Read MMA SHIYYA Matayo 18 Bible Online

Matayo 18 - MMA SHIYYA bible

Matayo 18

¹Kyasia saa ilya sheni vaseṛo valya va Yesu vakasha na io akai vakamwuṛa veenumbuaa: Nuungau akee nnini ifo umangiń lwa iṛuvewu?

²Nae kavaanga kamwana io akai kanseṛeesa kari kawo.

³Kanumbua: Nkya dede namuia: Kwakooya kitaare mweelashika muve va mikae ya fivana, nta mwakaa ifo umangiń lwa iṛuvewu kutu ndi.

⁴Kyasia ulya woose akunyiisaa ye muni ave wa mikae ya kamwana sha ika, ito yye avaa nnini umangiń lwa iṛuvewu.

⁵Na nndu awariaa kamwana sha ika akuvavye nań, anshiwaria niń.

⁶Kake ulya akasheesaa iva vannya na akwaa ni umwi tubu, kyawara afingyo isewe sungoń yamwi na yeeṛwa eeṛwa kirunduminy kya nruva.

⁷Ushi isanga kiimba kya misindaṛa iifo. Kyawara misindaṛa ive-fo, kake ushi nndu ulya ainnde.

⁸Na kwakooya uko lwafo ana urende lwafo fikwendee misindaṛa, fiminyi-fo kwalikumba neefo! Llyo ńwana ifika muuń kukee kisaya kitawore uko ana urende, kita ifi kuvaa na maako avili ana marende avili kweeṛwa muroń utakisiaa.

⁹Na kwakooya iriso lyafo fikwendee nsindaṛa, liiṛue-fo kwalikumba neefo. Llyo ńwana ifika muuń kukee ndoń, kita ifi kuvaa na miso avili na numa kweeṛwa iriniń lya muro.

¹⁰Lleń nnu kaaṛa mutaile nta umwi wa iva vakee vannya! Nań namuia: Vamalaika vawo ifo iṛuvewu vakee illa kisangu kya Nde yakwa wa iṛuvewu mikonu yoose.

¹¹Amu Mwana wa nndu andesha ishekiṛa kilya kirekye.

¹²Mwalolya are? Kwakooya eefo nndu awore mburu iyana na imwi ikareka-wo, nae are atatia-wo tilya makumi kyeenda na kyeenda ifo fiduruń na yenda eende andeṛuya ilya irekye?

¹³Ikava bule yamwi kaikooya, nkue namuia kya dede, afuraa kya mmwasi kita tilya makumi kyeenda na kyeenda titarekye.

¹⁴Mfo kuro kikai na mbele ya Nde yanu wa iṛuvewu, nae da akundye nta umwi wa iwo vannya vareke ndi.

¹⁵Mwanamae wafo kankurekyo, anderereń muli vavili kyaanya kyanu. Kakwirikya, kyankuvia bule, kwankooya lingi mwanamaa.

¹⁶Kallea ikwirikya, enda na nndu umwi ana vavili, naamu kindo kyoose kirerwa vvandu vavili ana vararu.

¹⁷Kallea iirikya iwo, enda andeongoya siṛi. Kallea iirikya na siṛi deń, akuvie sha muyavaṛumu ana nsańiṛya kyaalo.

¹⁸Nkue namuia: Kindo kyoose mwankifinga kunu isangeń, na kulya iṛuvewu kyammaa ifingwa. Na kindo kyoose mwankiboṛomua kunu isangeń, na kulya iṛuvewu kyamboṛomulwa.

¹⁹Lingi namuia: Kindo kyoose vaaroe vanu vavili kunu isangeń vanrekyana ikitereva kwa Iṛuva, vaniingwaa nNde yakwa akee iṛuvewu.

²⁰Amu alya vandu vavili ana vararu vakusaandi vakuvavye na irina lyakwa, wwo nań nkaa karikari kawo.

²¹Llyo Petiro anshea kamwia: A le Nndumi, nsha keenga mwanamae wakwa ashirekyoe niillilyaa? Nkamfungare naań?

²²Yesu kamwia: Nakwia: Nkamfungare da ndi, kake llilye kamakumi mfungare kamfungare.

²³Amu na akwaa ni Iṛuva atanaa kuro da. Ye avakye mangi ya vandu kunu isangeń yafura itala sile tamwi na vaṛundi vamwi tilya eewaakuyaa.

²⁴Ili andebooka itala, kaendewa umwi eeworee sile ya rupia mayana mayana.

²⁵Ili nsile ulya atuṛa kya intaa, mangi ikavavasa: Akumbwa ye na nka wamwi na vana vamwi na foose awore, amu sile yakwa itaike.

²⁶Nsile ulya kawwoya ṅundeń kaiya nae eemwiaa: Anna Mbee, shirwaa mbuṅṅwa Mbee, nkaa nkutaa!

²⁷Ili mangi indella kasa akee iiyaiya nae kuro, ikamwiria ndewu ya makyema kamwotoṛa kantia na sile ilya yoose deń.

²⁸Kyasia ili nsile ulya andesomuka kaenda kandekwania na ndundi ungi veeṛundaa andu emwi kulya kwa mangi eemmwakuyaa rupia iyana limwi. Kantambukya kawara kanrwa uṛoo kamwia: Shitaa sile ilya yakwa nnu da!

²⁹Nndu ulya kawwoya ńundeń kaiyaiya nae eemwiaa: Anna Mbee, shirwaa mbuṅṅwa, nkaa nkutaa da!

³⁰Nae kalea fukyu kankurika kandenrwaa kifingyoń kumande amaa itaa sile ilya yamwi yoose.

³¹Neeli vaṛundi valya vengi vandelolya kilya nsile ulya andetanya ulya ungi, vakaṛiika koṛoń vakandeongoya mangi filya foose findeva.

³²Na mangi kawaanga kamwia: Iwe kukee nndu nkasha kutu. Lia kwiyaiya nań, nakutia sile ilya yakwa iifilee fulya se?

³³A iwe kyeenkuwaraa se kulilye nndu ito ungi sha lia niń nndekulilya?

³⁴Llyo nndumi wamwi atuṛuka nnu kanrambikya ngyama yamwi kumande amaa itaa sile ilya yoose.

³⁵Na Yesu kanumbua: Mfo kuro Nde yakwa wa iṛuvewu amutanyaa da neeni, kwakooya kitaare mukutiyanaa mareko anu na ngoo toore witanu ini mu veni na mu veni.