Read MMA SHIYYA Matayo 26 Bible Online

Matayo 26 - MMA SHIYYA bible

Matayo 26

¹Kikava ili Yesu andemarisya firero filya foose, kaia vaseṛo vamwi:

²Mwishi sheeli iseere mikonu ivili kive kisuku kya Pasaka. Na Mwana wa nndu aniingyoo, amu akabyo nsalabeń.

³Llyo vakohani vanini na vasuṛi va vandu vakakusandya numbeń kwa nkohani nnini eevaangwaa irina lyamwi Kayafa.

⁴Vakarera kyama kya iwara Yesu na ntambwe, amu vawwaa.

⁵Kake vakanumbua: Tivere kisuku kiire, amu utave mwaandu vanduń!

⁶Neeli Yesu eekee kulya Betania numbeń ya Simon ulya eeworwaa ni ivave,

⁷kashewa ni nka arie kawembe kawore mafura a kisaamu awore uuru unini. Kalletia nrweń wamwi ili eekee rembo eelyaa shoonga.

⁸Ili vanalosho vamwi vandelolya, vakatuṛuka vakanumbua: A ifwalafwala li llya kiki?

⁹Amu mafura va eekimbwaa kwa fesa shiingi taavyo vakiva.

¹⁰Yesu kamanya kavaia: Nki ili mukee yatara nka uu? Amu anshitanya kindo kinuru.

¹¹Fulya vakiva mukee nawo mikonu yoose, kake niń mukaa nań mikonu yoose ndi.

¹²Amu ili ashiletya mafura va wiliń wakwa, asongosia iṛikwa lyakwa.

¹³Nkue namuia: Kundo koose isangeń lyoose kulya kukee ikwanisyo nrumi ii shisha ya ikiṛa vandu, kirerwaa na iki akitana ye, nae akumbulwaa.

¹⁴Llyo umwi wa valya ikumi na vavili, eevaangwaa Yuda Isikariote, kaenda kwa vakohani vanini kavauṛa:

¹⁵Nkiki mushiniingaa, ili mmworusaa kundo akai? Vakanrekya shilingi makumi araru.

¹⁶Kuuka nkonu to kaṛuya mwaanya wa indiinga.

¹⁷Kyasia nkonu wa mbele wa kisuku wa ilya mikate itadookye vanalosho vakauṛa Yesu: Nkwi kufurie tikusongosie kuliye-wo yaanri lya Pasaka?

¹⁸Nae kavaia: Endeń muṛiń wa ṅanya mumwie: Llosha akuia: Kyeeri kyakwa kikee kufui vai, nkwafo lliyaa yaanri lya Pasaka andu emwi na vanalosho vakwa.

¹⁹Vanalosho vakatana sheeli Yesu andevavavasya vakandetobiṛya yaanri lya Pasaka.

²⁰Ili kundeila, kakaa rembo shoongeń andu emwi na vaseṛo vamwi ikumi na vavili.

²¹Ili veelyaa kavaia: Umwi wanu ashiṛiingaa.

²²Vakaṛiika nnu na nndu woose kamwuṛa: Nndumi, nniń?

²³Nae kavaaṛua kavaia: Uu ashiṛiingaa tikee iliana nae kyaashoń kimwi alli.

²⁴Mwana wa nndu eendaa shia yamwi da, sheeli eentisiṛyoo. Kake ushi ulya, Mwana wa nndu andeṛiingwaa yye. Nndu to kifo kitaare awonika kiwiaa ńwana.

²⁵Llyo Yuda ulya eendiingyee kamwuṛa: Llosha nnini, nniń? Kamwia: Ee ni iwe kumuni kwanumbua.

²⁶Nawo ili veelyaa shoonga, Yesu kaimboo nkate kaana Iṛuva kaufukyafukya kaavya vanalosho vamwi eevaiaa: Ngyeń kuliyeń! Uu ni vvili wakwa.

²⁷Numa kaimboo umbata kaana Iṛuva kavaniingya eevaiaa: Nwiń ini mu woose!

