Read MMA SHIYYA Matayo 27 Bible Online

Matayo 27 - MMA SHIYYA bible

Matayo 27

¹Ili kundekya, vakohani vanini na vasuṛi va vandu vakafukya sheeli Yesu awalwa.

²Vakamfinga vakankurika vakanrwaa kwa Pilato eekee nshili nnini wa uruka.

³Na Yuda ulya andendiinga ili andelolya, sheeli ammaa yumisyo kavaia:

⁴Nnderekwa nnu, fulya nndeṛiinga nndu ataare eetanyee fikasha. Nawo vakamwia: Tikiyo ise ndi, nkindo kyafo.

⁵Nae kakumba shilingi tilya numbeń ya Iṛuva kaenda kandekufiṛa.

⁶Na vakohani vanini vakadola fesa tilya vakanumbua: Kisumani tirwaa isandukuń lya misimbika ndi, fulya tikee ta usao.

⁷Vakarera kikwena vakauṛa nato nrema ya mwumbaumba nungu ive ya irika veeni.

⁸Kwa ikyo nrema yo ivaangwaa nrema ya usao kumande nnu.

⁹Llyo kindefika kirero kilya kyeemaauywaa mmwauya fisuku ulya Yeremia eenumbuaa: Vakadola fesa tilya makumi araru, wwuuru lwa nndu andereryo maaru, ni ito vana va Isiraeli vandenrerya uuru.

¹⁰Vakauṛa nato nrema ya ntana nungu, sheeli Nndumi andeshivavasa.

¹¹Kyasia Yesu kakurikwa kwa nshili nnini wa uruka. Na nshili kamwuṛa: Iwe kukee mangi ya Vayuda dede? Yesu kamwaṛua: Nsheeli kwanumbua.

¹²Neeli vakohani vanini na vasuṛi vandendiinga nnu, nta yaṛua kirero.

¹³Llyo Pilato amwia: Kwisile ifi foose ndi iva vakee ikuṛiinga nafo?

¹⁴Nae nta imwanta kirero kimwi. Na nshili wa uruka kaṛiika nnu kutu.

¹⁵Neeli kisuku kyawo kiifikaa, nshili wa uruka eeishivyee ivaboṛomuya mfinge umwi ulya vandu veemfuraa veni.

¹⁶Na kyeeri kyo eeworee mfinge umwi eemanyikyee ngyukasha tamwi, irina lyamwi mBaraba.

¹⁷Ili vandu vandekusandya, Pilato kavauṛa: Ni ungau mufurie mmuboṛomuye? MBaraba ana ni Yesu uu avaangwa Kristo?

¹⁸Fulya eeishii vakee iṛiinga Yesu kiimba kya imwiria iriso.

¹⁹Nae ili eekee irera kikwena kyo, nka wamwi kanrumya nrumi kamwia: Lakana deń na kikwena kya nndu to nsumani, fulya nndetuṛulwa nnu kio yorień kiimba kyamwi.

²⁰Kake vakohani vanini na vasuṛi vakakabiṛya vandu vasaue Baraba vawaa Yesu.

²¹Na nshili kavauṛa: Ni ungau wa iva vavili mufurie mmuboṛomuye? Vakaaṛua: mBaraba timfurie.

²²Pilato kavaia: A Yesu uu avaangwa Kristo nintanyaań ki? Na woose vakanumbua: Akabyo nsalabeń!

²³Kavaia: Ni ukasha lungalu antana? Nawo vakaengeṛya iṛoṛongya veenumbuaa: Akabyo nsalabeń da!

²⁴Ili Pilato andelolya atakiwore kirero kya ivinga vandu na kiṛoṛongyo kyawo kyeeṅṅinaa, kavavasa eendewa mura. Kasangya maako amwi mbele ya vandu kanumbua: Niń niifo kikweniń kya iirita usao lwa nndu uu nsumani ndi. Kimuwore ini muveni.

²⁵Na vandu woose vakamwaṛua veemwiaa: Usao lwamwi lutivavye ise na vana veru!

²⁶Llyo andevaboṛomuya Baraba kavavasa, Yesu akabwa. Numa kanrambikya akabyo nsalabeń.

²⁷Na vasikari va nshili wa uruka vakakurika Yesu. Vakanrwaa muṛiń wa vasikari vakavaanga vasikari woose vashe alya Yesu akai.

²⁸Vakamwambua miseto yamwi vakawika nseto utondoṛye wa kimangi.

²⁹Vakaoka kiṛeto kya miinga vakawika nrweń vakanniingya na nsengye ukoń usha lwamwi. Vakafwiṛya nri si mbele yamwi vakamweetya veemwisanaa: Mangi ya Vayuda kia!

³⁰Vakammishya manyiiri vakansoka nsengye ulya vakankaba nato kunu nrwe.

³¹Nawo ili vandemaa imweetya, vakamwuta nseto ulya utondoṛye vakawika lingi miseto yamwi. Vakankurika vandenkabya nsalabeń.

³²Ili vandesomuka veendaa, vakalolya nndu wa Kirene irina lyamwi eevaangwaa Simon vakankabiṛya ankurikye nsalaba wamwi.

³³Vakafika andu avaangwaa Goligota, misendye yayo nKiboṛoń.

³⁴Vakanniinga mfinyo usaandi na kindo kivavaa anwe. Neeli andemungyamungya, andekunda inwa ndi.

