Read MMA SHIYYA Mariko 10 Bible Online

Mariko 10 - MMA SHIYYA bible

Mariko 10

¹Kakwimboo-fo kafika miyanuń ya Yudaya na kulya kwa kulya ya Yoridane. Isyamu iingi vakakusandia lingi vakanshea. Kavalosha lingi sheeli eeshivie.

²Kyasia Vafarisayo vakanshea vakamwuṛa: A nkisumani nndu alakani na nka wamwi? Nawo veekee inreya.

³Nae kaaṛua kavaia: A Mose amuvavasa are?

⁴Nawo vakanumbua: Mose aniingia muumu nndu atisiṛe barua ya llakanu valakaniń.

⁵Yesu kavaia: Nkiimba kya uumu lwa mirima yanu kamutisiṛia ivavaso li.

⁶Kake kuuka io mabookioń a isanga Iṛuva avatana vakee nndumi na nka.

⁷Na kiimba kya ikyo nndu atiaa ndee na mae alungani na nka wamwi.

⁸Nawo ve vavili vavaa vvili umwi, nta vakivaa lingi vavili ndi, kake ni vvili umwi.

⁹Kyasia kilya Iṛuva ankilunga, manya nndu atalakanise.

¹⁰Neeli veekee ifo numba, vanalosho vamwi vakamwuṛa lingi mboni to.

¹¹Kavaia: Nndu woose alakanaa na nka wamwi andeora ungi amaaika ana amaava numba.

¹²Na nka kalakana na mmi wamwi kandeorwa ni ungi amaaika ana amaava numba.

¹³Vakaendee Yesu vana, amu avaniinge mboṛa. Kake vaseṛo vamwi vakanaya valya veevariee.

¹⁴Na Yesu kamanya kavatuṛukia kavaia: Otoṛeń vana vashe kwakwa, manya mutaveemi! Amu valya vakee sha iwo umangi lwa Iṛuva llwawo.

¹⁵Namuia kya dede: Ulya atawario̱o̱ umangiń lwa Iṛuva awore mikae ya mwana munnya, afikaa-fo kutu ndi.

¹⁶Kavashukuṛa kavaekeṛia maako kavaniinga mboṛa.

¹⁷Kyasia ili asomuka wooṛo aware shia, nndu umwi kanshea eerishaa kawwoya ṅundeń kamwuṛa: Llosha nnuru, nkiki ntanaa, amu nrwaa diṅu ya muu utakisiaa?

¹⁸Yesu kamwia: Naamu ki kwashivaanga nnuru? Eefo nnuru kitaare ni umwi tubu, nae ni Iṛuva.

¹⁹Kwishi mavavaso alya: Kutawaa, kutaaike, kutaive, kutafingie nndu ungi kindo atatanie, kutalembe, kwindie ndeo na maa!

²⁰Kamwia: Llosha, ifi foose nafiwara kuuka utiń lwakwa.

²¹Yesu kamulla koroo kankunda kamwia: Kwaanguyo̱ nkindo kimwi: Enda kwandekumba foose kuwore kwavie vakiva. Llyo kundevaa na masaa iṛuvewu. Kwammaa oṛeshoń kushisoṛe.

²²Nae kalema kisangu kiimba kya kirero kyo. Kaenda anarie, fulya eeworee masaa meengi.

²³Yesu kalla vanalosho vamwi kavaia: Lleń kasa kikee kyumu masimba aake umangiń lwa Iṛuva!

²⁴Na vanalosho vamwi vakaṛiika kiimba kya firero fo famwi. Yesu kaaṛua lingi kavaia: Muṛe vana, lleń kasa kikee kyumu valya vakusurie masaa yaka umangiń lwa Iṛuva.

²⁵Nkyaangu ngoye iitwa mbueń ya sindano kita isimba yaka umangiń lwa Iṛuva.

²⁶Nawo vakaengeṛia iṛiika vakakurera wo veni na veni: Ni i amakiiń ikia?

²⁷Yesu kavalla koroo kavaia: Kwa vandu kimakii iva ndi, kake kwa Iṛuva nkuro ndi. Amu kwa Iṛuva fivaa foose.

²⁸Petiro kabooka imwia: Lla te mbee, ise tantia-wo foose tikakulatia iwe.

