Read MMA SHIYYA Matayo 24 Bible Online

Matayo 24 - MMA SHIYYA bible

Matayo 24

¹Ili Yesu andesomuka numbeń ya iterevya, kawara shia eendaa na vaseṛo vamwi vakanshea vakamworusa unuru lwa numba tilya.

²Na Yesu kavaia: Mulolye ifi foose? Namuia kya dede: Nta iwe limwi lya numba ti lyekeṛyani na lingi liifo litaare liburuyoo si ndi.

³Numa ili andekaa rembo alya uroń lwa misenifu, vaseṛo vamwi vakasha alya akai vakee kyaanya kyawo vakamwia: Tiie kyeeri ifi fikaa five. Neese timanyamanyaań are kyeeri kuuyaa nakyo na kyeeri isanga lisiaa?

⁴Yesu kaaṛua kavaia: Kwiiseń ninnsha kaaṛa ataire nndu amutevetaa!

⁵Fulya veengi vashaa veekusendaa na irina lyakwa na inumbua: Nniń Kristo. Nawo vatevetaa veengi.

⁶Na lingi mulolyaa fira na iita mboni ta fira na ntindi wayo. Manyiń mutataṛaake! Fulya kyawara kive mbele kuro. Kake ifurumya lya isanga lyamfika ndi.

⁷Fulya uruka lumwi lwimboo fira lukabe lungi na mamangi eemboo fira akabe mamangi engi. Na soto ishaa nini na si ireremaa yoose.

⁸Na ifi foose mfo fibookye fa ngyukiva ta ifurumya.

⁹Numa llyo vamurambikyaa muliswa ukiva na imuwaa. Na lingi musulwaa vvandu woose kiimba kyakwa.

¹⁰Llyo veengi vanu vatuṛukyanaa na ikuṛiinga na isuyana wo veni na veni.

¹¹Na vaauya fisuku veengi va wongo vakwimboo na iteveta veengi.

¹²Neeli ngyukasha tifumbukaa, nkyo kyaangusaa ikunda lya veengi.

¹³Kake ulya asisiryaa kumande ifurumya, ito yye akiṛwaa.

¹⁴Na mboni shinuru ta umangi lwa Iṛuva toongoywaa masangeń woose, amu vandu va masanga varambuywa nawo vamanyi. Kikamfikań kuri, na ifurumya lyamfika.

¹⁵Kyasia ili mulolyaa kituṛua kilya kya ikasheesa andu asongori ave irama kyammaa isha, nkilya kyarerwa mmwauya fisuku ulya Danieli — na ulya asomaa amanye! —

¹⁶llyo iwo vakee kunu Yudaya varishye ngyuroń.

¹⁷Na ulya akee mmbeewu manya ataoloke eemboo filya fikee numba yamwi.

¹⁸Na ulya akooywaa akee nremiń, manya atauye numa eemboo isaṛa lyamwi.

¹⁹Kake ushi valya vakufingye na vakee yosa mikonu yo.

²⁰Tereveń amu irisha lyanu litave kyeeri kya mbyoo ana nkonu wa Sabato.

²¹Amu feeri fo avaa-fo mavaviso manini kitaare allolika a mikae yo kuuka mbooko ya isanga kumande alli, ana atakilolikaa lingi kutu.

²²Na kikooye kitaare mikonu yo iifwiswaa, nta umwi eekiaa. Kake kiimba kya vasaue mikonu yo yanguswaa.

²³Na kyeeri kyo kwakooya nndu amuiaa: A uu Kristo ia ana a ulya kulya, manya mutamwirikye!

²⁴Amu vakwimboo Makristo a wongo na vaauya va wongo, nawo vaorusyaa myorusye minini na maṛiikiso, amu varete na akwaa vvalya vakee vasaue, kwakooya kivaa.

²⁵Lleń te nammaa imwikimba mbele.

²⁶Kyasia vakamuia: Akee bateń, manya mutauke kyeń mwende-fo. Na kwakooya vakee imuia: Akufisye ifo numba, manya mutairikye.

