Read MMA SHIYYA Matayo 17 Bible Online

Matayo 17 - MMA SHIYYA bible

Matayo 17

¹Ili indesia mikonu irindaru, llyo Yesu akurika Petiro na Yakobo na Yohane mwanawo kavarosa na uroń waasha vakakaa-fo kyaanya kyawo wo veni.

²Lia eni kailashika fwana yamwi mbele yawo. Kisangu kyamwi kikakalakala sha mwi muni na miseto yamwi ikava myeelwa fyu sha saa sheni.

³Lia eni vakalolya Mose na Elia vashe na-wo veereraa na Yesu.

⁴Llyo Petiro aia Yesu: Nndumi, neendo ise tikee kunu. Kwakunda ntanaa matengo araru, limwi lyafo na lya Mose limwi na lya Elia limwi.

⁵Ili eereraa kuro, lia eni iṛumbe likasha liivaramaa likavaendye nruve. Na ununga lukauka iṛumbeń lia lwireraa: Uu mMwama wakwa ninkundye nammusaua. Uu yye mumwaranyaa!

⁶Ili vanalosho vandeita ununga lua, vakawa si na fisangu vakaeṛea nnu.

⁷Nae Yesu kavaserikya kavabaana kavaia:

⁸Kwimbooń mutaeṛee ndi! Ili vandeimboo miso awo na ule, vakilolya-wo nndu kita Yesu ye muni ndi.

⁹Ili veeolokaa uroń, Yesu kavavavasa kavaia: Kilya mwallolya mutaongoye nta nndu. Mukifise siń kumande kyeeri kilya Mwana wa nndu amaa iṛuka kwa vafu.

¹⁰Vanalosho vamwi vakamwuṛa veenumbuaa: Niikai kikeeń are, ili vaaṛia va mitisiṛie vanumbuye: Elia kyawara abooke isha mbele?

¹¹Yesu kaaṛua kavaia: Elia isha ashaa avaue findo foose fishie sha mbele.

¹²Kake niń namuia: Elia ammaa isha nta vammanyi. Vakantanya sheeli vakundye.

¹³Na Mwana wa nndu nkuro da kyawara aliswa ukiva wwo. Llyo vanalosho vamwi vamanya, sheeli arera mboni ta Yohane mbatisa.

¹⁴Neeli vandefika andu syamu ya vandu ikai, nndu umwi kanshea kafwiṛya nri si mbele yamwi eemwiaa:

¹⁵Nndumi, lilya mwana uu wakwa, amu aworwa nsaka ya usukwa. Amu akee ivavyo nnu. Amu keengi na keengi lukee imweeṛa muroń na keengi kawa kirayoń.

¹⁶Nań namwendee vanalosho vafo, nawo nta imakii inkiṛa.

¹⁷Yesu kaaṛua kanumbua: Ini ufwari lutakusurye na lwirye mbaai, nkaa neeni kumande iri ki? Mmusisirye kumande kwi? Munndeń na ia nkai!

¹⁸Yesu kanaya mumuyo ulya nkasha, nato ukamwuka. Na mwana ulya kava nsha kyeeri kilya kyeni.

¹⁹Kyasia vanalosho vakashea Yesu akee kyaanya kyamwi vakanumbua: Naamu ki ili ise kitaare tamakii yuumbuta?

²⁰Yesu kavaia: Nkiimba kya ikusura lyanu likee yaangu. Amu namuia kya dede: Kwakooya mwaira ikusura na likava yaangu sha mbekye ya nri wa nkuu, muiaa uro lu: Kwimboo ia kwende kulya! Nalo luukaa-wo. Amu nta kiifo kindo mutamakii ndi.

²¹Amu mumuyo nkasha wa mikae ii uukaa ndi kita kwa kiterewo na isinda kuro.

²²Neeli veekee kulya Galilaya veeṛuaṛuaa-fo, Yesu kavaia: Mwana wa nndu arambikyoo maakoń a vandu.

²³Nawo vawwaa na nkonu wa kararu aṛutwaa. Nawo vakafikwa nndewu nnu.

²⁴Neeli vandefika Kaperinaumu, vandu va isana kyaalo kya numba ya Iṛuva vakashea Petiro vakanumbua: A llosha wanu ataa kyaalo ikyo ndi? Kanumbua: Ee ataa.

²⁵Neeli andeaka numba, Yesu kabooka imwuṛa eenumbuaa: Kulolye are, Simon? Mamangi a isanga auṛaa kyaalo ana walyo vanduń vangava? Vvaniń vawo ana kwa vengi?

²⁶Nae ili andenumbua: Nkwa vengi, Yesu kamwia: Kyasia kwakooya nkuro, vana waotoṛe.

²⁷Kake ise manya titavakangye vaute nsindaṛa kweru. Kyasia kwimboo enda kulya nruveń kwaolota-fo kiminya kya iwara makunga. Na ikunga lyo kubookaa ifiwara kuliimboo kulitaṛambue kana kayo, llyo kukooyaa-fo fesa imwi ya uuru. Iwara kuvaniingye ive kyaalo kyakwa na kyafo.