²⁸Amu ilu llo usao lwakwa luvaa mma shiiya ya imwitanisa na Iṛuva. Lwiritwaa kiimba kya veengi vakooye itio mareko awo.

²⁹Kake namuia: Kuuka alli nkinwaa neeni minuye ii ya mfinyo ndi kumande nkonu ulya nndenwaa neeni minuye miiya ifo umangiń lwa Vaava wakwa.

³⁰Ili vandemaa iimba kiimbo kya mmisa Iṛuva, vakasomuka vakaenda uroń lwa misenifu.

³¹Llyo Yesu avaia: Kio ki ini mu woose mushituṛukyaa. Fulya kikee kitisiṛe: Nkabaa mwisi na maanri a shoo anyanyakaa.

³²Kake nammaa iṛuka kwa vafu niiraa mbele yanu kulya Galiliya.

³³Na Petiro kamwaṛua: Na akwaa wwoose vakutuṛukyaa, niń nkutuṛukyaa kutu ndi.

³⁴Yesu kamwia: Kio ki kitaare nguku ya shawu yamiikoro, kushikanaa kararu.

³⁵Petiro kamwia: Na akwaa mfwaa andu emwi nawe nkukanaa kutu ndi. Na vaseṛo vengi woose vakarera kuro.

³⁶Numa Yesu kaenda andu emwi nawo andu eevaangwaa Getisemane. Kaia vanalosho vamwi: Kaań ia kuri neende allya nndeterevya-wo.

³⁷Kakurika Petiro na vana valya vavili va Sebedayo. Kabooka ikunarya na irerema.

³⁸Yesu kavaia: Nrima wakwa uwore unaari nnu, useere ifwa da. Kaań ia mulale rembo andu emwi nań.

³⁹Kaserika kinnya na kwa mbele kawa si na kisangu katereva Iṛuva eereraa: Vaava wakwa, kwakooya kivaa kwite ukiva lu kwaashaań. Kake kitave sheeli niń mfurie ndi, kive sheeli iwe kufurie.

⁴⁰Kauya na kwa vaseṛo vamwi kavakooya vallala. Kaia Petiro: Nta mumakii ilala rembo andu emwi nań nta saa imwi ndi?

⁴¹Laleń rembo mwiterevaa Iṛuva, amu mutavingwa mmakusaṛo a inunua. Nrima ufurie itomaa da, kake vvili ni llemwa.

⁴²Kaenda lingi lya kavili katereva Iṛuva eereraa: Vaava wakwa, kwakooya ukiva ilu lutavaa lushuuke, kive sheeli iwe kufurie.

⁴³Kauya lingi kavakooya valele, fulya miso awo eemeemyoo nruo.

⁴⁴Kavarea kaenda lingi katereva lya kararu eereraa firero filya feni.

⁴⁵Numa kauya kwa vaseṛo vamwi kavaia: Naare ini womi mufurie ilala da? Lleń alli kyeeri kyamfika, Mwana wa nndu arambikyo̱ maakoń a varekwa.

⁴⁶Kwimbooń teende, amu ulya andeshiṛiinga ansha kufui.

⁴⁷Ili eereraa kuri, lia eni Yuda kasha akee umwi wa valya ikumi na vavili. Ariani na syamu shiingi inderumwa vvakohani vanini na vasuṛi va vandu. Nayo irie shombo na ndata.

⁴⁸Kake ndiingi ulya eewaikimbaa kuri: Ulya mmwongaa mimo yye uu muwware.

⁴⁹Lia eni kaserikya Yesu kamwisana kamwia: Llosha nnini kia! Kamwonga mimo.

⁵⁰Yesu kamwia: Ndoo yakwa, kwashea ki? Llyo vandu valya vatambukya Yesu vakawwara vakamfinga.

⁵¹Na umwi wa valya veekee andu emwi na Yesu kasomua shombo yamwi kaminya iketi lya nkohani nnini kuri kumwi.

⁵²Na Yesu kamwia: wiiṛa shombo yafo kiboń! Amu woose vawaa na shombo nawo vawalwaa na shombo.

