Read MMA SHIYYA Matayo 8 Bible Online

Matayo 8 - MMA SHIYYA bible

Matayo 8

¹Ili andeoloka uroń, syamu shiingi ikansoṛa.

²Kasha na-wo nndu eeworwaa ni ivave. Kawwoya eemwiaa: Nndumi, kwakunda kumakii ishaaṛua vve nsha.

³Yesu kasaaṛa uko lwamwi kambaana kamwia: Nkundye, kuve nsha! Lia eni ndwaṛi ilya ya ivave ikamwuka.

⁴Yesu kamwia: Manya kutaie nndu, kake enda kundekworusa nkohani ulya na yuta nsimbika sheeli Mose andevavasa, amu ive mirambuye kwawo.

⁵Ili andefika muṛiń wa Kaperinaumu, nshili wa fira kanshea kantereva eemwiaa:

⁶Wui Nndumi, noore iketi lyakwa liroyo kulya kyeń kwakwa liworwa nsaka ya meengo, likee ivavyo nnu.

⁷Yesu kamwia: Nshaa nshenkiṛa.

⁸Nshili ulya kamwaṛua kanumbua: Nndumi, niń nkee mwaangu, kivaa kufike kyeń kwakwa ndi. Kurerie kirero kimwi nsi na iketi lyakwa livaa isha.

⁹Amu nań noore vanini vakwa, noore na vaseṛo vakee kwa si yakwa. Kwakooya nkee iia umwi: Enda, aendaa. Naia ungi: Oṛesho, ashaa. Naia iketi lia lyakwa: Tana kindo ki kilive, litanaa.

¹⁰Ili Yesu andeita kuro, kaṛiika kaia vandu valya eeryanii nawo: Namuia kya dede: Kunu kwa Vaisiraeli woose nallolya nndu ashikusurye sha uu ndi.

¹¹Nań namuia: Vandu veengi vaukaa na taari ya ngama na taari ya ukwawuń vakaa rembo na ilya shoonga andu emwi na Abraamu na Isaki na Yakobo ifo umangiń lwa Iṛuva.

¹²Na vana va umangi wo vaumbutyoo wooṛo ifo llemiń. Neefo kivaa-fo kiiyo na ifina kitaku.

¹³Na Yesu kaia nshili ulya wa fira: Kwendye kyeń, kikuvie kuro sheeli kwanshikusura. Na iketi lyamwi likava isha kyeeri kilya kyeni.

¹⁴Neeli Yesu andefika numbeń kwa Petiro, kalolya mae wa nka wa Petiro alele kiraań kiimba kya mukunguru.

¹⁵Kambaana uko lwamwi mukunguru ulya ukamuuka. Nae kakwimboo kavaṛundya.

¹⁶Ili kundeva ukwawuń, vakamwendee veengi vaworwa mmimuyo mikasha. Nae kaumbuta mimuyo ilya mikasha na kirero kyamwi kakiṛa na woose veelolee.

¹⁷Naamu kifike kirero kilya kyeenrerwaa mmwauya kisuku Yesaya eenumbuaa: Yye aimboo saka teru ka-kwekeṛya na mavaviswa eru.

¹⁸Ili Yesu andelolya isyamu iingi liillengetyaa, kavavasa kiṛu-kwa kwa kulya.

¹⁹Ndango umwi wa mitisiṛie kanshea kamwia: Llosha, nkulatyaa kundo koose kwendaa.

²⁰Yesu kamwia: Mabaaṛwe awore mbanga na ndee ta iṛuvewu toore fifuri, kake Mwana wa nndu awore andu a yaṛa nrwe wamwi ndi.

²¹Ungi kari ka vanalosho vamwi kamwia: Nndumi, shiniinga mbele muumu neende nndeṛika vaava wakwa.

²²Yesu kamwia: Shisoṛa, tia iwo vafu vaṛike vafu vawo.

²³Kyasia Yesu kasaama ngalaveń na vaseṛo vamwi vakansoṛa.

²⁴Ili veekee karikari ka nruva, mburaato nini ikasha. Ngalava ikasikyo̱ mmavia a nruva. Nae Yesu eerekyee ruoń.

²⁵Vaseṛo vamwi vakanserikya vakamwanta veenumbuaa: Wui Nndumi tikiṛe, tikee isia deń.

²⁶Nae kavaia: Nkiki ili mukee veeṛei kuri? A baa vandu va ikusura yaangu! Kakwimboo kanaya mburaato na nruva. Lia eni fikasia do do.

²⁷Vandu valya vakariika veenumbuaa: A nndu uu wwa mikae ingai, mburaato imwirikye na nruva?

²⁸Ili andefika kwa kulya urukeń lwa Vagerigesa, kakwanya na vandu vavili vaworwa mmimuyo mikasha vauka neefo mbangeń ta vafu. Nawo wavaave nnu, nta nndu eekee imakii iira shia ilya.

²⁹Lia eni vakaṛoṛongya nnu veenumbuaa: Nkiki toore nawe, Yesu Mwana wa Iṛuva? Naare? Kwansha ishetivavisa kitaare kyeeri kyamfika?

³⁰Kwaasha na io vakai iiyoo shoo ya nguve ikee iiswa.

³¹Mimuyo ilya mikasha ikantereva iinumbuaa: Kwantuumbuta, tiie teende shooń ilya ya nguve.

³²Yesu kaiia: Kwendyeń! Nayo ikasomuka-fo ikandeaka ifo nguveń. Kwibari shoo ilya ya nguve ikatembeṛuke ikakweeṛa wangeń ikasia nruveń ikafiya-fo.

³³Kyasia veesi vakarisha vakaenda kumande muṛiń vakakwanisa mboni toose na akwaa n ta valya veewarwaa mmimuyo mikasha.

³⁴Llyo vandu va muṛi woose vakwimboo vandekwanya na Yesu. Neeli vandellolya, vakantereva akwimboo miyanuń yawo.