²⁹Yesu kanumbua: Nkya dede namuia: Eefo nndu antia numba ana mwanamae ana mfwamae ana mae ana ndee ana vana ana nrema kiimba kyakwa na kiimba kya nrumi shisha

³⁰kara atawaria kaiyana, kyeeri ki kya alli awarie numba na vamwanamae na vamfwamae na mae na vana na nrema na akwaa atuṛulwaa. Na ifo isangeń lyo lishaa awarie muu utakisiaa.

³¹Kake veengi vakee va mbele vavaa va numa. Na va numa vavaa va mbele.

³²Ili vakee shień veendaa veerwaa na kulya Yerusalemu, na Yesu eevairiee mbele. Nawo vakaṛiika. Na valya vandensoṛa numa vakawarwa wweṛei. Kasaṅiṛia valya ikumi na vavili lingi kabooka ivaongoya filya fawara fivvie.

³³Kanumbua: Lleń te tikee irwa na Yerusalemu. Na Mwana wa nndu arambikyo̱o̱ maakoń a vakohani vanini na vaaṛia va mitisiṛie, nawo vamwumisiaa awalwa, nawo vanrambikiaa maakoń a vayavaṛumu.

³⁴Nawo vanteendaa na immishia manyiiri na inkaba na ngova na iwwaa. Na numa ya mikonu iraru aṛukaa.

³⁵Llyo Yakobo na Yohane vakee vana va Sebedayo vanserikia vakamwia: Llosha, toore kindo tifurie ikutereva kutitanie.

³⁶Nae kavaia: A kindo kyo mufurie mmutanie nkyo ki?

³⁷Nawo vakamwia: Tikaarise rembo umwi uko lwafo usha na ungi uko lwafo umuso, ili kukee uniniń lwafo!

³⁸Yesu kavaia: Nta mwishi kilya mukee itereva ndi. A naań mumakii inwa umbata lu niń nnwaa, ana ibatiswa ubatiso lu niń mbatiswaa?

³⁹Nawo vakamwia: Timakii da. Yesu kavaia: Umbata lu niń nnwaa munwaa, na ubatiso lu niń mbatiswaa mubatiswaa.

⁴⁰Kake ikaarisa nndu uko usha lwakwa ana umbuyo, ikyo nkindo kyakwa ndi, io ni andu a iwo vadeeṛie.

⁴¹Ili vaaroe valya vawo ikumi vandeita, vakatuṛukia Yakobo na Yohane.

⁴²Yesu kavavaanga na io akai kavaia: Mwishi sheeli iwo valolikie sheeli vvashilia vandu va masanga, vakee ivashilia na finya. Na vanini vawo vakavakanga.

⁴³Kake kari kanu nkuro kivaa ndi. Kake nndu afurie iva nnini kwanu kyawara ave mumuṛundia ini.

⁴⁴Na nndu afurie iva wa mbele, kyawara ave iketi lya woose.

⁴⁵Amu na akwaa mMwana wa nndu ansha asheṛundyo̱ ndi, ni isheṛunda na ishereka muu wamwi ave mutaua vandu veengi.

⁴⁶Vakafika Yeriko. Neeli akaba Yeriko mungo ariani na vanalosho vamwi na isyamu iingi, llyo vakooya mwana ulya wa Timayo, yye Baritimayo, akee ndoń akee rembo mbaai ya shia eeombaa vandu findo.

⁴⁷Kaita yye Yesu wa Nasareti. Karosa ununga lwamwi eereraa: Wui Yesu Mwana wa Davidi shililia!

⁴⁸Na veengi vakankangaya, amu asie do. Kake ye kaengeṛia nnu ivaanga na ununga unini: Wui Mwana wa Davidi shililia!

⁴⁹Yesu kasalala kanumbua: Vvaangeń! Vakavaanga nndu ulya mfu miso vakamwia: Uyo̱ mmuu! Kwimboo akee ikuvaanga.

⁵⁰Kakumba miseto yamwi ya yeeṛia mbaai kakwimboo kalatia Yesu.

⁵¹Yesu kamwia: Kufurie nkutanie ki? Ndoń ulya ukamwia: Llosha wakwa, mfurie llolie.

⁵²Yesu kamwia: Kwendie, ikusura lyafo lyankukiṛa. Lia eni kalolia kallatia ifo shień.