⁵³Ana kukusaṛye se, sheeli niimakii itereva Vaava wakwa ashirikye vamalaika veengi kita fiku ikumi na fivili?

⁵⁴Kake kifo niitanaa kuro, naare mitisine iifikaa? Sha lia kyatisiṛwa kyawara se kive kuro?

⁵⁵Llyo Yesu andeia vandu valya: Mwansha isheshiwara murie shombo na ndata, sheeli nkee kisoki. Na mikonu yoose nkaa numbeń ya Iṛuva niiloshaa-fo, nta ishiwara.

⁵⁶Kake ifi foose favva, amu mitisine ya vaauya fisuku ifike. Lia eni vaseṛo vamwi woose vakantia vakarisha.

⁵⁷Na valya vandewara Yesu vakanrwaa kwa nkohani nnini eevaangwaa Kayafa. Mfo veekusandyee valosha va vandu na vasuṛi.

⁵⁸Kake Petiro kalatya Yesu eekwovaa kumande afikaa wooṛo kwa nkohani nnini kakaa rembo andu emwi na maketi, alle kasa kivaa.

⁵⁹Llyo vakohani vanini na vasuṛi woose va kikwena vakaṛuiya Yesu findo fa imfingya fa uresi, amu vawwaa.

⁶⁰Nta ikooya, lla kasa veefilee iwo veekee imfingya uresi.

⁶¹Numa vakasalala vavili vakanumbua: Uu anrera: Mmakii isakya numba ya Iṛuva niitanye kari ka mikonu iraru.

⁶²Nkohani nnini kakwimboo kaia Yesu: Kwaṛuaa nta kirero kya filya iva vakee ikuṛiinga nafo se?

⁶³Kake Yesu kasia do. Nkohani nnini kamwia: Nakulisa ikite na Iṛuva eefo na muu kutiie, akwaa iwe kukee Kristo Mwana wa Iṛuva.

⁶⁴Yesu kamwia: Ee nsheeli iwe kwanumbua. Na alli namuia: Kuuka alli mulolyaa Mwana wa nndu akee rembo taari ya uko usha lwa Iṛuva. Na numa ashaa na maṛumbe a ringewu.

⁶⁵Llyo nkohani nnini arandaranda miseto yamwi eenumbuaa: Uu ammaa iruma Iṛuva. Tikisokodyaań ki kingi? Mwamiita alli kuri sheeli aruma Iṛuva. Mulla naare?

⁶⁶Nawo vakamwaṛua vakanumbua: Kyawara awalwa.

⁶⁷Llyo vabooka immishya manyiiri kisanguń na inkaba na ṅunde. Na vengi vakankaba na ngyui veemwuṛaa:

⁶⁸Kristo, tirambue ni i akukaba?

⁶⁹Nae Petiro eekee rembo io wooṛo. Kashewa ni iketi limwi lya kika likamwia: Na akwaa ni iwe kukee andu emwi na Yesu uu wa Galilaya.

⁷⁰Kaira ngani mbele ya woose eenumbuaa: Niishi kilya kukee irera ndi.

⁷¹Ili Petiro eesomukaa kishomiń, nka ungi kallolya kaia valya veeyoo: Nndu uu eekee andu emwi na Yesu wa Nasareti.

⁷²Kaira ngani lingi na ilya ikite eenumbuaa: Niń niishi nndu uu ndi.

⁷³Kwa numa kinnya valya veeselelee alya wooṛo vakashea Petiro vakamwia: Nkya dede iwe kukee umwi wa vaaroe va Yesu, fulya mirerie yafo yyo ikee ikurambua.

⁷⁴Llyo abooka ikudenga na ilya ikite eenumbuaa: Niń niishi nndu uu kutu ndi. Lia eni nguku ya shawu ikaikoro.

⁷⁵Io Petiro kakumbua kirero kilya kya Yesu eemwiaa: Kitaare nguku ya shawu yamaa iikoṛo, kushikanaa kararu. Kasomuka wooṛo ya muṛi kaiya kutu na unaari unini.