Read MMA SHIYYA Matayo 28 Bible Online

Matayo 28 - MMA SHIYYA bible

Matayo 28

¹Ili nkonu wa Sabato undesia na ngama ya nkonu wa Iṛuva ikakwimboo, Maria Magidalena kasha isengera mbanga ya Yesu andu emwi na Salome na Maria ulya ungi.

²Lia eni isanga likarerema nnu, fulya malaika wa Nndumi aoloka iṛuvewu kaserikya mbanga kashebiṛingita-wo iwe lia liirayee mwaango wa mbanga kalikaya.

³Na vvili wamwi wikee ikalakala sha kimuli na nseto wamwi wikee mwelwa fyu.

⁴Na varingi valya veekee iringa mbanga vakakyangika vakava sha vafu.

⁵Kake malaika ulya kaia vaka valya: Mutaeṛee! Niishi namanya mukee iṛuya Yesu ulya andekabyo nsalabeń.

⁶Akiifo ndi, anduka sha lia annumbua. Oṛeshoń mulle alya Nndumi eeaṛyoo!

⁷Na numa risheń mundeia vanalosho vamwi andu emwi na Petiro, sheeli anduka kwa vafu. Nae amwiryaa mbele kulya Galilaya. Mfo mundellolyaa. Nniń namuia.

⁸Vakasomuka mbangeń veerishaa na weṛei na ifura inini indeongoya vanalosho va Yesu mboni ii.

⁹Ili vakirekye shień kitaare vamfikia vanalosho, lia eni Yesu kakwania nawo kavavaanga: Yeyo kień! Vakanserikya vakabaana marende amwi vakawa na si mbele yamwi.

¹⁰Llyo Yesu avaia: Manya mutaeṛee! Endeń mundeia vamwanamae vakwa vaende Galilaya. Mfo vandeshilolyaa.

¹¹Neeli varie shia veendaa, lia eni varingi valya kiindi vakafika kulya muṛiń vakaongoya vakohani vanini kya filya foose fatanika.

¹²Nawo vakakusandya andu emwi na vasuṛi. Vakalya kyama vakafinga vasikari valya fesa shiingi.

¹³Vakavaia: Numbueń sheeli wanalosho vamwi vandesha kio vakamwiva tirekye ruoń!

¹⁴Na kwakooya kirero ki kyaitiwa mmwitoṛo wa uruka, ise tireraa nae tiwinge na uṛango, kaaṛa ini mutaunganiswa.

¹⁵Nawo vakawaria fesa tilya vakatana sheeli vandefundwa. Na kirero ki kikarerwa kwa Vayuda na kumande nnu.

¹⁶Vanalosho valya ikumi na umwi vakaenda Galilaya vakafika uroń lua Yesu eewavavasyaa.

¹⁷Ili vandellolya vakawa na si mbele yamwi. Kake kiindi kyawo vakawarwa ni inunua.

¹⁸Yesu kavashea karera nawo. Kavaia: Niń nanniingwa finya yoose ya ishilia kulya iṛuvewu na kunu isangeń.

¹⁹Kyasia endeń mundeaṛua vandu va masanga woose, amu vave vanalosho vakwa mwivabatisaa vave va Iṛuva Nde na Mwana na Mumuyo Nsongori.

²⁰Na ivalosha muvaloshe iwara filya foose nndemuvavasa. Nań nkaa andu emwi neeni mikonu yoose kumande isanga lisiaa.