Read MMA SHIYYA Mariko 1 Bible Online

Mariko 1 - MMA SHIYYA bible

Mariko 1

¹Nrumi shisha ya Iṛuva sheeli indenndwa ni Yesu Kristo Mwana wa Iṛuva, indebooka kuri

²sheeli yatisiṛwa mmwauya kisuku ulya Yesaya: ”Manyiń niń nrumaa mumbele wakwa akwirie mbele, asongosie shia yafo“.

³”Lwifo ununga lwa nndu akee ivaanga ṅṅaloń: Songosień shia ya Nndumi! Seṛeeseń miko yamwi!“

⁴Nkuri Yohane mbatisa andesha eebatisaa vandu kulya ṅṅaloń. Kakwanisa ubatiso lwa iilashika, amu vatio mareko awo.

⁵Vakanshea va uruka loose lwa Yudaya na va Yerusalemu woose vakabatisyo yye kulya mureń wa Yoridane veerambuaa mareko awo.

⁶Na Yohane eeṛee miseto myoke na mafuli a ngamia na kitati kya shoni kisiń kyamwi. Na shoonga yamwi ikee nrie na uki wa mbakoń.

⁷Kakwanisa eenumbuaa: Ito ashaa numa yakwa awore finya kita niń. Nań nta nkaṛiaa ikwinika neelelise ngyuṛuumu ta faaru famwi ndi.

⁸Kyakwa niń ni ibatisa na mura, kake ye ashemubatisaa na Mumuyo Nsongori.

⁹Na mikonu ilya llyo Yesu ashe auka Nasareti wa Galilaya kabatisyo ni Yohane mureń wa Yoridane.

¹⁰Neeli auka ifo mureń, kalolia iṛuvewu liiruukaa kalolia Mumuyo wa Iṛuva eemoolokyaa sha mbuku.

¹¹Na ununga lukauka iṛuvewu lwireraa: Iwe ni iwe Mwana wakwa nkunde kushisenye.

¹²Lia eni Mumuyo wa Iṛuva kankurika bateń.

¹³Kakaa ifo bateń andu a mikonu makumi aani eelelyoo nSatana. Nae eekee andu emwi na mafisi a bateń. Na vamalaika vakandundia.

¹⁴Ili Yohane andemaa ifingwa, Yesu kasha Galilaya kakwanisa nrumi ya Iṛuva ya ifura

¹⁵eenumbuaa: Mikonu yamfika na umangi lwa Iṛuva lwansha kufui. Ilashikeń mirimiń mukakusura nrumi ii shisha.

¹⁶Neeli eeiraa mbaai ya nruva ilya ya Galilaya, kalolia Simon na Anderea mwanamae wamwi veeolotaa mireyo ifo nruveń. Fulya wo veekee vareya makunga.

¹⁷Yesu kavaia: Oṛeshoń shisoṛeń! Nań mmuaṛuaa muve vareya vandu.

¹⁸Na lia eni vakatia-wo mireyo yawo vakansoṛa.

¹⁹Neeli andeenda mbele kinnya, kalolia Yakobo mwana wa Sebedayo na Yohane mwanamae wamwi. Nawo veekee ngalaveń veesongosiaa mireyo yawo.

²⁰Lia eni kavavaanga. Vakatia nde yawo Sebedayo ngalaveń andu emwi na vaṛundi. Vakaenda vakallatia.

²¹Vakawara shia vakafika Kaperinaumu. Neeli tindefika nkonu wa Sabato, kaaka numba ya iterevia kalosha-fo.

²²Na vandu vaka-ṛiikiswa mmiloshie yamwi. Amu eekee ivalosha sha muni ivavaso, nta nsha vaaṛia va mitisiṛie ndi.

²³Neefo numba yawo ya iterevia eeifoo nndu eeworwaa mmumuyo nkasha. Karosa ununga

²⁴eenumbuaa: Nkiki toore nawe, Yesu wa Nasareti? Kwansha itireta! Tikwishi sheeli ni iwe i. Ni iwe Nsongori wa Iṛuva.

²⁵Na Yesu kaunaya eenumbuaa: Sia do do mwuke!

²⁶Mumuyo ulya nkasha ukansikasika ukaishiṛa na ununga unini ukamwuka.

²⁷Vakawarwa ni utaṛawu woose vakauṛana wo veni na veni veenumbuaa: Nkyo ki iki? A ii miloshie miiya iwore finya yuka kwa Iṛuva. Akee ivavasa na mimuyo mikasha, nayo ikamwirikia.

²⁸Mboni tamwi tikakwana ree koose urukeń loose lwa Galilaya na miyanuń.

²⁹Vakasomuka numba ya iterevia vakafika numba kwa Simon na Anderea variani andu emwi na Yakobo na Yohane.

³⁰Na mae wa nka wa Simon eelelee kiraań araywa ni iseńu. Na lia eni vakamwongoya mboni tamwi.

³¹Kanserikia kawwara uko kamwimboo. Na iseńu lia likava isha. Nae kavaṛundia.

³²Neeli kundeva ukwawuń na saa immaa yakia, vakamwendye woose valole na iwo vaworwa mmimuyo mikasha.

³³Na muṛi woose wikusandyee io mwaangoń.

³⁴Nae kakiṛa vandu veengi veelolee saka ta mikae miingi. Kaumbuta mimuyo mikasha miingi eeiimaa iireraa, fulya imwishi.

³⁵Neeli lya ndesi ngama kio kakwimboo kasomuka numba. Kaenda kyaanya kyamwi andu vatayo vandu kandeterevia-fo Iṛuva.

³⁶Simon na vaaroe vamwi vakansaṛikia.

³⁷Ili vandenkooya vakamwia: Vandu woose vakee ikuniya.

³⁸Nae kavaia: Ndefoń teende kundo kungi fyunguń ifo fikee miyanuń, amu nndekwanisa-fo nafo. Amu ikyo nkyo kindeshinnde.

³⁹Kawara shia kaenda eekwanisaa kulya Galilaya koose eeakaa ifo numba tawo ta iterevia na yumbuta mimuyo mikasha.

⁴⁰Kashewa ni nndu aworwa ni ivave. Kantereva eefwiṛyaa nri si kamwia: Kwakunda kumakii ishiaṛua vve nsha.

⁴¹Nae kallilya kasaaṛa uko lwamwi kambaana. Kamwia: Mfurie, va nsha!

⁴²Lia eni ivave lia likamuuka kava nsha.

⁴³Kamwikimba eemwimaa na finya kansomuta lia eni.

⁴⁴Kamwia: Manya kutaie nta nndu kindo! Endań kundekworusa nkohani ulya. Kuniingie na kindo kya iniinga Iṛuva kiimba kya ishia lyafo, kasa Mose avavasa, kive nkyo mirambuye ifo kwawo.

⁴⁵Kake ili andelakana-wo, kabooka yongoya firero fiingi na ikwanisa mboni ilya. Na Yesu andekimakii lingi iṛua muṛiń wa vandu na baa ndi. Kakaa kyaanya andu vatayo vandu. Kake vandu vakanshea vauka taari toose.