Read MMA SHIYYA Mariko 11 Bible Online

Mariko 11 - MMA SHIYYA bible

Mariko 11

¹Neeli vandeserikia Yerusalemu, vakafika Betifage na Betania, nkulya uroń lwa misenifu. Karuma vanalosho vamwi vavili kavaia:

²Endeń kimuṛiń kilya kikee mbele yanu. Mukafika-fo lia eni muloliaa kyaashe kya nshungu kyavikie kitaare kyankayo̱ ni nndu. Kyawueń mukasheendee!

³Na kwakooya nndu amuiaa: Nki ili mukee itana kuri? Numbueń: Ni Nndumi awore kiimba nakyo, nae akiwiiṛaa lingi ia.

⁴Vakaenda vakalolia kyaashe kilya kya nshungu kyavikie io mwaangoń kiwooṛo kari ka shia nini, vakakyawua.

⁵Na vandu kiindi veeselelee-fo vakavaia: Mukee yawua kyaashe kyo mutane nakyo ki?

⁶Vakavaia sha lia Yesu eevvavavasaa. Nawo vakavaotoṛia.

⁷Vakaendie Yesu kyaashe kilya kya nshungu vakaala miseto yawo mungoń wayo. Nae kakaa rembo kwa ule yayo.

⁸Na vandu veengi vakaala miseto yawo shień. Na vengi vakaala-fo maṛamba vandeminya ifo nremiń.

⁹Na vandu valya veekee mbele na valya veekee numa vakarosa ngyununga veereraa: Eetikiswa uu asha arumwa ni Nndumi!

¹⁰Luṅiniswa umangi lwa nde yeru Davidi lushaa! Osiana kulya ule iṛuvewu!

¹¹Kafika kulya Yerusalemu kaaka numba ya Iṛuva. Neeli andemaa illa-fo foose kundo koose kakwanisa. Kwavva ukwawuń kasomuka kaenda Betania andu emwi na valya ikumi na vavili.

¹²Ili vandekwimboo ngama veeukaa kulya Betania, kakooya aliwa nsoto.

¹³Kalolia nri wa nkuu ukee kwaasha uwore maru. Kaenda indella akwaa aloliaa-wo nunda. Kaufikia nta ilolia-fo kindo kita maru, fulya kitandefika kyeeri kya nunda.

¹⁴Kaaṛua kauia: Kuuka nnu na kumande miṛeṛe manya nndu atalye nunda tafo! Na vanalosho vamwi vakakiita.

¹⁵Kyasia vakafika Yerusalemu. Nae kaira na numba ya Iṛuva. Kabooka yumbuta valya veekee ikumbia-fo findo na yuṛia-fo. Kafuluta mesa ta veelasha fesa na fifumbi fa valya veekee ikumba mbuku.

¹⁶Nta yotoṛia nndu aire na wooṛo ya numba ya Iṛuva arie kiya.

¹⁷Kavalosha kavaia: A nkitisiṛe se sheeli: Numba yakwa ivaangwaa numba ya iterevia Iṛuva ya vandu va masanga woose? Neeni muka-kiaṛua mbanga ya fisoki.

¹⁸Vakohani vanini na vaaṛia va mitisine ili vandekiita, vakaraya mwaanya wa immamisa, fulya veemweṛee. Amu syamu yoose yaṛiikiswa mmiloshie yamwi.

¹⁹Na nkonu woose ili kwamiila kasomuka muṛiń.

²⁰Kyasia ili veeiraa ngama, vakalolia nkuu ulya wamuuma kuuka mirariiń yayo.

²¹Petiro kakumbua kirero kilya kamwia: Llosha, lla te nkuu ulya kwaudenga wamuuma.

²²Yesu kaaṛua kavaia: Kusureń Iṛuva!

²³Nkue namuia: Ulya woose aiaa uro lu: Iṛuka kweeṛwa nraveń, kara atanunua nrimiń wamwi kakusura deń, sheeli ifo anrera faawukiaa, nkuro aloliaa.

²⁴Kiimba kya ikyo namuia: Filya foose mufiterevaa na yoshoṛa, kusureń sheeli mwammaa ifiwaria, nafo mufiloliaa.

²⁵Na kyeeri muselele mwiterevaa, kwakooya muwore kirero na nndu llilień, amu na Nde yanu wa iṛuvewu amulilie neeni mareko anu.

²⁶Kake kwakooya ini kitaare mwalilia vandu, na Nde yanu wa iṛuvewu nta amuliliaa neeni mareko anu ndi.

²⁷Vakafika lingi Yerusalemu. Neeli eeṛuaṛuaa numbeń ya Iṛuva, kashewa wakahoni vanini na vaaṛia va mitisiṛie na vasuṛi.

²⁸Vakamwia: Nkwa finya ki kukee itana nayo ifi? Ana ni i akuniingie finya ii ya itana ifi?

²⁹Yesu kavaia: Mmuuṛaa kirero kimwi, neeni mushaaṛue. Numa nań mmuiaa nkwa finya ki nkee itana nayo ifi.

³⁰A ubatiso lua lwa Yohane lwauka iṛuvewu ana nkwa vandu? Shaaṛueń!

³¹Nawo vakakurera wo veni na veni vakanumbua: Kwakooya tanumbua: Lwauka iṛuvewu, anumbuaa: Naamu kiń kitaare mwamwirikia?

³²Ana tikanumbua: Lwauka vanduń? — Kyasia vakaeṛea vandu. Fulya vandu woose valolia Yohane mmwauya kisuku dede.

³³Vakaaṛua Yesu vakanumbua: Tiishi ndi. Yesu kavaia: Na akwaa nniń mmuiaa mfinya ki nkee itana nayo ifi ndi.