³⁵Ili vandemaa inkabya nsalabeń, vakaimboo miseto yamwi vakakwavya veeikabyaa wuuku, amu kifike kilya kyarerwa mmwauya kisuku ulya sheeli: Vankwavya miseto yakwa na kansu yakwa vakee ikabya wuuku.

³⁶Vakakaa rembo vakanringa.

³⁷Na kwa ule ya nrwe wamwi vakatisiṛa-wo firero fa indiinga: Yesu uu mmangi ya Vayuda.

³⁸Na fisoki fivili fikakabyo nsalabeń andu ewmi nae, umwi taari ya uko usha na ungi taari ya uko umuso.

³⁹Na valya veekee iira shień vakanruma veesenisaa mirwe yawo veenumbuaa:

⁴⁰Iwe mfukya numba ya Iṛuva na iitana lingi andu a mikonu iraru kukiṛeń kumuni, kwakooya kukee Mwana wa Iṛuva! Kwoloke kunu nsalabeń!

⁴¹Mfo kuro na vakohani vanini vakamweetya vasaangi na vaaṛia va mitisiṛie na masiingo a vandu veenumbuaa:

⁴²Ye eeshi ikiṛa vengi atamakii ikukiṛa muni. Kwakooya ye mmangi ya Isiraeli aoloke nsalabeń alli. Llyo neese tinkusuraa.

⁴³Ye akusurie Iṛuva, kyasia ankiṛeń alli, kwakooya ankundye! Amu ye anumbua mMwana wa Iṛuva.

⁴⁴Mfo kuro na akwaa mfisoki filya fakabyo nsalabeń andu emwi nae fikanrumaruma.

⁴⁵Na kuuka saa isasaru llema ukawa isangeń lyoose kumande kyeeri kya saa kyeenda.

⁴⁶Neeli kindefika kyeeri kya saa kyeenda, Yesu karera na ununga unini eenumbuaa: Eli, Eli lama sabaktani? Nkimwi na: Iṛuva wakwa, Iṛuva wakwa nkiki ili kwanshitia?

⁴⁷Na kiindi kya valya veeselelee-wo ili vandeita kuro vakanumbua: Akee ivaanga Elia.

⁴⁸Na lia eni umwi wawo kaenda eerishaa kandennde kimiminda mura. Kakiishuṛa mfinyo udookaa karwaa irekoń kanrita.

⁴⁹Kyasia vengi vakanumbua: Tień tille akwaa Elia ashenkiṛaa!

⁵⁰Na Yesu kaṛoṛongya lingi na ununga unini kanutuka.

⁵¹Lia eni isulia lia inini liikee numbeń ya Iṛuva likaranduka kari lyuka ule kumande si. Na isanga likarerema na mbamba tikaalamuka.

⁵²Na mbanga tikaruuka na mivili miingi ya vasongori valya veemfwaa ikaṛuka.

⁵³Neeli vandemaa iṛuka vauka mbangeń numa ya iṛuka lyamwi vakaaka muṛiń nsongori vakakworusa kwa vandu veengi.

⁵⁴Kyasia nshili ulya wa vasikari andu emwi na valya veekee nae veeringaa Yesu ili vandelolya irerema lya isanga na filya findetanika, vakaeṛea nnu veenumbuaa: Nkue uu mMwana wa Iṛuva.

⁵⁵Na alya veeyoo vaka veengi veellaa vakee kwaasha. Nawo vvalya veeryanii na Yesu kuuka Galilaya veendundiaa.

⁵⁶Kari kawo eeyoo Maria wa Magidala na Maria mae wa Yakobo na Yose na mae wa vana valya va Sebedayo.

⁵⁷Neeli kundeila kafika nndu umwi isimba wa kulya Arimatia, irina lyamwi ni Yosefu. Nae muni eekee mwanalosho wa Yesu.

⁵⁸Nndu uu kafika kwa Pilato kantereva vvili wa Yesu. Llyo Pilato avavasa aniingyo.

⁵⁹Yosefu kaimboo vvili wa Yesu kawiṛina na nseto mwelwa fyu.

⁶⁰Kawaṛa mbangeń yamwi shiiya eeiremyee mbambeń. Kabiṛingitya-wo iwe inini io mwaangoń wa mbanga kakwendya.

⁶¹Na alya eeyoo Maria wa Magidala na Maria ulya ungi veekee rembo vandesumana na mbanga.

⁶²Neeli lya ndesi nto wikee nkonu ulatye nkonu wa ikusongosia llyo vakohani vanini na Vafarisayo vakakusandya kwa Pilato.

⁶³Vakanumbua: Nndumi, tankumbua sheeli llembi ulya lia akee na muu anumbua: Numa ya mikonu iraru ndukaa.

⁶⁴Kyasia vavasa, sheeli mbanga ilya iringwa kisha kumande nkonu to wa kararu wafika, kaaṛa vanalosho vamwi vatashe vamwive, vandeia vandu: Anduka kwa vafu, na ulembi lu lwa ifurumia lukilyaa lua lwa mbele.

⁶⁵Pilato kavaia: Mukooyaa varingi. Endeń mukanderinga kinuru sheeli mulolyaa.

⁶⁶Vakaenda vakanderinga mbanga ilya kisha vakarwaya iwe lia kiringisyo vakarawa-wo na varingi valya.