iwe nndu wa ikusura yaangu, naamu ki ili kwanunua nrwe?

³²Neeli vandeaṛukya ngalaveń, mburaato ikamanda.

³³Na valya veekee ngalaveń vakawwoya veenumbuaa: Nkya dede iwe kukee Mwana wa Iṛuva.

³⁴Neeli vandemaa iṛuka kwa kulya, vakafika urukefi lwa Genesareti.

³⁵Na veni va uruka lo ili vandemanya yye, vakaruma vandu vaende kulya kwifwitanii na muungo wawo woose. Vakamwendye woose valole.

³⁶Vakantereva vabaani nkyendu wa nseto wamwi da. Na valya woose vandebaana vakava vesha deń.