Read MMA SHIYYA Matayo 20 Bible Online

Matayo 20 - MMA SHIYYA bible

Matayo 20

¹Umangi lwa iṛuvewu luvakani na nndumi andekwimboo ngama aṛuye vandu va indundya nremiń yamwi.

²Ili andemaa irekyana na vaṛundi, nkonu umwi nshilingi, kavarwaa nremiń yamwi.

³Kakwimboo lingi kyeeri kya saa isaru kalolya vengi veeselelee soṛeń kitaare veeworee mashoṛa.

⁴Kavaia: Neeni endeń nremiń yakwa, na maṛe anu mmuniingaa sheeli kisumani. Nawo vakaenda.

⁵Kakwimboo lingi kyeeri kya saa isasaru na kya saa kyeenda katana sha lia.

⁶Ili andekwimboo kyeeri kya kyoṛuuva, kakooya vengi veeselelee vataare mashoṛa kavaia: Nki ili muselele kunu nsanyiń uu woose kitaare mukee iṛunda:

⁷Vakamwia: Eefo nndu antivaanga ndi. Kavaia: Neeni endeń nremiń yakwa.

⁸Ili kundeila, nndumi ulya kaia nshili wamwi: Vaanga vaṛundi valya kuvaniinge maṛe awo. Kubooke iniinga valya vafurumya isha kumande valya vabooka isha.

⁹Kyasia valya vandevaangwa kyeeri kya kyoṛuuva vakasha vakaniingwa maṛe awo nndu woose shilingi yamwi.

¹⁰Ili valya va mbele vandesha, vakakusaṛa vaniingwaa kya mmwasi. Nawo vakaniingwa maṛe awo nndu woose shilingi yamwi da.

¹¹Ili vandewaria shilingi yo sheni, vakańuńurya nndumi ulya vakanumbua:

¹²A le mbee, iva va numa vandunda mashoṛa saa imwi tubu se? Ili iwe kwaveeńańanisa neese tandunda mashoṛa na nrike nsanyiń woose.

¹³Karerya umwi wawo kamwia: Ndoo yakwa, nankulemba ndi. Teenrekyanaa shilingi se?

¹⁴Wariań kilya kikee kyafo kwende kyeń kwafo! Mfurie iniinga uu wa numa kiińańiani na kyafo.

¹⁵Ana mmakii itana na masaa akwa sheeli mfurie se? Ana kwashiirya iriso, fulya niń noore maako?

¹⁶Na Yesu kaia vandu: Kyasia valya va numa vavaa va mbele na valya va mbele vave va numa. Amu valya vakee vavaange vveengi, kake valya vasaulwaa vvaangu.

¹⁷Neeli Yesu eekee irwa eendaa Yerusalemu, kakurika vanalosho valya ikumi na vavili kyaanya kyawo. Neeli veekee shień, kavaia:

¹⁸Lleń tikee irwa na ule Yerusalemu, na Mwana wa nndu arambikyoo maakoń a vakohani vanini na vaaṛia va mitisine, nawo vamwumisyaa awalwa.

¹⁹Nawo vanrwaa maakoń a vayavaṛumu vanteende na inkaba na ngova na inkabya nsalabeń. Na nkonu wa kararu aṛukaa.

²⁰Llyo ashewa mmae wa vana va Sebedayo andu emwi na vana vamwi. Kawwoya eenterevaa kindo.

²¹Nae kamwia: Nkiki kufurie? Kamwia: Numbua, vana va vakwa vavili vakaa umwi taari ya uko usha lwafo na ungi taari ya uko umbuyo lwafo ifo umangiń lwafo.

²²Yesu kaaṛua kanumbua: Mwishi kilya mukee itereva ndi. A naań, mumakii inwa umbata lu niń nnwaa? Vakamwia: Timakii da.

²³Nae kavaia: Inwa umbata lwakwa munwaa da. Kake irwaa vandu taari ya uko usha lwakwa na uko umbuyo lwakwa iwo mmashoṛa akwa ndi. Vandu vaniingwaa vvalya vammaa ideeṛyo nNde yakwa.

²⁴Na valya ikumi ili vandeita, vakatuṛukya valya vavili.

²⁵Na Yesu kavavaanga io akai kavaia: Mwishi sheeli iwo vashilyaa vandu vashilyaa na finya. Na vanini vawo vakavalamya.

²⁶Kake kari kanu ini kitave kuro. Kake ulya woose, afurie iva nnini kwanu, ave mumuṛundya.

²⁷Na ulya woose, afurie iva wa mbele kwanu, ave iketi lyanu.

²⁸Sheeli na Mwana wa nndu atashe, amu aṛundyo, kake ashe aṛundye vengi na iniingya muu wamwi, amu uve kirasyo kya veengi.

²⁹Neeli eeukaa kulya Yeriko, isyamu iingi likansoṛa.

³⁰Neefo mfo midoń ivili iikee rembo mbaai ya shia. Neeli vandeita, sheeli Yesu akee iira, vakarosa ngyununga tawo veenumbuaa: Wui Nndumi Mwana wa Davidi, tililye!

³¹Isyamu lia likavanaya vasie do. Kake wo vakaengeṛya irosa ngyununga tawo veenumbuaa: Wui Nndumi Mwana wa Davidi, tililye!

³²Yesu kasalala kavavaanga kavaia: Mufurie mmutanye ki?

³³Vakamwia: Nndumi, tifurie miso eru alolye.

³⁴Yesu kavavavyo mmuu kavabaana miso awo. Lia eni vakalolya vakansoṛa.