Read MMA SHIYYA Matayo 7 Bible Online

Matayo 7 - MMA SHIYYA bible

Matayo 7

¹Mutaumisye vandu, amu neeni mutaumisyo.

²Amu myumisye ilya neeni mukee yumisya yyo meni muumisyoo nayo. Na kyelelyo kilya mwelelyaa, nkyo kyeni mwelelyoo nakyo.

³A iwe nki ili kwalla kinana kikee irisoń lya mwanamae wafo na kisinde kikee irisoń lyafo kutakiishi?

⁴Ana naare kuiaa mwanamae wafo: Vera nkuute kinana kyo kikee irisoń lyafo, neekai ifo irisoń lyafo ku muni kiifo kisinde?

⁵Iwe makavili, uta mbele kisinde kikee irisoń lyafo ku muni, llyo kulolyaa kisha kinana kikee irisoń lya mwanamae wafo kukyute.

⁶Manya mutaniinge makite kilya kikee kisongori. Ana manya muteeṛe samana tanu mbele ya nguve, amu titashe ivariavaria na marende ayo timwaṛuke timusambuesambue.

⁷Tereveń amu muniingwaa. Ruyeń amu mukooyaa. Kabekabeń yoondi amu muruyoo.

⁸Fulya ulya woose akee itereva aniingwaa, na ulya akee iṛuya akooyaa, na ulya akee ikabakaba yoondi aruyoo.

⁹Ana ni i umwi wanu mwana wamwi anterevaa imbumbu lya mangolo, anniinge iwe?

¹⁰Ana katereva ikunga, anniinge shoka?

¹¹Kyasiań kwakooya ini mukee varekwa mwishi iniinga vana vanu findo fisha, a Nde yanu wa iṛuvewu yye kilanya se aniingaa valya vakee intereva fisha?

¹²Kilya kyoose mufurie vandu vamutanye ini, neeni vatanyeń kuro da. Amu kuro llyo yawutya mavavaso na miloshye ya vaauya fisuku.

¹³Akeń mwaangoń ito nsuse. Amu wifo mwaango uwore mbari na shia yayo yalamukye, yyo ifikaa uretiń na valya vairaa shia yo vveengi.

¹⁴Na lingi wifo mwaango nsuse na shia yayo isaangi, yyo ifikaa muuń na vaira-fo waangu.

¹⁵Kusembekeń valosha va wongo vamusheaa vakee vawoo sha maanri, kake kari kawo vafisye ushaa sha ngwe.

¹⁶Muvamanyaa mitanyeń yawo. A nndu amakii iminya maṛuu ifo masangaṛyuń ana iyaa nroo ifo nrueń?

¹⁷Mfo kuro kikai: Nri woose ukee nnuru uvikaa nunda shinuru. Na nri nkasha uvikaa nunda shikasha.

¹⁸Nri nnuru umakii ivika nunda shikasha ndi ana nri nkasha umakii ivika nunda shinuru ndi.

¹⁹Mfo kuro na nri woose utavikaa nunda shinuru uminyoo weeṛwa muroń.

²⁰Kyasia muvamanyaa mitanyeń yawo.

²¹Nta ni nndu woose ashisendaa Nndumi Nndumi afikaa umangiń lwa iṛuvewu ndi kita ulya akee itana filya Nde yakwa wa iṛuvewu afurie.

²²Nkonu ulya wa ifurumya veefo veengi vashiiaa: Nndumi Nndumi, tanringisya na irina lyafo se? Ana tamuumbuta mimuyo mikasha na irina lyafo se? Ana tantana mashoṛa manini na irina lyafo ndi?

²³Llyo warambuyaa na baa: Mmwishi ini kutu ndi. Ukeń kwakwa, ini mwanshiliya kavili.

²⁴Kyasia ulya woose aaranyaa firero fi fakwa na iirikya kafiirikya, ito avakanaa na nndu ndango andetanya numba yamwi iweń.

²⁵Neeli fua nini indekaba na mifu ikaeka na mburaato ikavivita na finya fikakaba numba ilya, nta iituula. Fulya mfulo wayo wiremyee iweń.

²⁶Na nndu woose aaranyaa firero fi fakwa kara atafiirikya, ito avakanaa na nndu ntondo andetanya numba yamwi shia ya mfu.

²⁷Neeli fua nini indekaba na mifu ikaeka na mburaato ikavivita na finya fikakaba numba ilya, nayo ikawa boto.

²⁸Kyasia ili Yesu andemandisa miloshye ii yamwi, vandu valya woose veeyoo vakariika koṛoń kiimba kya miloshye yo yamwi.

²⁹Fulya ye andevalosha na finya aavyo ni Iṛuva muni kita vaana valya vawo va mitisine.