²⁷Amu sheeli kimuli kiveṛukaa kuuka taari ya ngama kikalolika kumande taari ya ukwawuń, mfo kuro kivaa kya isha lya Mwana wa nndu.

²⁸Amu alya woose nnyińa ukai, wwo na mamutoń akwitiṛimu.

²⁹Na mavaviso a mikonu ilya akamiira, llyo saa yaṛukaa ive llema na akwaa mmwiri wotoṛaa langa yayo. Na nyinyiri tiwaa tuuka iṛuvewu na finya ta iṛuvewu tiseniswaseniswaa.

³⁰Na io llyo ilolikaa myorusye ya Mwana wa nndu iṛuvewu. Llyo ngyufwari toose ta isangeń tiishiṛaa, ili valolyaa Mwana wa nndu eeshaa na ma-ṛumbe auka iṛuvewu akee na finya na unini.

³¹Nae ammaa vamalaika vamwi varie mbembe tireraa nnu. Nawo vasandyaa valya veensaulwaa yye kuuka taari toose iinyi veebookaa kuuka mbaai ya iṛuvewu na kumande mmando wayo.

³²Kyasia kulosheń na mikae ya nri wa nkuu. Maṛamba ayo akamfumbisa na itaṛambua maru, mumanyaa sheeli kyeeri kya mateeri nkufui.

³³Mfo kuro neeni: Ili mulolyaa ifi foose, manyiń sheeli Mwana wa nndu ansha kufui na mwaangoń.

³⁴Nkue namuia: Kishuku ki kiiraa kutu ndi kumande ifi foose faawukyaa.

³⁵Iṛuvewu limandaa na isanga, kake firero fakwa fo fimandaa kutu ndi.

³⁶Kake nkonu ulya ili ufikaa na saa yayo, nta eefo nndu eeshi, nta vamalaika va iṛuvewu ana nta Mwana kita Nde ye muni tubu.

³⁷Kake sha lia kyave kyeeri kya Noe, mfo kuro da kivaa, ili Mwana wa nndu auyaa.

³⁸Amu mikonu ilya kitaare iwala lia lyansha vandu veekee ilya na inwa veealikaa na yalikwa kumande nkonu ulya Noe aaka nato isandukuń lia inini.

³⁹Nta vandemanya filya fivaa ndi, kumande iwala lia inini lyasha likavamiṛa woose deń. Mfo kuro da kivaa, ili Mwana wa nndu ashaa.

⁴⁰Kyeeri kyo vandu vavili vakooywaa vakee nremiń, umwi awaryo̱o̱ na ungi aleekaa.

⁴¹Vaka vavili vakooywaa veeseaa andu emwi, umwi awaryoo na ungi aleekaa.

⁴²Kyasia laleń kya umbuura! Fulya muteeshi nkonu Nndumi wanu ashaa nato.

⁴³Kake manyiń kirero ki: Kifo muni numba eemanyaa kyeeri inini lishaa nakyo kio, eelalaa kya umbuura, kaaṛa ataotoṛye numba yamwi ifukyo.

⁴⁴Kiimba kya ikyo neeni kusongosyeń! Amu Mwana wa nndu ashaa saa ilya mutankusaṛye.

⁴⁵Kyasia ni iń akee iketi itele na iṛango, Nndumi wamwi anrambikye va numba yamwi avaniinge shoonga saa yawo ikamfika?

⁴⁶Ulya akee wa ngoma ni iketi lia Nndumi wamwi ankooyaa eetanaa kuro ili ashaa.

⁴⁷Nkue namuia: Anrambikyaa masaa amwi woose aaringe.

⁴⁸Kake iketi ikasha linumbuaa ngooń yamwi: Nndumi wakwa ansinda.

⁴⁹Nalyo likabooka ikaba maketi alya engi na ilya na inwa andu emwi na vanangwa.

⁵⁰Kyasia nndumi wa iketi lia ashaa nkonu atawerye na saa litaiishi.

⁵¹Nae alirumbuaa feenga fivili na ilitalya andu emwi na vamakavili. Llyo kivaa kiiyo na irafuna mayoo.