Read MMA SHIYYA Matayo 2 Bible Online

Matayo 2 - MMA SHIYYA bible

Matayo 2

¹Ili Yesu airiwa kulya Betileemu ya uruka lwa Yudaya kyeeri kya mangi Herode, vandu vaanga vakasha vauka kulya taari ya ngama vakafika kulya Yerusalemu vakanumbua:

²Mangi uu wa Vayuda andeiriwa alli nkwi akai? Fulya tallolia nyinyiri yamwi kulya taari ya ngama, neese tansha imwitikisa.

³Kyasia ili Herode andeita mboni ii, kataṛaaka andu emwi na va Yerusalemu woose.

⁴Kavaanga vakohani vanini woose na vaaṛia va vandu va mitisine kavasokoda nnu mboni ta Kristo kundo awonikyaa nkwi?

⁵Nawo vakamwia: Nkulya Betileemu ya kunu Yudaya. Amu nkuro kyeentisiṛwaa mmwauya kisuku ulya:

⁶Nawe Betileemu ya uruka lwa Yuda, kukee munnya kari ka miri ya Yuda kutu ndi, amu kwafo mfo aukaa ulya ashiliaa vandu vakwa va Isiraeli.

⁷Kyasia Herode kavaanga vaanga valya kiṛisiń kavauṛa kyeeri nyinyiri ilya indebooka ilolyo. Kavaotoṛa vaende Betileemu. Kavaia: wareń shia mwende kulya Betileemu mundeuṛa nnu mboni ta mwana ulya. Mukammaa illolia sheendień mboni, amu nań neende nndemwitikisa.

⁹Neeli vandemaa iita firero fa mangi, vakawara shia. Lia eni nyinyiri ilya vandellolia kulya taari ya ngama ikavairia mbele, kumande indesalalaa kwa ule ya numba ilya mwana ulya akai.

¹⁰Neeli vandelolia nyinyiri ilya, vakafura nnu.

¹¹Vakaaka kulya numba vakalolia mwana andu emwi na Maria mae wamwi. Vakawwoya vakamwitikisa. Vakaboṛomua mikusha yawo vakanniinga masaa, nsaabu na findo fa kisaamu.

¹²Neeli vandemaa iikimbwa ni Iṛuva yorień sheeli vatakyuye lingi na kwa Herode, vakauya kyeń kwawo na shia ingi.

¹³Kyasia ili vaanga valya vandekwimboo vakaenda kyeń kwawo, llyo malaika wa Nndumi ashea Yosefu yorień kamwia: Kwimboo kurike kimwana ki na mae kurishie kulya Misiri, kundekaa-fo kumande nkwiaa. Fulya Herode akee iṛuya kimwana kyo akiwaa.

¹⁴Nae kakwimboo kakurika kimwana kilya na mae kio kilya kyeni. Karishia kulya Misiri

¹⁵kakaafo kumande Herode amaa ifwa. Nakyo kikava, amu kifike kilya kindererwa ni Nndumi na kana ka mwauya kisuku ulya eenumbuaa: Nkulya Misiri navvanga Mwana wakwa.

¹⁶Kyasia ili Herode andemanya allembwa waanga valya, katu-ṛuka nnu. Karuma vaseṛo vandewaa vana woose va kulya Betileemu na miyanuń vamae myaka ivili na valya vakiseere kisumani na kyeeri kilya andesokoda kwa vaanga valya.

¹⁷Llyo kikava, amu kifike kilya kyeenrerwaa mmwauya fisuku ulya Yeremia eenumbuaa:

¹⁸Kiifo kiṛoṛongyo kya kiiyo kulya Rama, nkiiyo na ikwalaala lya ukiva. Raeli akee ililia vana vamwi kakumba na ngoṛu nta ikunda ilembwalembwa, fulya vatakiifo.

¹⁹Ili Herode andemaa ifwa, llyo malaika wa Nndumi ashea Yosefu yorień kulya Misiri kamwia:

²⁰Kwimboo kukurike kamwana ko na mae kuuye kulya urukeń lwa Isiraeli. Fulya valya veefuriee iwaa kamwana vammaa ifwa.

²¹Nae kakwimboo kakurika kimwana kilya na mae kio kilya kyeni kauya urukeń lwa Isiraeli.

²²Kake ili andeita ni Arikelao akee mangi ya kulya Yudaya andu a ndee Herode, kaeṛea yenda-fo. Kaoruswa ni Iṛuva yorień kaenda alya muungoń wa Galilaya.

²³Kasamia kulya kweni muṛiń ulya wivaangwaa Nasareti. Nakyo kikava, amu kifike kilya kyeenrerwaa waauya fisuku veenumbuaa: Avaangwaa nndu wa Nasareti.