Read MMA SHIYYA Matayo 22 Bible Online

Matayo 22 - MMA SHIYYA bible

Matayo 22

¹Yesu kaaṛua vandu kavarerya lingi na sumu eevaiaa:

²Umangi lwa Iṛuva luvakani na mangi indeorisya nseṛo wamwi nka.

³Nae karuma vaseṛo vamwi vavaange valya veevvaangwaa waliń. Nawo nta ikunda isha.

⁴Karuma lingi vaseṛo vengi kavaia: Andeień vandu valya vakee vaaṛye nrumi: Nammaa isongosya shoonga takwa. Nguleta na nrasa takwa tammaa isikyo. Foose fammaa ideeṛyo. Oṛeshoń waliń!

⁵Kake wo vakaila vakaenda nndu woose kikwamwi, ulya umwi nremiń yamwi na ulya ungi mbusheń yamwi.

⁶Na valya vandesaa-wo vakawara vaseṛo valya vamwi vakavatuṛua na iwaa vakavawaa.

⁷Ili mangi andeita mboni ii, kaliwa nngoo karuma vaseṛo vamwi vandereta vawaa valya vakakoṛa na muṛi wawo.

⁸Numa kaia vaseṛo vamwi: Wali lwavva da, kake vandu valya vakee vaaṛye nrumi vakivaa ndi.

⁹Kyasia endeń alya malakanuń a shia muvaange woose muvalolyaa-fo vashe waliń!

¹⁰Vaseṛo vakakwimboo vakaenda kulya shień vaka-sańiṛya woose vandevalolya vakasha na vanuru. Wali lukaishua vandu veeni bele.

¹¹Numa mangi kaaka numba indeisana vandu valya. Kakooya-fo nndu umwi kitaare aṛee isaṛa lya wali.

¹²Kamwia: Ndoo yakwa, naare kwaaka kunu kutaṛee isaṛa lya wali? Nae kasia do.

¹³Llyo mangi aia vaseṛo vamwi: Mfingeń marende na maako munkumbe ifo wooṛo llemiń. Ifo mfo kivaa kiiyo na ifura kitaku.

¹⁴Amu vveengi vakee vavaange, kake waangu tubu vasaulwaa.

¹⁵Kyasia Vafarisayo vakaenda vakandeliya Yesu kyama kya iwwara na firero famwi.

¹⁶Vakarumya Yesu vandu vawo andu emwi na vandu va Herode vakamwia: Llosha nnini, tikwishi sheeli kukee nndu awore firero fa dede na shia ya Iṛuva kwaiorusa kisumani. Nawe kwafo kuwore wa mungo ana wa kivari ndi.

¹⁷Tiie kukusaṛye are iwe? Nkisumani iniingya mangi kyaalo ana wode?

¹⁸Yesu kamanya ntambwe wawo kavaia: Nkiki ili mukee ishireya, ini vamakavili? Shooruseń shilingi yo ya kyaalo te! Vakamwendee shilingi.

¹⁹Kavaia: A fwana ii iiyo na mitisine yya i?

²⁰Vakamwia: Mfa mangi.

²¹Llyo avaia: Niingeń mangi kilya kisumani nae, na kilya kisumani na Iṛuva niingeń Iṛuva!

²²Ili vandeita kuro, vaka-ṛiika vakantia-wo vakaenda.

²³Nkonu ulya muni kashewa vVasadukayo. Wwo vandu vanumbuaa, sheeli liteefo iṛuka lya vafu. Vakamwuṛa veenumbuaa:

²⁴A le llosha, Mose anumbua: Nndu kafwa atawore vana, mwanamae aore nka ulya wamwi, amu airye mwanamae vana.

²⁵Kyasia kunu kweru veeifoo vana va nka umwi mfungare. Ulya wa mbele kaalika kafwa. Na fulya ateeworee mwana, kareya mwanamae nka ulya wamwi.

²⁶Mfo kuro na ulya wa kavili na wa kararu. Kikava kuro kwa woose mfungare.

²⁷Ifurumya lyawo woose nka ulya nae kafwa.

²⁸Kyasia ili vaṛutwaa kwa vafu, avaa nka wa i karikari ka iwo woose mfungare? Amu woose veekee nae.

²⁹Yesu kaaṛua kavaia: Mwanrekwa, fulya muteeshi mitisiṛie ana nta finya ya Iṛuva.

³⁰Amu ili ufikaa nkonu wa iṛutwa kwa vafu, vakyalikaa ana vakyalikwaa ndi. Kake vavaa sha vamalaika vakee ifo iṛuvewu.

³¹Kake kwa kiimba kya iṛuka lya vafu mwansoma nta ikyo Iṛuva ammuia eenumbuaa:

³²Niń nkee Iṛuva wa Abraamu na Iṛuva wa Isaki na Iṛuva wa Yakobo? Kyasia Iṛuva wwa vafu ndi, kake wwa valya veefo na muu.

³³Neeli vandu vandeita, vakaṛiikiswa mmiloshye yamwi.

³⁴Ili Vafarisayo vandeita sheeli Yesu avvinga Vasadukayo valya, nawo vakakusandya andu emwi.

³⁵Na umwi wawo eekufundyee mavavaso kamwelelya eemwuṛaa:

³⁶A le llosha, ni ivavaso lingali likee inini ifo mavavasoń kita engi?

³⁷Na Yesu kamwia: Llyo ili: Kukunde Nndumi Iṛuva wafo na ngoo yafo yoose na nrima wafo woose na makusaṛo afo woose!

³⁸Ili llyo ivavaso inini na likee kwa ule. Liifo na ivavaso lingi livakani nalyo.

³⁹Llyo ili: Kukunde vandu vengi sheeli kukukundye ku muni!

⁴⁰Na mavavaso iva avili wwo arie mavavaso engi woose na akwaa mmiloshye ya vaauya fisuku.

⁴¹Neeli Vafarisayo vandekusandya andu emwi, Yesu kavauṛa

⁴²eereraa: Mukusaṛye are kya Kristo? Munumbuaa mMwana wa i? Vakamwia: Mmwana wa Davidi.

⁴³Kavaia: A Davidi avvaangaań are Nndumi kwa finya ya Mumuyo eereraa:

⁴⁴Nndumi aia Nndumi wakwa: Kaa rembo taari ya uko usha lwakwa kumande nrwaa fituva fafo kwa si ya marende afo?

⁴⁵Kyasia kwakooya Davidi awaanga Ndumi, naareń akee mwana wamwi?

⁴⁶Nta umwi andemakii imwaṛua kirero, na kuuka nkonu to nndu akikaṛya imwuṛa lingi kirero ndi.