Read MMA SHIYYA Matayo 23 Bible Online

Matayo 23 - MMA SHIYYA bible

Matayo 23

¹Kyasia Yesu karera na syamu ilya ya vandu na vaseṛo vamwi eenumbuaa:

²Kifumbiń kilya kya Mose waaṛia va fitabu vakee-fo rembo na Vafarisayo.

³Kyasia kilya kyoose vamuiaa kitaniń na ikiwara na ikiringa. Manya mutasoṛe mitanye yawo, amu vareraa vatatane kuro.

⁴Nawo vafingaa maṛio meemeri vakae-keṛya vandu vengi meeveń awo. Kake wo vabaanaa nta na nni ndi.

⁵Na mitanye yawo yoose vakee itana, naamu valolyo wandu da. Na fingova fawo vaṛaa ili veeterevaa vakafeelelisa, na mise ya miseto yawo ya yeeṛya vakayengeṛya.

⁶Na isaua firembo fa mbele andu a shoonga na fifumbi fa mbele ifo numbeń ya iterevya.

⁷Na iisanwa wandu ifo singiṛeń na ivaangwaa valosha vanini wandu.

⁸Kake ini manya mutavaangwa valosha vanini wandu, amu llosha wanu ni umwi, yye Kristo. Neeni mu woose mukee vana va nka.

⁹Na lingi manya mutavaange nndu Nde yanu kunu isangeń, amu Nde yanu ni umwi tubu, ni ito akee iṛuvewu.

¹⁰Manya mutavaangwa vaṛongoṛi! Amu ndongori wanu ni umwi, yye Kristo.

¹¹Na ulya akee nnini kwanu ave mumuṛundya ini.

¹²Ulya akufunisaa ye muni akaa anyiiswa, na ulya akunyiisaa ye muni akaa ańiniswa.

¹³Ushi ini vaaṛia va mitisine na Vafarisayo, mukee vamakavili! Ini murayaa vandu umangi lwa iṛuvewu. Fulya ini mu veni nta mwakaa-fo ndi ana iwo vafurie yaka nta mutakee ivaotoṛya vaake.

¹⁴Ushi ini vaaṛia va mitisine na Vafarisayo, mukee vamakavili! Fulya mwawa vamiṛa numba ta misikeeti na kwa ukavili mukatereva fiterewo faasha. Kwa ikyo mukooyaa uumisyo lukee unini kya mmwasi.

¹⁵Ushi ini vaaṛia va mitisine na Vafarisayo, mukee vamakavili! Fulya ini mukee ilengetya nruva na si shuumu, amu mukooye-fo nndu umwi amulatye. Na ili mumaa inkooya, mukee imwanta mwana wa vayavaṛumu kita ini kavili.

¹⁶Ushi ini vaṛongoṛi midoń! Ini munumbuaa: Nndu kalya ikite na numba ya Iṛuva, kiwore mwaandu ndi. Kake nndu alyaa ikite na saabu ya numba ya Iṛuva, ankuumisya.

¹⁷Ini mukee varińani na vafu miso. A kinini nkingaki, nsaabu ilya ana nnumba ilya ya Iṛuva ikee ishiisa saabu ilya?

¹⁸Lingi munumbuaa: Nndu kalya ikite na kiraa kya iterevya, kiwore mwaandu ndi. Kake kwakooya nndu alyaa na nsimbika ukee kwa ule yayo ankuumisya.

¹⁹Ini mukee midoń! A nkingaki kinini, ni nsimbika ulya ana nkiraa kya iteṛevya kikee ishiisa nsimbika?

²⁰Kyasia ulya alyaa ikite na kiraa kya iterevya, alya ikite nakyo andu emwi na foose feekeṛye-wo.

²¹Na ulya alyaa ikite na numba ya Iṛuva, alya ikite nayo kasandya na ito akaa-fo.

²²Na ulya alyaa ikite na iṛuvewu, alya ikite na kifumbi kya unini kya Iṛuva kasandya na ito akikaaye.

²³Ushi ini vaaṛia va mitisiṛie na Vafarisayo, mukee vamakavili! Fulya ini muniingyaa kyeenga kya ikumi kya findo fo fa kisaamu na fa ilorisa na fa ilunga shoonga. Kake mukatia filya finini ifo mavavasoń mfilya feelekyaa fa uumisyo na fa ililya na fa ikusura. Ifi fawara mutani kita itia na filya fingi mutafitie ndi.

²⁴Ini vaṛongoṛi midoń! Mukee iirya vengi mbele, mukee imisha nrii, kake mukamiṛa ngamia.

²⁵Ushi ini vaaṛia va mitisiṛie na Vafarisayo, mukee vamakavili! Fulya ini mukee isangya umbata na faasho kwa wooṛo, kake kari kayo fiishule soka na iṛemisa.

²⁶Iwe Mfarisayo ndoń, sangya mbele kyaasho kari, Ilyo kiilaa na kya wooṛo.

²⁷Ushi ini vaaṛia va mitisiṛie na Vafarisayo, mukee vamakavili! Amu muvakani na mbanga shaambe mboṛongo, nayo ikalolika kiwooṛo sheeli nshinuru, kake kari kayo iishule mafua a minyińa na makasha woose.

²⁸Neeni nkuro da, mulolikye kiwooṛo sheeli mukee vasumani, kake kari kanu lwishule-fo ukavili na ureti.

²⁹Ushi ini vaaṛia va mitisine na Vafarisayo, mukee vamakavili! Amu musongosyaa mbanga ta vaauya fisuku, lingi mwambikaa iṛikwa lya vasumani

³⁰na inumbua: Kifo ise tiifoo kyeeri kya vaande yeru, tiilyaa kyama nawo kya iwaa vaauya fisuku ndi.

³¹Kuro mukee ikurambua mu veni sheeli mukee vana va valya vawaa vaauya fisuku.

³²Kyasia neeni ishuṛeń kilya kinderewa waande yanu kya ngyukasha tawo.

³³Mukee shoka na mawore a saru! Murishaa are uumisyo lwa yeeṛwa iriniń lya muro!

³⁴Kiimba kya iki lleń mmurumyaa vaauya fisuku na vandu veeshi sewu na vaaṛia va mitisiṛie. Neeni iwo kiindi muvawaa na ivakabya nsalabeń na kiindi muvakabaa na ngova ifo numbeń tanu ta iterevya na ivaumbuta ifo miṛiń na miṛiń.

³⁵Na kuro llyo muvavyoo nngyusao tilya toose mundetiirita ta vandu vasumani kuuka usao lwa Abeli ulya nsumani kumande usao lwa Sakaria mwana wa Barakia ulya mundewwaya kari ka numba ya Iṛuva na andu a irasya Iṛuva.

³⁶Nkue namuia: Ifi foose fiviaa kishuku ki.

³⁷Wui Yerusalemu! wui Yerusalemu! Muwaa vaauya fisuku, na valya kundevarumyo kwavakaba na mawe! Nsha keenga nallanga ishukuṛya vana vafo andu emwi sheeli nguku ishukuṛaa mawore ayo ikaasikia na maaro! Neeni mukalema fukyu!

³⁸Lleń mukaa mutiywa numba ii yanu ikee irama.

³⁹Kwa ikyo namuiań: Kuuka alli mukishilolyaa lingi ndi kumande munumbuaa: Eetikiswa ulya asha na irinalya Nndumi!